Veelderhande schriftuerlijcke liedekens

38. Na die wijse. Ick wil my ghaen verhueghen.

DIe tijt van onse iaren
Die zijn seer cort en cleyn
Wy moeten van hier varen
Wy allen hier ghemeyn
Daer om certeyn
Soo moeten wy wat besueren
Eenen cleynen tijt
Ten sal niet eewich dueren.

Nu latet v niet verdrieten
Al schijnt Gods armoede soo swaer
Sijn gratie sullen wy ghenieten
Ende connen in zijn glorie claer
Want Godt is onse vaer
Waer om soo willen wy trueren
Het is die laesten tijt
Ten sal niet eewich dueren.

Tot lyden zijn wy gheboren

[fol. E6r]

 

Gheworpen onder alle ghewelt

 

Wy sijn Gods wtuercoren

 

Als ons schrieftuere vermelt

 

Lijdt verduldelijck die v quelt

 

Tis tot deser vren

 

Dier tijt die is ghetelt

 

Ten sal niet eewich dueren.

 

 

 

Hoe sorget ghy mensche soo seere

 

Hoe staet ghy soo vroech op

 

Meynt ghy nemmermeer

 

Te hebben goets ghenoech

 

U hant slaet aen die ploech

 

Siet na uwe schueren

 

Daer v herte op leyt

 

Ten sal niet eewich dueren.

 

 

 

God vader van hier bouen

 

Die inden hemel sijt

 

U woorden willen si niet gheloouen

 

Sy hebbent seer benijt

 

Met grooter spijt

 

Sy legghent tusschen twee mueren

 

Eenen cleynen tijt

 

Ten sal niet eewich dueren.

 

 

 

Ierusalem is verwonnen

 

In dry deelen ghekeert

 

Die huysen zijn gheplonnen

 

Die vrouwen gheschandeliseert

 

Dat dereendeel is gheuanghen

 

Ghestroyt doer alle landen

 

Sy roepen tot dy

 

O Heer wilt haer ontfanghen.

 

 

 

Prinche God onse Uader

 

Die sorghe voor ons draecht

 

Hi is ons alder bewaerder

 

Wie isser die ons beclaecht

 

Alsoo alst behaecht

 

So wil die Heer ons pueren

[fol. E6v]

 

Het schijnt dat hy ons plaecht

 

Maer ten sal niet eewich dueren.