Veelderhande liedekens, gemaect uut den Ouden ende Nieuwen Testamente

[VVeest doch verblijt, alsnu in dit saysoen]

C Na de wijse: Weest toch verblijt, alsnu in dit saysoen, ghy geestkens amoreus.

VVeest doch verblijt, alsnu in dit saysoen
O Broeders met verstant
^‡De bloemkens spruyten, de vijgeboom staet groen
Met botten seer playsant
^*De wijnstocx bloeyen, dat Tortelduyfken ruyt
De Mey staet so schoon
Noyt ruecke so ydoon
Christus die roept met lieffelijck gheluyt
Coemt hier mijn Bruyt // tot my vuyt
Ontfangt nu uwe ^† croon

‡ Can. 2, 12

* Can. 2, 13 ende 7, 12.

† sap. 5, 17.
4. es. 2, 43
2. tim. 4, 8
1. pet. 5, 4.
Jaco. 1, 12.
Apo. 2, 10.

[fol. 351r]

 

^* De winter is leen, de reghen is vergaen

 

De Somer is op hant

 

Sathan vertreen, het ^† hantschrift wech ghedaen

 

Door Christum triumphant

 

De wet seer stranghe, ^‡ is nu veruult subijt

 

^*Wy zijn gheworden vry

 

Van de knechtsche slauerny

 

Loeft Godt met sange, en ^† zijnen naem belijt

 

Vromelijck strijt // talder tijt

 

Alle zijn knechten ghy.

 

Weet dat ^‡ de Mey, alsnu seer lustich staet

 

Broeders weest nu verblijt

 

Laet ons met lusten, prijsen ons ^* Aduocaet

 

Christus ghebenedijt

 

Voor zijn weldaden, en liefde minioot

 

Welck hy heeft tot ons ghehadt

 

En gaf ons desen schat

 

Doen hy van bouen daelde, wt zijns vaders schoot

 

Wt liefden groot // ^† De nacht is wech, nu schijnt de clare dach

 

Tis tijt om op te staen

 

Doen ick tot Babel in duysternisse lach

 

Mits sdoots banden gheuaen

 

Doen sach ick rijsen, een licht schoon ende claer

 

Dat louter woort Godts pleyn

 

Spranck als een claer fonteyn

 

Sijne voys luyde, ^* mijn volck gaet wt van haer

 

En volcht my naer // sonder vaer

 

^†Ick ben de waerheyt reyn.

 

^‡ Als ick aensach dat opghepronckte wijf

 

Sitten opt roode Beest

 

Ick worde (Owach) verschrict tot in mijn lijf

 

Verbaest in mijnen gheest

 

Voor een eerbaer maget, ia Dochter van Sion

 

So was sy my bekent

 

Mits dat ick was so blent

 

Siet, ^* hare naem is de Hoere van Babilon

 

Antechrist coen // en Mammon

* Can. 2, 11.

† Col. 2, 14.

‡ mat. 5, 17.

* Joan. 8, 32
Ro. 6, 18.
Gala. 5, 1.
1. pet. 2, 16

† mt. 10, 31
Luc. 12, 8.

‡ Can. 2, 12

* 1, ioan. 2, 1.

† mt. 27, 49
mar. 15, 37
luc. 23, 46

* Apo. 18, 4

† Joan. 14, 6

‡ apo. 17, 3

* Apo. 17, 5

[fol. 351v]

 

Waren daer oock present.

 

^* Wilt nu ontwaken, van uwe sonden groot

 

Ghy alle die daer slaept

 

Wilt nu verrijsen, staet op van den doot

 

Eer dat sy v betraept

 

^†Laet v doch helpen, wt dit boose gheslacht

 

^‡En volghet Christum naer

 

Hy sal v verlichten claer

 

^*Want die daer slapen, die slapen inder nacht

 

Onwis bedacht // tHelsche gracht

 

Dat wort haer erf hier naer.

 

Tis nu de Somer, also ick mercken can

 

Wt Godts woort onuerdraeyt

 

Laet liefde rijsen, ^† doet goet aen alle man

 

Want wat de mensche saeyt

 

Dat sal hy maeyen, tsy goet ofte quaet

 

Het leuen oft den doot

 

Sal daer van wassen bloot

 

^‡Vreest God eendrachtich, ghy edel Abrahams zaet

 

In elcken staet // houdet maet

 

Als ^* leden aen dat ^† Hoot.

 

^‡ Saeyt nu met weenen, hier in dit iammer dal

 

Met vruecht maeyt ghy hier naer

 

^*Wilt v vercleenen, ghy sult met Gods getal

 

Verheuen zijn eenpaer

 

^†Al uwe schouen, brengt ghy met vruechden dan

 

En ^‡ singt het nieuwe liet

 

V en sal gheen verdriet

 

^*Hongher oft dorst, oft noot meer comen an

 

Maer vlieden van // hierom can

 

Ick dat verswijghen niet.

 

Wast int ghelooue, en door de liefde bloeyt

 

In Goddelijcker aert

 

^†Als vruchtbaer rancken, seer suyuerlijck besnoeyt

 

Aen Christum den wijngaert

 

Brengt vele vruchten, ^‡ als goe bloomen bequaem

 

Gheplant aent water pleyn

 

By Christum claer fonteyn

 

In al v wercken, maect groot des Heeren naem

* Ro. 13, 11.
Eph. 5, 14

† Act. 2, 40.

‡ 1. pet. 2, 21

* 1. Tes. 5, 7

† Gal. 6, 12.

‡ eccle. 12, 11.
apo. 14, 7.

* Ro. 12, 5.
1. cor. 12, 27
Eph. 5, 30

† eph. 4, 15
Col. 1, 18.

‡ ps. 126, 5.

* pro, 29, 23
mat. 23, 11.
Luc. 14, 11. ende 18, 14.
1. pet. 5, 6.

† ps. 126, 6

‡ apo. 14, 3

* esa. 49, 10
Apo. 7, 16

† ioan. 15, 2.

‡ Psa. 1, 3.
Jere. 17, 8.
esec. 47, 12

[fol. 352r]

 

Vrienden eersaem // na tbetaem

 

^*Vreest hem van herten reyn.

 

Ontfangt van my, voor een hertelijc groet

 

Broeders dit cleyn ghedicht

 

Ick wensche dy, al Gods gauen soet

 

Och weest hier door ghesticht

 

Wilt voor my bidden, met sGheests hert en mont

 

Op dat ick swacke vat

 

Met v coem in sHemels stadt

 

Dits mijn begeren, en blijft doch vast gegront

 

Op Godts verbont // talder stont

 

Bewaert dat edel schat.

 

Vader v kinders, ^† Wijnstoc v rancxkens voet

 

^‡Herder v schaepkens weyt

 

^*Bruydegom v minders, bewaert voor tegenspoet

 

^†De wech en is niet breyt

 

^‡Hooft thoont v ^* leden, hulpe, troost en bystant

 

Op dat wy door v cracht

 

Wederstaen des Duyuels macht

 

En wilt ons leyden door uwe stercke hant

 

Int nieuwe lant // triumphant

 

Spijt al dit boos gheslacht.

 

Prince God vader, in dees bequame tijt

 

Seynt neder uwen Gheest

 

In ons te gader, als ^† Hooftman voor ons strijt

 

Want siet dit ^‡ roode Beest

 

Wilt ons vernielen, ^* sy schiet wt haren stroom

 

^†De Leeu soeckt nacht en dach

 

Wien hy verslinden mach

 

Bewaert ons sielen, dat wy dijn heylichdom

 

Behouden vroom // sonder schroom

 

O Heer hoort mijn gheclach.

* eccle. 12, 11.
4. es. 16, 68
Apo. 14, 7

† Joan. 15, 1

‡ ioan. 10, 11

* mat. 25, 1

† 4. es. 7, 7
mat. 7, 14
Luc. 13, 22

‡ eph. 4, 15
Col. 1, 18.

* Ro. 12, 5.
1. co. 12, 27.
Eph. 5, 30

† 4. Esdr. 16, 76.

‡ apo. 12, 8

* apo. 12, 20

† 1. pet. 5, 8