De Tsjerne. Jaargang 13

[p. 289]

[Nummer 11]

D.A. Tamminga:
Ien wurd

- oan Boris Pasternak -

Op it skutblêd fan dyn wurken,
oan de balke fan dyn wenhûs,
yn de jiske foar dyn hurdsté
skriuwstou ien wurd.

Op dyn fjouwer keamersmuorren,
op de doarren dy't dy keare,
yn de drippen oan dyn finster
skriuwstou ien wurd.

Mank it stampen op de pleinen,
by 't salút op oarlochshôven,
op it lint fan earekrânsen
skriuwstou ien wurd.

Under spotprint yn de Prawda,
op oekazes fan it Kremlin,
op de stien dy't troch dyn rút fljocht
skriuwstou ien wurd.

By it steursein út de aether,
by 't gerôl fan tichthústreinen,
by it kermjen efter punttrie
skriuwstou ien wurd.

Yn de hânpalm fan dyn âlden,
yn de earskulp fan dyn leafste,
op it foarhaed fan jong Ruslân
skriuwstou ien wurd.

Boppe Europa's rike ierde,
boppe ús drok bifearne wetters,
tsjin ús drok bifleine loften
skriuwstou ien wurd.

Wurd, dat nea in hammer gruzelt,
nea in sichte wreed ûntwoartelt,
wurd, dêr't wy by steane of falle:
Frijheit!

(Nei Liberté fan Paul Eluard)