Veelderhande schriftuerlijcke liedekens


95. Na die wijse. Ick weet een bloemken aen gheen groen heyden. HOort en siet//van droefheyt een nieu liet Ionck en out wie dat ghy zijt [Dien] hoort nv niet//dan oorloge en verdriet Uan hongher groot ghecrijt Hier om so wilt aenbeden//den Heer met neersticheden In desen dieren tijt. Wie sacher oyt//de neeringhe so verstroyt Als nv breet ende wijt Ueel zijn beroyt//van de waerheyt men nv schoyt Om ghewin si bruycken nijt Hier voor so wilt v wachten//so salt den Heer versachten In desen dieren tijt.
[Folio L8r]
Niemant gaet voort//in sonden dus versmoort Maer betert v subijt Op dat Gods woort, bescudden mocht de moort Die menich huysman lijt Want God is goederthieren//aenbidt hem met manieren In desen dieren tijt. Al ons misdaet//van ons soo snoy en quaet Sendt Godt al sonder respijt In uwen raet//die nauwelijck verstaet Gods woort ghebenendijt Dus wilt als nv beginnen//de boosheyt te verwinnen In desen dieren tijt. Hier om tis noot//den armen deylt v broot Met aelmisse haer verblijt Wt liefden groot//soo laet de sonden snoot Die crancke niet en mijt So sal v God ontfermen//aenhooren ooc v kermen In desen dieren tijt O Prinche goet//diet al verhueghen doet Maeckt ons dees droefheyt quijt Sendt metter spoet//in onsen Keyser moet Al is hy inden strijt Dat hi tot peys wilt spreken//zijn vianden niet wreken In desen dieren tijt.