De Tsjerne. Jaargang 23

[p. 236]

Sjouke Voolstra / Fersen

Kremaesje

trije famkes njonken heit
op 'e foarste rige
allegearre blommen
op in lange kiste

moai waer en lange dagen
praet de dûmny
de ienichst bikearde
efter de blauwe lûkjes

blijf bij mij Heer
want d'avond is nabij:
oargelet in taperecorder

dan kofje mei cake
op ljochtskyndei
wylst heit
dûmny bitellet

en trije famkes
tige lytse famkes
sjogge om har hinne...

[p. 237]

Bed

dou bist foar my net
dy't ik my foarsteld hie
mar hwa't dat wol is
wit ik allikemin
sadwaende skik ik my
en doch de eagen ticht
as ik dy ienris
yn 'e wike nim

ik bin foar dy ek net
dy'tst forwachte hiest
mar hwa't dat wol is
seist my net en dêrom
makkest eltse dei
it bêd wer op
forskjinnest ienris yn 'e
fjirtjin dagen de lekkens

dat bêd dat bitsjut hwat
en dan to bitinken
dat men der as lyk
ek noch op lizze sil