Veelderhande liedekens, gemaect uut den Ouden ende Nieuwen Testamente

[Ick ben seer bedroeft int herte mijn]

C Nae de wijse: Den lustelijcken Mey Christus playsant.

ICk ben seer bedroeft int herte mijn
Dat de woluen dus fellijck gapen
En dat hier also weynich Herderen zijn
Ouer al dees arme schapen
^*Elck gaet dolen zijnder straet
De sommighe heel desolaet
^†Sy wandelen ghelijck de blinden
Sy en connen gheen weyde vinden.

Och broeders laet ons doen na Christus raet

So hy zijn discipelen ghinck leeren
Ghelijck Luce int thiende gheschreuen staet
Laet ons doch van herten verneeren
En bidden onsen getrouwen Vader seer
Door Jesum Christum onsen Heer
^‡Dat hy ons sende ghetrouwe dienaren
Die ons zijnen wille verclaren.

En bedroeft v niet ghy schaepkens al

Weest bloeyende in Christus gaerden
Leeft vrolijck na der tijt, ouer berch en dal
^*Als Pelgrims op deser aerden
^†Bereyt v lampen ionck ende out
Eer ghy inder liefden vercout
Vwen Bruydegom die sal haest comen
Ontfanghen al de vromen.
^‡ Slaet vroomlijc tegen de Midianiten boos
Blaest ouerluyt v trompetten
Met Gideon hout v cloeck altoos
V aerden vaten wilt verpletten
Sijt ghy met Moysen in de woestijn

* ps. 119, 177
Esa. 53, 9.
1. pet. 2, 27

† Ese. 34 *

‡ mat. 9, 38.
Luc. 10, 2.

* Ge. 47, 9.
1. pa. 30, 15
4. es. 16, 41
1. Pet. 2, 11
Heb. 11, 13

† mat. 25, 7

‡ iudic. 7, *

[fol. 148r]

 

Als ghetrouwe Israelijten fijn

 

^*Wilt Dathan en Abiron niet aenhangen

 

Oft ghy sult met haer verganghen.

 

Thoont nu dat ghy zijt ghetrou int velt

 

^†Met Josua en Caleb eersame

 

Die wt ses hondert duysent waren ghetelt

 

^‡Als sy wt Egipten quamen

 

Sy waren tot allen tijden bereyt

 

Door dat ghelooue en ghehoorsaemheyt

 

Gods gheboden niet te verlaten

 

Daerom sy de landen besaten.

 

In volstandicheyt blijft ghy broeders altijt

 

Wilt niet weder na Egipten keeren

 

Al die door tghelooue ghehoorsaem zijt

 

^*Wie soude v moghen deeren

 

^†Ist dat ghy v na vrede keert

 

So ons de Schriftuere leert

 

Eendrachtich in vreden oorconden

 

So wordy Borghers Jerusalems beuonden.

 

Aenschout uwen Bruydegom de gherechte spruyt

 

En wilt v na gheen ander paren

 

Hy heeft ons ghenomen tot zijnder Bruyt

 

^‡Doen wy noch sondaren waren

 

Wy waren onuruchtbaer eensaem

 

Door Christum werden wy bequaem

 

^*Al die zijn woort ontfinghen ghepresen

 

Gaf hy de macht zijn kinderen te wesen.

 

Coemt nu doch broeders, aenschout ghewis

 

Ons ^† Jerusalem hier bouen verheuen

 

Die daer alleen onse Baermoeder is

 

Als Galaten vier staet gheschreuen

 

Dese selfde is vry alleen

 

Met haren kinderen ghemeen

 

Want sy door de Belofte zijn gheboren

 

Van Sarai, so ghy moecht hooren.

 

Ontfanghen hebben wy de Belofte ient

 

Door den gheestelijcken Isaac vol trouwen

 

Dese heeft Jerusalem int nieuwe Testament

 

Door Jacob zijnen soon gaen bouwen

* Nu. 16, *

† Nu. 14, 24

‡ Exo. 12, 33

*

† heb. 12, 14

‡ Rom. 5, 6

* Joan. 4, 12

† Gal. 4, 26
Apo. 21, 2.

[fol. 148v]

 

Jacob heeft ghegenereert

 

De ^* twelf Patriarcken gheeert

 

^†Dese twelf poorten seer schoone

 

Stelt ons Apocalipsis ten thoone.

 

Peynst op tverstant, ghy Christenen hoort

 

Dits Israel haer vrije steden

 

Elck gheslacht heeft een open poort

 

Om in tnieuwe Jerusalem te treden

 

Christus onse Bruydegom playsant

 

^‡Nam Israel yerst byder hant

 

Hy heeft oock ^* wtghesonden zijn knapen

 

Eerst tot de verloren schapen.

 

Siet aen Jerusalem, en te recht aenschout

 

Haer twelf fondamenten openbare

 

Dese zijn alleen op Christum ghebout

 

Sijn discipelen, hoort mijn verclaren

 

Dese hebben vercondicht het Lam

 

^†Die onse sonden afnam

 

Hoe souden wy hem moghen vergheten

 

Hy is midden in Jerusalem gheseten.

 

Sion O schoone dochter Israel

 

^‡Ghy die versaemt zijt wt alle gheslachten

 

Niet alleen nae den vleesch, verstatet wel

 

Dan door des ghelooues crachten

 

^*Onsen gheestelijcken Abraham ghewis

 

Die een Vader van veel Heydenen is

 

Al die hy hadde voorsien te vooren

 

Die heeft hy oock wtvercooren.

 

O lieffelijcke Bruyt, O schoone stem

 

^†O Borghers van deser steden

 

^‡O lieffelijcke dochter Jerusalem

 

Leeft nu altijt in vreden

 

Dese stadt is van Christo ghesticht

 

^*Het Lam alleen is die ons verlicht

 

^†Verblijt v ghy onuruchtbaren

 

In dese laetste iaren.

 

Sijt eendrachtich ghy Christelijck graen

 

Wilt sonder besmettinghe leuen

 

Want gheen ^‡ onreyne moghen daer in gaen

* Gen. 35, 22
1. Par. 2, 1

† apo. 21, 21

‡ Jere. 31, *

* mat. 10, 5
Luc. 9, 2.

† Joan. 1, 29.

‡ Apo. 7, 3.

* Ro. 4, 24

† Eph. 2, 11.

‡ ps. 45, 11

* apo. 21, 23.

† esa. 54, 1.

‡ apo. 21, 27

[fol. 149r]

 

Noch die haer tot lueghenen gheuen

 

^*Buyten zijn de honden en Toouenaers quaet

 

Hoereerders en dootslagers opstinaet

 

Oock die Afgodery en lueghens beminnen

 

Och vrienden wilt dit wel versinnen.

 

Neemt exempel aen ons eewich Prince net

 

Eenen ^† Vorst des vreden by namen

 

Als ^‡ een Prince der Princen is hy gheset

 

Ouer die in vreden zijn te samen

 

Daer aen bekentmen zijn volck, hoort

 

^*Dat sy eendrachtich in liefden gaen voort

 

O Heer bewaert v Ghemeynte

 

In oprechter liefde reyne.

* 1. cor. 6, 10
Gal. 5, 21.
Ephe. 5, 5
apo. 22, 15.

† Esai. 9, 5.

‡ 1. ti. 6, 15.
apo. 17, 14 ende 19, 16.

* Joan. 1, 35