Veelderhande liedekens, gemaect uut den Ouden ende Nieuwen Testamente

§ Na de wijse: Ten is niet lange geleden, dat ick ginck by nachte.

EN wilt my niet beschamen
Ick wil v een Liet ramen
Ghy menschen al te samen
Dat wil ick v gaen singhen
Wie leeft daer na tbetamen
Als wy met Schrift voort quamen
Sy voeren gheen quaey famen
Al die haer vleesch bedwinghen
^† De Werelt en de Heer
Die zijn verscheyden seer
O mensch neemt eenen keer
Leest dApostelsche leer
Die sal v claerlijck tooghen
Hoe dat ghy v moet pooghen
Daerom so hout v ooghen
Op de sonde, en niet op schand oft eer.

Keert ghy v af van sonden
So en wort ghy beuonden
Beschaemt, tot gheenen stonden
O mensch wilt hier op achten
Wilt ^‡ de Schriftuer doorgronden
En leeft niet als de honden
^* Christus heeft met zijn wonden
Gheheelt alle gheslachten
Wie na zijn woorden doet
Door het ghelooue soet
Sal worden metter spoet

† mat.6,24 1.ioan.2,16 Iac.4,4.

‡ Ioan.5,39.

* Esa.53,8. 1.pet.2,14

[fol. 58v]

 

Deelachtich Christus bloet

 

Och oft wy hier op saghen

 

^* Men mach Godt niet behaghen

 

Nu noch tot gheenen daghen

 

Sonder geloof, menschen zijt des wel vroet.

 

 

 

Wilt v van sonden keeren

 

So sal tgheloof vermeeren

 

^† Want op de oude cleeren

 

Setmen gheen nieuwe lappen

 

Wilt neerstelijck studeren

 

Want dat is zijn begheeren

 

Dus vermaent Christus leeren

 

^‡ Ghelooft niet yeghelijcx clappen

 

^* Wijsheyt is ver van dien

 

Die noch na boosheyt sien

 

Maer die de sonden mien

 

Haer lusten willen vlien

 

^† Die haer tot goet doen gheuen

 

Al wat sy oyt bedreuen

 

In haer sondighe leuen

 

Daer en sal gheen wraeck meer af gheschien.

 

 

 

Oft dit bedocht dees nacy

 

^‡ Tis nu een tijt van gracy

 

Maer na desen eylacy

 

En sal daer zijn gheen ander

 

Noch oock gheen excusacy

 

Verstaet dees informacy

 

^* De boose generacy

 

Sal lijden met malcander

 

Den tijt van haer ellent

 

Sal wesen sonder ent

 

Gods wtuercoren ient

 

^† Gaen in des Hemels tent

 

Sy sullen vrolijck singhen

 

Als ^‡ mestcalueren springhen

 

Bedenckt doch dese dinghen

 

Neemt eenen keer, en v van sonden went.

 

 

 

Wilt ghy zijn Gods vercoren

 

So ^* wort van nieus gheboren

* Heb.11,6.

† mat.9,16. Mar.2,21

‡ 1.ioan.4,1.

* Eccli.15,12.

† Iere.18,7 Eze.18,21

‡ 2.Cor.6,2 Apo.10,6

* esa.66,24 mat.13,41 mar.9,47 apo.14,11

† mt.25,34

‡ Mal.4,2

* Ioan.3,3.

[fol. 59r]

 

Oft ghy sult so wy hooren

 

Int Rijcke Gods niet comen

 

En leeft niet als te vooren

 

^† Legt af haet, nijt en tooren

 

Doet goet oft tis verlooren

 

Want ^‡ al onuruchtbaer boomen

 

Salmen af houwen claer

 

En int vier worpen haer

 

Al achtmen dit niet swaer

 

Gods woorden die zijn waer

 

Dus wilt van tquaet af laten

 

Gheeft v tot charitaten

 

Tis niet te doen met praten

 

^* Laet v licht lichten vry int openbaer.

 

 

 

Oorlof hier me van desen

 

Ghelijck Gods Soon ghepresen

 

^† Is vander doot verresen

 

Verwect van zijnen Vader

 

In een sterck perfect wesen

 

So moeten die Godt vresen

 

Oock mede soo wy lesen

 

Verrijsen alle gader

 

Wy moeten me opstaen

 

In een nieu leuen gaen

 

So Paulus doet vermaen

 

Laet ons daer acht op slaen

 

So zijn wy ^‡ niet meer dooden

 

Maer ^* hemelsche ghenooden

 

Als wy na Godts gheboden

 

Wandelen, so ons de schrift doet vermaen.

† Colo.3,8. 1.Pet.2,1

‡ mat.3,10 ende 7,19. Luc.3,9.

* mat.5,16.

† mat.28,6. Ro.6,4.

‡ Ioan.5,21, ende 25. Eph.5,14

* eph.2,18.