Veelderhande schriftuerlijcke liedekens

23. Na die wijse. Met Venus strael ben ick ghewont.

BEminde kersten broeders goet
Wilt doch om hooren zijn gheneghen
Hoe datmen penitentie doet
En waerse in is gheleghen
Hoe der sonden aflaet wort vercreghen

De penitencie en is al niet
In veel wtwendighe saken
Met Madalena de sonden wtwiet ⁺
Duer bidden ende waken
Soo mach v dat rijcke Gods ghenaken.

Ghy vast dat v dat thooft daer af drayt
En wilt v sonden soo wtplanen
Op die v misdaen heeft blijft ghy mispaet
U schuldenaers gaet ghy manen

+ Luce.x.

[fol. D2v]

 

Ghy en weent niet dan gheueynsde tranen.

 

 

 

Het vasten is goet en oock oprecht

 

Men mach het vasten niet blameren

 

Maer ghy en hoort niet wat Christus secht

 

Diet vasten meest vseren

 

En van sonden niet en apstineren.

 

 

 

In vasten in suchten in weenen swaer

 

Badt Dauid met die Niniuiten ⁺

 

Maer quam duert gelooue wt liefden daer ⁺

 

Daer in leyt des gheest profiten

 

Christus en verhoort gheen ypocriten.

 

 

 

Hebt ghy eenich onrechtuaerdich goet

 

Willet vierdobbel weder keeren

 

Gheeft deen helft van v goeden metter spoet

 

Den armen ter Gods eeren ⁺

 

Soo Sacheus dede om duecht vermeeren.

 

 

 

Als ghy vast het gheene dat ghi verspaert

 

Willet Christus arme leden draghen

 

Die ligghen in benautheyt beswaert

 

Soo muecht ghy God behaghen

 

En heylich maken alle v vasten daghen.

 

 

 

Leyt in v huys te gaste voort

 

Den armen en wilt hem spijsen

 

U bedinghe wort voor God verhoort

 

Hy sal v vasten prijsen

 

U licht sal als de morghesterre rijsen.

 

 

 

Prince ghelijck ghy v leden gaeft

 

Ter sonden pijnt oock die te laten

 

Om doen met siele met lyue staeft

 

Wercken van charitaten

 

Sulcke penitentie sal v baten.

+ Regum.

+ Ion[a].

+ Luc.xix.