Veelderhande schriftuerlijcke liedekens

[fol. R8v]

144. Een ander.

MIn Heer mijn Godt
Mijn hemels Uader wtuercoren
Uan al v ghebot
En houd ic niet een achter noch voren
Maer Uader staeckt toch uwen toren
Mijn crancheyt aensiet
Ick en twijfel niet
Ick sal noch eewich met v vruecht orboren.

Beuechtinghe ende aenstoot
Moet ick lijden van daghen tot daghen
Uyant weerelt, helle, sonde, en doot
Legghen naer my listen en laghen
Maer Uader in v hebbe ick behaghen
Gheeft mi de macht
Dach ende nacht
Dat ick v cruys mach helpen draghen.

Int Babelonsche lant
Hout my die doot ende die sonde gheuanghen
Maer Heere ghy hebt den bant
Ontdaen met uwer hant niet om verstranghen
Dies ick wt rechter liefden v moet aanhanghen
Die weerelt loos
Is wt altoos
Om my te bringen in huer bedwanghen.

Sondich ende cranck
Is mijn natuere ghecomplexyoneert
In tvyants bedwanck
Was ick duer Adams val ghemessuseert
Maer Uader ghy hebbet al gherefureert
Adams misdaet
En Euaens raet
Hebdy voor uwen Uader ghepayseert.

U bermherticheyt ydoon
Begheer ick Heer maer niet v recht
Hadde ick naer mijnen loon

[fol. S1r]

 

Soo waer ick een arm verwaten knecht

 

Uan trijcke soo ons de schriftuere secht

 

Ghy zijt alleen

 

Die ons maeckt reen

 

Uan al ons sonden suyuer en oprecht.

 

 

 

Lof eer en prijs

 

Moet v toeuloeyen Godt van Israel

 

Dats mijn aduijs

 

Want ghy ons hebt ghebrocht wt groot gequel

 

Dus ick v wil aenbeden en niemant el

 

Want duer v cracht

 

Hebdy die macht

 

Babelon ghenomen met hueren raet seer fel.

 

 

 

Prinche van Iuda

 

Alle leden moeten voor v beuen

 

En roepen aen v ghenay

 

Soo ons die Propheten te kennen gheuen

 

Salicheyt wt v moet elck aencleuen

 

O dierbant pant

 

Seer triumphant

 

Ghy zijt die wech waerheyt en tleuen.