Veelderhande schriftuerlijcke liedekens

132. Na die wijse. Laet ons den Lantman louen.

[fol. Q5r]

 

LAet ons dat woort Gods prijsen

 

Ghy Christen al ghemeijn

 

Want het doet die siele verrijsen ⁺

 

Het maeckt die sinnen reijn ⁺

 

Door ongheloouichede//den gheest beswaren doet

 

Dwoort Gods brengt ons vrede ⁺

 

Dat edel graentken soet//daert al bi leuen moet. ⁺

 

 

 

Dat dwoort Gods is soo crachtich

 

Uan machte alsoo groot

 

Wie dat ghelooft warachtich ⁺

 

Hy leeft al waer hy doot

 

Uerloren so sal hy wesen, so wie des niet en doet ⁺

 

Tgelooue moet ons ghenesen ⁺

 

Dat edel graentken soet//daert al etc. ⁺

 

 

 

Het is de moeder vercoren

 

Spreeckt Christus zijt dit wel vroet ⁺

 

Daer wy door worden herboren

 

In alle duechden goet ⁺

 

Om alle wellusten te versaken//van eyghen vlees en bloet

 

Dus can ons dwoort Gods maken ⁺

 

Dat edel graentken soet//daert.etc.

 

 

 

Daer staet claerlijck ghescreuen ⁺

 

Uerstaghet cleijn en groot

 

Dat die menschen niet en leuen ⁺

 

Alleene byden broot

 

Maer by alle leere//die wt Gods monde vloet ⁺

 

Dus moet ons al regeren//dat edel graen etc. ⁺

 

 

 

Hoe souden wy anders leuen

 

Als daer gheschreuen staet

 

En waert ons niet ghebleuen

 

Dat Goddelijcke saet ⁺

 

Als Sodoma die versoncken//al in des duuels broet ⁺

 

Maer nv is ons gheschoncken ⁺

 

Dat edel woort Gods soet//daert etc. ⁺

 

 

 

Christus die Heere ghepresen

 

Sprack tot sinen iongheren cleijn ⁺

 

Warachtich soo wy lesen

+ Ioan.xi.

+ i.Pe.iij.

+ Luc.i.

+ Mat.xiij.

+ Ioan.xi.

+ Act.xvi.

+ Gal.iij.

+ Mat.xiij.

+ Ioan.ix.

+ Gal.v.

+ Mat.xiij.

+ Mat.iiij.

+ Deu.viij.

+ Sa.xvi.

+ Mat.xiij.

+ Esai.i.

+ Ge.xix.

+ Ro.viij.

+ Mat.iiij.

+ Ioan.xv.

[fol. Q5v]

 

Door dwoort soo worden wy reijn ⁺

 

Niet door ons eyghen wercken, noch verdienden goet ⁺

 

Ghy Christenen wilt aenmercken

 

Dat edel woort Gods soet//daert etc. ⁺

 

 

 

Het is een sweert van crachte

 

Soo Paulus doet vermaen ⁺

 

Des boosen vyants machte ⁺

 

Daer door wy al ontgaen ⁺

 

Sijn macht wort hem benomen, getreden onder de voet

 

Het is tot onser vromen ⁺

 

Dat edel woort Gods soet//daert al etc. ⁺

 

 

 

Het is een harnas van weerden ⁺

 

Het brengt ons wt der noot ⁺

 

Sy moeten daer voor ter eerden

 

Helle duyuel ende doot ⁺

 

Het can die pijlen schutten//al van den vyant onuroet

 

Het is onser siele nutte ⁺

 

Dat edel woort Gods soet//daert etc. ⁺

 

 

 

Omdat wy eewelijck leuen

 

Wy gheloouighen al ghemeyn ⁺

 

Dat doet Gods woort verheuen

 

Dat Goddelijcke greijn ⁺

 

Om dat wy vast betrouwen//met herten sin en ghemoet

 

Ten laet ons niet verflouwen ⁺

 

Dat edel woort Gods soet//daert al by leuen moet.

+ Lu.xvij.

+ Phili.ij.

+ Mat.iiij.

+ Eph.vi.

+ Heb.iiij.

+ Apoc.ij.xix.

+ Heb.xi.

+ i.Ioan.i.

+ Mat.iiij.

+ Eph.vi.

+ Mat.iiij.

+ Ioan.i.

+ Mat.iiij.

+ Ioan.xij.

+ Ro.viij.

+ Mat.iiij.