Veelderhande schriftuerlijcke liedekens(ca. 1552-1554)–Anoniem Veelderhande schriftuerlijcke liedekens– Auteursrechtvrij Vorige Volgende 39. Een ander. DEn gheest is ghewillich maer tvlees is cranck Dat mach ick my wel beclagen Want ick heb alle mijn leuen lanck Nader werelt, mijn ionste ghedraghen Ick en weet niet wat ick sal bestaen En ick vinde my vol ghebreken Ick heb haer soo menighen dienst ghedaen Duer haer wellustighe treken. Uander weerelt en can ick mi niet gesnyden Natuere en willes niet gedooghen Uruecht en solaes, doet my verblijden Daenschouwen van minen ooghen Dat vleesch houwet mi int bedwanck Om dat ick ben onghebonden Gheen vruecht en dunct my wesen te lanck Wellust treckt mi tot sonden. Die kennisse die ick hadde ontfaen Heb ick inder eerden ghegrauen Ghelijck de quade knecht heeft ghedaen En ben gheworden der sonden slauen Ick diende de weerelt al om haer eer Dat wort my nv mispresen O Uader ick en ben niet weerdich meer Dat ick v sone sou wesen. Die weerelt hebdy in v ghewelt Haer machten hebdy al benomen Met huer ben ick soo seer ghequelt Van haer en can ick niet ghecomen Sy is in mi en ick in haer Alleene hebdyse verwonnen O Heere den strijt valt my te swaer Ick en hebs noyt begonnen. O Heere minen gheest een wapen begeert [Folio E7r] [fol. E7r] Al om de weerelt te bestryden U godtlijck woort tot een vierich sweert Scherp wesende aen allen syden Een vast ghelooue tot eenen schilt Soo mocht ick strijtbaer wesen En haer verwinnen als ghy wilt Soo waer ick gans ghenesen. Prinche der Princhen nv staet my by Dat ick victorie mach verweruen Dees drije vianden, die bestormen mi Mijn siele die willen si al bederuen De weerelt en de duyuel ongeureest En mijn eyghen lichaem mede Sijn altijt rebel teghens den gheest Dus is mijn siele in onvrede. Die dit Lieken eerst heeft gheordineert Sijn herte dat leet bedwonghen Sijn sinnekens zijn ghecorrumpeert Wt fantasien heeft hijt ghesonghen Die weerelt en can hy niet wederstaen Bidt voor hem tallen tijden Dat hy rechte kennisse mach ontfaen Al sou hy daer omme lyden. Vorige Volgende
Auteursrechtvrij Auteursrechtvrij Auteursrechtvrij
Auteursrechtvrij
Auteursrechtvrij