Veelderhande schriftuerlijcke liedekens


79. Na die wijse. Ick was een clercxken ick ghinck ter scholen. HOe suyuer is der liefden gheslachte Die liefde Gods is excellent Die wijsheyt woont in haer ghedachte Metten gheloouighen is si bekent
[Folio K3v]
Hebt lief den Heere wt al v crachten Soeckt uwen broeder v seluen niet Uan eyghen liefde leert v wel wachten Want doer die selue quam alt verdriet. Aensiet die liefde daer Christus mede Uan bouen hier is neder ghedaelt Eyghen minne en greep daer gheen stede Maer broederlijcke liefde heeft hem bestraelt. Dit was een liefde van reynder nacie Doer haer soo zijn wy al verhuecht Hoe suyuer is haer generacie Den gheest des leuens is haer vruecht. Deser liefden zijt altijt ghedachtich Siet nv dat al doer liefde gheschiet Want al haddy schijnsel va duechden crachtich Hebdy gheen liefde soo eest al niet. Niet om gronderen en zijn Gods wercken Die hy door liefde heeft ghedaen O Heere wilt ons ghelooue stercken Soo moeghen wy die rechte liefde verstaen. Maer die dit liedeken eerstmael dichte Door liefde was si daer toe ghesint Die Heer wil haer den gheest verlichten Een vrolijck lijden druck verwint.