Veelderhande liedekens, gemaect uut den Ouden ende Nieuwen Testamente

[Ontwaeckt, springt wten slape]

C Na de wijse: Het Sweert is wter scheyden.

^‡ONtwaeckt, springt wten slape
Al die in sonden ligghen versmoort
En doet aen der Christen wapen
Op dat ghy Godts gramschap ghestoort
Moecht ontvlien, en ontfangen confoort
En dat eeuwich Rijck ghepresen
^*Die ghetrou sal wesen totter doot
Diens sal de croone wesen.
^† Hierom sondaers wilt afkeeren
Van uwe boose weghen quaet
Ende soecken Godt den Heere
So suldy zijn versaet
Hy sal wesen v toeuerlaet
En v lijden al ghenesen
^‡Die ghetrou sal wesen totter doot
Diens sal de croone wesen.
^* Laet ons den Heere gaen volghen
Want hy is ons voorghegaen
Al is Sathan op ons verbolghen
Als wy vast op Christum staen
Ende hem oock niet af en gaen
So doruen wy niemant vresen
^†Die ghetrou sal wesen totter doot
Diens sal de croone wesen.
^‡ Die op den Heere betrouwen
Die sullen vast blijuen staen

‡ Ro. 13, 11.
eph. 5, 14.

* Apo. 2, 10

† Esa. 55, 7
Ese. 18, 27 ende 33, 11.
Tob. 13, 8
Jaco. 4, 8

‡ Apo. 2, 10

* mat. 16, 24
mar. 8, 34
Luc. 9, 23.

† Apo. 2, 10

‡ psa. 125, 1.
pro. 10, 30

[fol. 248v]

 

En van zijn woort niet verflouwen

 

Door lijden en door versmaen

 

Want sy de cracht van hem ontfaen

 

En zijn licht is in haer gheresen

 

^†Die ghetrou sal wesen totter doot

 

Diens sal de croone wesen.

 

^‡ Hoe soet is (O Heere) v woort

 

Die oprecht van herten zijn

 

Meer dan honich gheuet confoort

 

De sielen der armen dijn

 

^*Doet Syon wel op dit termijn

 

Wilt haer van sonden ghenesen

 

^†Die ghetrou sal wesen totter doot

 

Diens sal de croone wesen.

 

^‡ Wel de ghene die setten

 

Haer hope al op den Heer

 

En haer niet en besmetten

 

Met eenighe valsche leer

 

Maer gheuen alleen lof en eer

 

Godt den Heere ghepresen

 

^˜Die ghetrou sal wesen totter doot

 

Diens sal de croone wesen.

 

^* Tis een salighe Offerhande

 

Gods Gheboden te mercken aen

 

^†En wech te gaen van alderhande

 

Ongherechticheden saen

 

Dat sal den Heer seer wel aenstaen

 

Dat wy tquaet laten in desen

 

^‡Die ghetrou sal wesen totter doot

 

Diens sal de croone wesen.

 

O Princelijcke Vader

 

O ^* Heere der Heeren groot

 

^†Sterct ons Gheloof allegader

 

Die v van herten soecken bloot

 

De werelt doet ons menigen noot

 

Om dat wy v woort volgen en lesen

 

^‡Die ghetrou sal wesen totter doot

 

Diens sal de croone wesen.

† Apo. 2. 10/

‡ Psa. 19, 11 ende 119, 103
Esec. 2, 13.

* Psa. 51, 20

† Apo. 2, 10.

‡ Psal. 2, 12. ende 40, 5.
Jere. 17, 7

˜ Apo. 2, 10.

* .eccli. 35, 10

† Esa. 52, 11.
2. cor. 6, 17
apo. 18, 4.

‡ Apo. 2, 10

* 1. tim. 6, 15
apo. 17, 14 ende 19, 16.

† Luc. 17, 5

‡ Apo. 2, 10.