Veelderhande liedekens, gemaect uut den Ouden ende Nieuwen Testamente

[Hoort al te gaer // int openbaer]

C Na de wijse: Adieu schoon Janneken.

HOort al te gaer // int openbaer
Na Christus woort, en volcht hem naer
Elck dat bewaer // gheseyt int claer
Strijt vromelijck al sonder vaer
Want Christus spreeckt int openbaer
^‡Ick ben de duere die open staet
By mijnen Vaer // een Middelaer
^*Coemt al tot desen Aduocaet.
^† Sydy beladen // wilt v beraden
Met Christo, want hy is goedertier
Hy sal v versaden // en niet versmaden
Als ghy begheert van hem ghenade schier
Ghelijck hy met bermherticheyt hier
^‡Vergaf den moordenaer al zijn misdaet
Hy staet elck in staden // vol ghenaden
^*Coemt al tot desen Aduocaet.
^† Magdalena vol rouwen // wilt dit onthouwen
Ootmoedelijck is sy tot Christum ghegaen
Met vast betrouwen // sonder verflouwen
Sijn voeten wasschende met menighen traen
Seer neerstich met haren hayr te dwaen
Dies sy daer wiesch dat goddelijcke zaet
Haer wert ontbonden // den last van sonden
^‡Coemt al tot desen Aduocaet.

Geen ander afgoden // na menschen geboden

^*En heeft dat vrouken van Cananeen begeert
Maer is geuloden // tot den Coninc der Joden
Volherdich voor Christum den Heere weert
O Heere ghy weet wel wat my deert
Mijn dochter is beseten vanden viant quaet

‡ Joan. 10, 9.

* 1. Joan. 2, 1.

† mt. 11, 28

‡ Luc. 23, 42

* 1. Joan. 2, 1.

† luc. 7, 44.

‡ 1. Joan. 2, 1.

* mat. 15, 22
mar. 7, 25.

[fol. 116r]

 

Hy was haer gedachtich // door tgelooue crachtich

 

^†Coemt al tot desen Aduocaet.

 

Wilt dit versinnen // die wil ghewinnen

 

Godts eeuwich Rijcke seer excellent

 

Wilt duecht beginnen // Christum beminnen

 

Wt gantscher herten diligent

 

Al en hebdy gout, noch gheen paeyment

 

Coemt ^‡coopt om nz, spreect de Heere verstaet

 

Gheen ander hoecken // en wilt versoecken

 

^*Coemt al tot desen Aduocaet.

 

Elck wil ontknoopen // zijn sondige hoopen

 

Voor Christum, hy sal v wel ontlaen

 

Waer wildy loopen // oft elders coopen

 

Als Christus v begheert te ontfaen

 

Hy spreeckt ^† coemt alle die daer zijt belaen

 

Mattheus int elfste dat gheschreuen staet

 

Wilt van hem niet scheyden // ^‡ laet v niet verleyden

 

^*Coemt al tot desen Aduocaet.

 

^† Hy is de wech verheuen // waerheyt en leuen

 

^‡Hy is der schapen rechte duer

 

Hy heeft zijn leuen // voor haer ghegheuen

 

Ghegaen is hy, als een goet Herder vuer

 

^*Hy heeft ghebroken den stercken muer

 

Tusschen ons en den helschen viant quaet

 

Dus alle ghemeene // groot ende cleene

 

^†Coemt al tot desen Aduocaet.

† 1. Joan. 2, 2

‡ Esa. 55, 1.

* 1. Joan. 2, 1.

† mat. 11, 28

‡ Eph. 5, 6.
2. Tes. 2, 2.

* 1. ioan. 2, 1

† ioan. 14, 6

‡ ioan. 10, 9.

* Col. 2, 14

† 1. Joan. 2, 1.