De Tsjerne. Jaargang 23

[p. 365]

[Nummer 10]

Brief oan Durk

De ‘coup’ hat west. Boppe de Wâlden bigjinne de krûtdampen stadich op to lûken. De rekken fan Bonnema silst ûnderwilens wol krige ha. Oer in pear dagen hast in keardel oan 'e doar om it saekje oer to nimmen. Dan is it dien. Dou rjochtest dyn keamer hwat oars yn. En acht jier tsjernje bin foarby. Bring dyn klean nochris nei de stomer. Op rekken fan J.M. Oars bliuwt dy rânzige lucht to lang yn dyn hûs hingjen. Hwerom soest dêr troch forsuorje? Dou hast de wille der fan hawn. Forjit it fierders.

Is it dy ôffallen, dy sneon? Oer it generael bisjoen? Dou bist nochter genôch om yn to sjen dat wy it ússels oandien ha. Willemoeds ha wy it risiko yn ús útnoeging foar dy gearkomste fan 5 oktober ynboud. Better as ik hastou witten dat ‘de fuzy’ op it aljemint komme soe. Sels hast dy kou út 'e sleat helje wold. Dat oaren dy byspringe soene om it kerwei mei sa'n gong op to rêdden datst sels oare kant de dyk yn 'e reiden kwakke soest, hast grif ûnder eagen sjoen.

Dou hast der foar bitanke. De Tsjerne wie dy to djûr. Dou leaudest sa bot net yn de takomst mei dat nije biwâld. Dat is dyn rjocht. Oaren hawwe it ûnheil al earder oansein. Mar hwat soe 't? De Tsjerne hat de trijeëntweintich jier hast fol. Dat is forrekte âld. Nim ris oan dat it aenst b.g. Medium hjit. Dan is in stik histoary bidobbe. Alhoe dierber ek. Mar it giet langer om in tydskrift. En kinne oaren dat net better as wy? En net like goed as ús foargongers? Miskien ha wy de saek forsearre. Mar wy ha ommers doelbiwust keazen foar dit aventûr. Dou hiest ek net fierder gean wollen yn dit klimaet fan stomme rankunes en lytse strideraesjes.

Miskien tink ik der to licht oer, neffens dy. It is mar literatuer, jong. En dat is sa fordomd bilangryk. Dat, goed genôch wurdt it dochs net. Ik stie ek mei ien poat yn it waei, al haw ik de bûter dan net mei makke. Mar hoe koe ik de fuzy-affaire as méi myn saek biskôgje, om dêrop de takomst fan it tydskrift stomprinne to litten? Dêrfoar hat dy histoary my to knoffelich west. En as aktualiteit bistie it probleem net. Boppedat de ‘grand old men’ neibauwe hat gjin sin.

Fuortoan krigest in tydskrift yn 'e bus ûnder redaksje fan Bauke de Jong, Steven de Jong, Leo Popma, Trinus Riemersma en Geart van der Zwaag. Ik wit wol hwat foar dy it minst to fortarren is. Dit lân is mar lyts.

[p. 366]

Troch myn rút sjoch ik de ljochten fan Oentsjerk. Ast meikoarten knapst fan grimmitigens sit ik ek mei stikkene glêzen. Op 'e lippe of oer de tonge, sa'n spultsje is 't.

De nije redakteuren bin foar dy sasear it punt net. Riemersma is de neil oan dyn kiste. Syn ôfgean as redakteur per 1 oktober hast dy sneon noch min of te mear forklearre. Dat syn hannelwize tsjin ús oer dat wol needsaeklik makke, hast einliks bidoeld to sizzen. Dou hast de moker op 'e kop krige doe'tst yn de L.C. fan 7 oktober lieste, dat hy mei dyn ynlieding en ús forklearring oer it redaksioneel gewrot fan it lêste healjier yn 'e bûse - it wie méi in stik fan him, hy hie it neffens ôfspraek ek tastjûrd krige - de Klanderij yn stapt wie. Dat de staveringskwestje him ta it ynsicht fan syn ‘forrie oan Bauke de Jong’ brocht hie, wie dy stomsinnich genôch. En ûnbikend genôch, hwant dat hast ek pas op 3 oktober út 'e krante helje moatten. It forrie oan Durk van der Ploeg en co, sa farsk wol en yn in frijhwat kritiker fase fan De Tsjerne, hiest dêr ek in Forklearring fan syn hân yn dit tydskrift fan opnimme wollen? Dou hast him in opportunist neamd. Koart sein, dou kinst 'm wol frette.

Kom ju, hat it ek net hwat leafs en nayfs? En it wie dochs rjochting O.H., dêr't de gearkomste hâlden wurde soe. Dou witst seis ek wol dat de konjak dêr nou ienkear hwat better is. Neam it gebrek oan takt. Ek dat er him krekt nou wer kandidaet stelle liet.

Faeks krigest nochris in kâns dizze dingen publyk to meitsjen. Om my hiest it op dizze siden dien. Dat hast net wollen, om my net to kompromitearjen. Dyn Forklearring kin hjir nou better weibliuwe.

En hwat my oanbilanget, ik tink der krekt sa oer. Dat hâldst wol foar dy. Mar ik bin ek ré om alles to forjitten. Wy moatte fierder. Mei syn fiven nou. Dat is ús beide dan mar slagge! Neamst my nou ek yn alle silen mak? Myn namme ûnder it krantebirjocht oer dat Klanderij-komplot hat wol hwat suggerearre. Dou witst dat ik dêr net mei op 'e hichte wie. Mar fierders wie dat har goed rjocht.

It is de fyftjinde hjoed. Ik bin allinne oer. Hwat hâldste in tiid oer, jonge. Dit sil dy noait spite.

En hwat J.M. oangiet, Durk, hwat kin dat skele. Dat wisten wy ommers wol. Ik foar my, ik bin forrekte wiis mei de oerdracht oan Miedema & Co. En dat ha sy dan mar biwurke!

Wyns, 15 oktober 1968.

LEO