Veelderhande schriftuerlijcke liedekens

26. Na de wijse. De vogelkens inder muyten.

COmpt al van suyden en van oosten
Die met sonden zijt belaen
Ick sal v wel vertroosten
Met mijn vleesch sal ick v versaen ⁺
Ick ben die fonteyne verheuen
Die dorst heeft die come naer
Die daer wt drinckt sal eewich leuen
Spreeckt Christus die Heer int openbaer.

Ick en ben hier niet ghecomen ⁺
O menschen zijt dies wel vroet
Dat ick v soude verdoemen
Maer verlossen al met mijn bloet
Ick begheer in dijn hert te woonen
Daer en moet gheen ander in
Alleen moet ghy op my stoonen
Oft ghy en compt niet daer ick bin.

Ick ben den wijnstock wtghesproten ⁺
Spreeckt Christus verstaet mijn woort
Blijft vast in my ghesloten
Ghy sult bringhen goede vruchten voort
Maer laet ghy v verleyden
Dat ghy menschen troost aensiet

+ Ioan.vi.

+ Luc.ix.

+ Ioan.xv.

[fol. D5r]

 

So sult ghy vanden wijnstock worden gescheyden

 

Alle v vruchten en sullen dooghen niet.

 

 

 

Hebt lief en wtuercoren ⁺

 

Die v ter weerelt doen quaet ⁺

 

Die v boosheyt legghen te voren

 

Bidt daer voor tis Christus raet

 

Want Godt heeft selue ghesproken

 

Aenden cruyce met luyder stem

 

Och Uader en latet niet zijn ghewroken ⁺

 

Ick bidde vergheuet hem.

 

 

 

En vreest niet altesamen ⁺

 

Mijn woort voor die werelt belijdt ⁺

 

Oft ick sal v beschamen

 

Voor minen Uader ghebenedijt

 

Aldus en wilt niet vreesen

 

Maer strijt met herten vro

 

Laet den knecht ghelijck den meester wesen

 

Het belieft den Uader alsoo. ⁺

 

 

 

Ick ben een goet herder wtermaten ⁺

 

Ick gae mijn scaepkens voor ⁺

 

Ick begheer mijn leuen daer voor te laten

 

Ick ben die rechte door

 

En laet v niet verleyden

 

Uan die daer buyten der dueren passeert

 

Het zijn dieuen en moordenaers beyden

 

Spreect Christus soo hy ons leert.

 

 

 

Niemant en compt totten Uader ⁺

 

Dan door den soone Gods alleen

 

Hy bidt voor ons alle gader

 

Weest toch met Christum te vreen

 

Wilt vast op hem betrouwen

 

Hy is die verworpenen steen ⁺

 

Doet ghijt niet het sal v berouwen

 

Als ghy van hier sult scheen.

 

 

 

Prince Godt aensiet ons allende

 

Hier in dit eertsche dal

 

Wilt uwen gheest hier neder senden

+ Mat.v.

+ Luc.vi.

+ Lu.xxiij.

+ Mat.x.

+ Luc.xij.

+ Mat.x.

+ Io.xiij.

+ Ioan.x.

+ Io.xiiij.

+ Mat.xxi.

[fol. D5v]

 

Die ons vertroosten sal

 

Soo moeghen wy v die eer gheuen

 

Al inden hemelschen troon

 

Door Christum, hy is ons leuen

 

Wy verwachten van hem die croon.