Veelderhande liedekens, gemaect uut den Ouden ende Nieuwen Testamente

[Hoort vriendekens ghepresen]

C Na de wijse: Daer ick gister auont quam, Daer scheen de maen so claer.

HOort vriendekens ghepresen
Ick schencke v een nieu Liet
Ghy die daer zijt ghenesen

[fol. 141v]

 

Van dat eeuwich verdriet

 

Leeft nu in sonden niet

 

^*Want sy worden begrauen

 

In de doot Christi siet

 

Door tDoopsel alst gheschiet

 

So Paulus bediet.

 

Ghelijck als hem zijn Vader

 

Heeft vander doot verweckt

 

So moeten wy allegader

 

Verrijsen oock correckt

 

So de Apostel spreeckt

 

^†In een nieu leuen wandelen

 

Het vleesch aen tcruys ghestreckt

 

Een yeghelijck hem breeckt

 

Van tquaet dat in hem steeckt.

 

Laet ons strijden als cloecken

 

Tot allen tijden snel

 

De mont Godts heeft ghesproecken

 

^‡Dat des menschen opstel

 

Sijns hertsens vatet wel

 

Boos is van zijn ionckheyt op

 

Och Vrienden hoe rebel

 

Is ons natuers ghequel

 

Och siet op Godts beuel.

 

Daer moeten wy na leuen

 

Elck neme hem seluen waer

 

Wy die ons hebben begheuen

 

^*Te volghen Christum naer

 

^†Ghehoorsaem totter doot des cruys

 

Dat blijckt int openbaer

 

Dus laet ons allegaer

 

Sien op de Schrift eenpaer.

 

Sy en sal ons niet bedrieghen

 

Daer is wel op te staen

 

Ons eyghen vernuft mach lieghen

 

Wy en hebben so vele niet aen

 

Wt ons seluen, wilt verstaen

 

^‡Als yet wat goets te dencken

* Rom. 6, 4

† Rom. 6, 4
Eph. 4, 23
Col. 3, 10.

‡ Gen. 6, 5. ende 8, 21.

* mat. 16, 24
mar. 8, 34
Luc. 9, 23.

† phil. 2, 8.

‡ 1. Cor. 3, 5.

[fol. 142r]

 

Na Paulus vermaen

 

De Gheest Godts moet ons raen

 

Oft wy missen de baen.

 

Dus laet ons wel vseren

 

De Schrift op dit termijn

 

Ende niet disputeren

 

Maer Godts nauolghers zijn ^*

 

Als lieue kinderen fijn

 

Weest oprecht inder liefden ^†

 

Doorsoeckt dat herte dijn

 

Daer ghelt gheen schoonen schijn

 

Alst binnen is fenijn

 

Godt die heeft ons geropen ^‡

 

In vreden al ghemeyn

 

Eenen camp te loopen ^*

 

Door ghehoorsaemheyt pleyn

 

Siet doch op Christum reyn

 

Desen Herder wilt nauolghen ^†

 

Sijn stemme hoort alleyn

 

Sijn schaepkens kennen geyn

 

Vreemde stemmen certeyn.

 

Sijn schaepkens wtuercoren

 

Die hebben sulcken aert

 

Sijn stem altijt te hooren

 

Hoort wat de Schrift verclaert

 

Godt heeft een volck vergaert

 

Dat moet zijn inde werelt een licht ^‡

 

Daertoe heeft hyse ghebaert

 

Souden die dan een paert

 

Lichtueerdich zijn, wat waert.

 

Oorlof mijn lieue vrunden

 

Ick groet v waer ghy zijt

 

Laet ons doch de sunden ^*

 

Schouwen met groter vlijt

 

Of de Heere quaem subijt

 

Blijft in de vijheyt staende ^†

 

Daer v mede heeft beurijt

 

Christus ghebenedijt

 

Sijn stemme hoort altijt. ^‡

* Ephe. 5, 1.

† Eph. 4, 15

‡ 1. cor. 7, 15.

* Heb. 12, 1.

† Joan. 10, 4

‡ mat. 5, 16.
phili. 2, 15.
1. pet. 2, 12.

* eccli. 18, 30 ende 21, 2.

† Gala. 5, 1.

‡ Joan. 10, 3

[fol. 142v]