Veelderhande liedekens, gemaect uut den Ouden ende Nieuwen Testamente

Voorreden. Totten Sangher.

HIer hebt ghy, lieue Sangher, sommighe Liedekens, die tot Gods eere ende lof ghemaeckt, ende by den anderen vergadert zijn, so siet wel toe, dat ghyse oock tot den prijse Godts ghebruyckt, niet in ydelheyt, oft om den menschen te behaghen, maer ghelijck de kinderen van Israel, doense Godt van der hant Pharaonis verlost hadde, doen hebben sy den Heere gheloeft, ende groot ghemaeckt, ende seyden: ^* Ick wil den Heere singhen, want hy heeft heerlijcken gedaen, Ros ende wagen heeft hy omgeworpen in de zee: Ende als ons de Heere oock verlost heeft wt het ghewelt des Duyuels, ende wy in Christum recht gheloouen, so mogen wy dan oock wel singhen, louen ende dancken den Heere van zijne groote weldaden, die hy ons bewesen heeft, alser gheschreuen staet: ^† Singt louelijck, ende loeft den Heere in alle zijne wercken, prijst zijnen naem heerlijck, danckt ende loeft hem met sanghe. Als Paulus ooc verhaelt, ^‡ daerom soo laet ons nu door hem offeren de offerhande des lofs Gode altijt, dat is de vrucht der lippen, der gheender die zijnen Naem bekennen. Noch seyt Paulus: ^* Spreeckt met malcanderen van Psalmen ende Lofsanghen, ende geestelijcke Liedekens, singt ende speelt den Heere in uwer herten. Also ist den Heere aenghenaem, alst wt een gheloouich herte coemt, maer anders niet. Want daer staet gheschreuen: ^† Den lof en is niet schoon in des sondaers mont, want hy en is hem van den Heere niet gesonden. Dus

* Exod.15,1 ende 21.

† Eccli.40,4

‡ Heb.13,15

* Eph.5,19

† eccli.15,10

[fol. 2v]

elck sie wel toe, ende neme hemseluen waer, op dat hy mach op den berch Sions singen ^‡ dat nieuwe Liedt met alle wtuercoren Gods, ende met haer mach verblijden van eeuwicheit tot eeuwicheyt, Amen.

‡ Apo.14,3