Veelderhande liedekens, gemaect uut den Ouden ende Nieuwen Testamente

[Een nieu liet wil ick heffen aen]

C Na de wijse: Daer is een coude sneeu.

[fol. 74v]

 

EEn nieu liet wil ick heffen aen

 

Te slagen wt Godes woort

 

Daer in wil ick v doen verstaen

 

^*Al van de nieuwe gheboort

 

^†Van valsche Leeraers voort.

 

^‡ God ginck den mensch eerst maken

 

Al na zijn eygen beelt

 

^*Dit quam de viant laken

 

Hy heeft zijn luegen gheteelt

 

Besiet hoe veel nu scheelt.

 

^† Den mensch die is verdoruen

 

Al door des Duyuels raet

 

^‡Gods Beelt dat is ghestoruen

 

^*Hy is genegen tot quaet

 

Dat bewijst hy metter daet.

 

^† Ghy moet v omme deeren

 

Als Christus spreect seer plaen

 

Als een cleyn kint verneeren

 

Dat gheen quaet en heeft gedaen

 

Wilt ghy int leuen gaen.

 

Noch spreect Christus, wilt hooren

 

Joannis drye voorwaer

 

^‡Ghy moet nieus zijn gheboren

 

Wt den Water en Gheest seer claer

 

Dit valt het vlees seer swaer.

 

Hierom ghy menschen allen

 

Jonck, oudt, arm ende rijck

 

Laet uwen hoomoet vallen

 

Met alle v valsche practijck

 

Het ghelt v siel ghelijck.

 

Verlaet v niet om de namen

 

Om dat ghy Christenen hiet

 

Want ghy moecht v wel schamen

 

Ist dat ghy volbrenget niet

 

Dat v Christus ghebiet.

 

Ghy moecht v oock niet beroemen

 

Van Christus doot en bloet

 

Want hy sal v verdoemen

 

Ist dat ghy v niet en spoet

* Joan. 3, 3.

† 2. pet. 2, 1

‡ Gen. 2, 7
Sap. 2, 23

* Gen. 3, 1.

† Sap. 3, 23

‡ eph. 4, 19.

* Gen. 6, 5

† Mat. 18, 3

‡ Joan. 3, 5.

[fol. 75r]

 

^*Te doen oprechte boet.

 

Bekeert v tot deser vren

 

Al na Schriftuers vermaen

 

^†Wort nieuwe Creatueren

 

Want het oude moet vergaen

 

Als Paulus doet verstaen.

 

Oock doet Christus een lesse

 

Lucas int vijfde seer fijn

 

^‡Datmen in doude flesse

 

Niet sal doen den nieuwen wijn

 

Hier baet gheen heylich schijn.

 

Noch doet Christus daer leeren

 

Met lieffelijcke woorden soet

 

Datmen ^* op oude cleeren

 

Gheenen nieuwen lap en doet

 

Want het schuert wt met spoet.

 

^† Dus laet v gheen cussens leggen

 

Onder v armen fris

 

Van die v den vrede toeseggen

 

Als daer noch gheen vreed en is

 

Sy bedriegen v ghewis.

 

^‡ Tzijn al valsche Propheten

 

Dienaers van Jesabel

 

Die van haer tafel eten

 

^*Wilt, onsedich en rebel

 

^†Tblijcket aen haer vruchten wel.

 

Wilt ghyse kennen leeren

 

^‡Tzijn blinde leyders quaet

 

Sy soecken int studeeren

 

^*Niet dan hare eygen baet

 

Al door vernufte praet.

 

Och hout my dit ten goeden

 

Dat ick hier heb ghedicht

 

Wilt v tot duechden spoeden

 

^†Om te wandelen int licht

 

Al met een claer ghesicht.

 

O Prince der princen verheuen

 

Ontfermt v dit gheslacht

 

Wilt haer v gracy geuen

* Mat. 3, 2. ende 4, 17.
Mar. 1, 15
Luc. 3, 3.

† 2. Corin. 5, 17.
Gal. 6, 17.

‡ mat. 9, 17.
Luc. 5, 37.

* Mat. 9, 16
Luc. 5, 36.

† Eze. 13, 19

‡ 3. re. 18, 19.
Mat. 7, 15

* 2. Tim. 3, 3

† mat. 7, 15

‡ mat. 15, 14

* Ro. 16, 17
Phili. 2, 21

† Ephe. 5, 9

[fol. 75v]

 

Dat bid ick wt alle mijn cracht

 

By daghe en oock by nacht.