Veelderhande schriftuerlijcke liedekens
(ca. 1552-1554)–Anoniem Veelderhande schriftuerlijcke liedekens–
Auteursrechtvrij
[Folio E3v]
| |
Die tot desen Meye scrijt
Wort van alle sonden quijt
Sijn vruecht en al zijn leuen
Wilt hem Christus minnelijck gheuen.
Het vriesen het sneuwen is nv ghedaen
Die winter en mach ons niet dwinghen
Die wet des ouden Testaments is al vergaen
Die liefde moet al volbringhen
Die vast aen Christus liefde cleeft
Ende lief sinen broeder heeft
Als hem seluen na Paulus leeren
Hy volbrenghet die wet des Heeren.
De voghelkens singhen op dat groene hout
Soo vrolijck onbedwonghen
Dat zijn die Enghelkens menichfout
Ende alle gheloouighe tonghen
Dese singhen glorie fijn
Moet Christo in die hemelen zijn
Paeys mannen ende vrouwen
Die op zijn woort betrouwen.
Die Meyboom Cristus so iuechdich bloeyt
Met duechden menigherhande
Hy heeft ons met sinen dauwe bespoeyt
Sijn bloet tot eenen onderpande
Compt alle die belast zijt ende slaeft
Ga naar margenoot+
Tot mi seyt hy ghy wort ghelaeft
Ick sal v ontladen van sonden
Mijn iock is licht beuonden.
Sijn godlijck wort is een gebloeyet rijs
Daer wy op moeten beeten
Dwelck is beseghelt na Gods aduijs
Met Christus bloedich sweeten
Hy heeft den helschen vyant groot
Die sonde ende die eewighe doot
Uerwonnen tot allen daghen
Ende al onsen last ghedraghen.
Compt ter fonteynen die so oueruloedich staet
| |
[Folio E4r]
| |
Wilt van den water drincken
Het welck tot in dat eewich leuen gaet
Christus wilt ons minnelijck schincken
Want daer vloeyt wt Christus buyck
Leuende water tot onsen ghebruyck
Den heylighen gheest eersame
Schenct hy wt liefden tonser vrame.
Ghelooft si die Meyboom victorieus
Die ons God schanck wt minnen
Wt den gheslachte van Iuda coragieus
Een Leeu niet om verwinnen
Christus den eewighen Mey
Die maect alle herten bley
Met sinen gheeste iuechdich
Die hem versoecken vruechdich.
O Prince Iesu Meyboom ghebenedijt
Soo lustelijck ontploken
Ontfanghet ons in v armkens wijt
Aent cruyce voor ons ontloken
Ghy zijt onsen troost en al ons vruecht
Alleenlijck bi uwer duecht
So worden wy deelachtich
Is ws Uaders rijcke warachtich.
|
|