De Tsjerne. Jaargang 17

[p. 369]

[Nummer 12]

Jan Dotinga:
Dongeradielen

Dongeradielen

Dêr hast de earnstige ierde
en de strakke bloei fan it gewaechs
binnen Gods genede -
koartamich de pleatsen ûnder
it hege tek fan de sinne;
hja hawwe soarch om dit lân -
doarpen op terpen binne
heechoppe gebeden.

Ik wol dit lânskip biharkje
mei it ear fan it Wurd.

Utbuorren

Ticht by de groun fan al den dei
hingje de huzen klomsk oer nei
it ear fan de ierde:
in flecht skouwe fûgels, oanhâld sykjend
by elkoars soberheit -
en ûnder in mienskiplik dak
fan noeden en soargen
droeg je de skelen yn.

Joun

Op 'e kym skoarret in slieperdyk
de kommende nacht -
rêstich kuijerje de lannen nei
de jountiid ta; ûnder in mantel
fan huver jowt it gers him fredich del
en boppe it porsleinen wetter siket
de stilte om in thús -
it koalsiedfjild wol laitslend tsjinabbelearje;
om 'e west binne ljocht en donker
ijûrslachs deiles.