Veelderhande schriftuerlijcke liedekens


137. Een ander. LAet ons gaen verblijden Christen menschen goet Met Iesus besnijden Dalder eelste bloet Hebt goeden moet En leuet sonder vare Wat dat ghy doet Met desen nieuwen Iare. Wie sou droeuich wesen In desen blijen tijt Want wy zijn ghenesen Uan dallendich ghecrijt Denghelen maken iolijt Met een groote schare Dus vrolijck zijt Met desen nieuwen Iare. Om ons is hy comen Dat alder edelste greijn Ons menscheyt aenghenomen
[Folio R2v]
Heeft hy in dit pleijn Wy weten nv certeijn Het blijckt int openbare Dat kindeken cleijn Met desen nieuwen Iare. Den dach schijnt nv seer schoone Den nacht heeft ghedaen Wt des hemels troone Hebben wy een kint ontfaen Laet ons tot hem gaen Ten valt ons niet sware Uan stonden aen Met desen nieuwen Iare. In Bethleem gheboren Uindy hem ter stont Drij Coninghen wtuercoren Custent aen sinen mont Want die fellen hont Herodes volcht hem nare Door practijcken en vont Met desen nieuwen Iare. Drincken en eel Heeren In dit eertsche dal Helpt ons dit kindeken eeren Een Coninck bouen al Soo moghen wy tgheschal Hooren van Dauids schare Hoet dat wesen sal Met desen nieuwen Iare.