Veelderhande geneuchlijcke dichten, tafelspelen ende refereynen
(1977)–Anoniem Veelderhande geneuchlijcke dichten–
Auteursrechtelijk beschermd
[pagina 169]
| |
Daghelijcx meer drinckende dan een os of en stier, ziet,
Over al lopende als eenen die dol, is
Nemmermeer rustende dan alst gat vol, is,
Sluys- wachter van Lowijc, Mont Graef van Hoeper-hout
Heer van onsen naem ouer den Koephout,
Devic-lecker van Tonnenburg, van Lectap Suyp-uyt
Proost van Kruyckenburgh, ende van canduyt,
Kannedragher van Natveldt, een Biersteecker
Ende t'sauonts een droncken eersgat seecker,
Van allen Laeghnoots Commanduer
Hy hout dat varsche bier wt dat suer,
Prelaet, ende heer van Monnickedam
Van alle dronckaerts de rechte stam,
Marcmande van alle ydel Vleesch-bancken
Nachtrauen van t'Gootgat die daer voor jancken,
Van Gulpenburch een Marckgraue
Biervliet van Paesschen tot sinte Bave,
Den buyck drinckende euen stijf
Eenen grooten Spongie hebbende int lijf,
Oft wy luttel drincken oft veel
| |
[pagina 170]
| |
Altoos isser brant in onse keel,
De Gift houdende nauwe te ra
Ghegheten kruymen lect cetera.
Om nu te besluyten met corte woorden
Alle de statuten van onser Oorden,
Ende niemant en sal onse statuten lesen
Oft zy moeten vander Gilde wesen,
Alle die dat Bier door haer keele laten lopen
Gheuen vry aflaet met groote hoopen,
Soo wie hier tapt, ende drayt de kraen om
Heeft veertich iaer aflaets quotidianum,
Ende die smorghens eerst drincken bestaet
Oock een ander daer toe brengt ende raet,
Alle die drincken sonder eeten beghinnen
Salmen in onse Convent aldermeest beminnen,
Veertich daghen aflaets staet daer toe
Alle die teughen drinckt ghelijck een Koe,
Ende die slapen gaen sonder ontkleeden
Haer aflaet dubbelt wy verbreden,
Ende die meer drincken dan sy eeten
Die houden wy voor onse Propheten,
Luttel woorden, ende die vast
Maer altijt na die kanne tast,
Liever inde Taveernen loopt
| |
[pagina 171]
| |
Eer ghy een nastelingh in v Bocxsen coopt,
Blijft de Kanne altijt ghetrouwe
Soo mach het v int eynde berouwe,
Hout Kannen, ende kruycken eeuen schoon
Soo en sullen v niet bijten de Vloon,
Groote teughen drinckt dat v de ooghen puylen
Soo en sal v maghe niet vervuylen
Wacht v wel int broot te bijten
Soo suldy meer pissen dan schijten,
Leert nuchteren rispen, spouwen, ende quylen
Nae den Coning van Engelant schiet vry pijlen,
Sonderlinghe als ghy Hutspot etet
Spouwet dan vry dat ghy zweetet,
Spouwt Leuer, ende Long als goede ghesellen
Maer levert den Abt altijt zijn vellen,
Een Fundament maeckt smorghens vro
Wildy tsauonts slapen int stro,
Sonder vechten, ende sonder kijven
Voor alle werck so moet ghy blijuen:
Oft ghy soude eten water en broot
Inden Kercker kleyn, en groot,
Sonder vechten, maer wat ongalijck
Hout onse Oorden principalijck,
Ende wie de kanne eerst wt leckt tans
| |
[pagina 172]
| |
Sal wesen Primus Abbas expectans,
Soo sijn onse schoone statuyten
Van onse broeders binnen en buyten,
Hier in en weest in gheen ghebreke
Maer drinckt vry droncken een helen weecke,
Soo dat ghy van Deus noch Meus en weet
Indien ghy anders doet het is ons leet.
Hy moet oock quetsen beyde sijn schenen
Ende ghaen t'huys met twee stroo beenen,
Hy moet hem voeghen nae desen woorden allen
Ende dan noch twee blaeuwe ooghen vallen,
In onser Cappellen staet dit beschreuen
By den Abt van Amfra verheuen
Voor wien dat beuen alle bier-tonnen ziet
Ter tijt alsmen een smacht op de rooster briedt,
Hier hebben gheweest by, ende overs
Poffers, Blasers, ende kante klouers,
Biersacx, Smeerlacx, ende t' heel gheprol
Goutsche Kuyte, Hoppe, ende knol,
Ende ander die ick niet noemen en wil
Beschijt v broeck, ende zwijgt al stil,
Beseghelt den brief met gheel was
Hout nemmermeer ghelt in uwen tas,
| |
[pagina 173]
| |
Onder-teyckent met onsen hant teycken
V Bedde dat moet ghy wel besaycken,
Duysent vijf hondert int iaer ons Heeren
Alle v ghelt moet ghy verteeren,
Ende wort ghy dan van t'volck verschouen
Int huysken met dat kruysken verteert dan v proven.
Finis.
|
|