De Tsjerne. Jaargang 13

Frysk en frjemd:

Reiddomp redivivus

Neidat yn july '56 it lêste dieltsje fan de Reiddomprige forskynd wie (Pindorama yn in oersetting fan G.N. Visser) sil nou meikoarten in bigjin makke wurde mei de útjefte fan seis nije dieltsjes yn dizze rige, opset yn 1945 om it wurk fan de Fryske skriuwersjongerein to publisearjen. Yn de rin fan twa jier (1958 en 1959) sille der seis fersebundels forskine. Trije fan de alderjongsten iepenje de nije seary: resp. Jelle de Jong, Tjitte Piebenga en Durk van der Ploeg (allegearre to forskinen yn '58). Dêrnei komme yn de oanjowne folchoarder yn 1959: in bundel fersen ûnder de titel Seinen fan Marten Sikkema, in bundel mei twa Balladen fan 'e sé yn oersetting fan Klaes Dykstra en G.N. Visser en ta bislút in nije fersebundel fan Freark Dam.

Njoggentjinde-ieuwers

Neffens meidielingen yn gearkomsten fan it Literair-Histoarysk Wurkforbân fan de Fryske Akademy sil der dit jier forskine in blomlêzing út it wurk fan dr. Eeltsje Halbertsma û.o. foar skoallegebrûk; in útjefte oer en út it wurk fan de Makkumer dichter Dirk Lenige; in karlêzing troch dr. Y. Poortinga fan wurk fan njoggentjinde-ieuske skriuwers en fan D.A. Tamminga oer de dichter Rein Baukes Windsma. - Itselde Wurkforbân hat juffer dr. D. Simonides út Grins okkerdeis in lêzing foar hâlden oer Simke Kloosterman, de frou en har wurk. Dr. Simonides is dwaende mei in biografy oer dizze skriuwster dy't dêrmei útkomme sil, is 't doel. - Yn syn lêste gearkomste hat itselde Wurkforbân in soarte fan symposion hâlden oer de fraech oft der njonken Piebenga's Koarte Skiednis

[p. 32]

fan de Fryske Skriftekennisse noch in apart wurk oer de contemporaine Fryske litteratuer nedich en winsklik wêze soe. E.B. Folkertsma, dr. Anne Wadman, D.A. Tamminga en Freark Dam hawwe oer dy fraech har ljocht skine litten, dat dêrnei nochris trochljochte waerd troch J. Piebenga. Ta in konklúzje is it net kommen, of it moast wêze dat der sa staf en af gjin konklúzje to lûken wie... D.A. Tamminga soarge foar in positive suggesty troch de mooglikheit to opperjen fan in plate-atlas oer de Fryske litteratuer.

Twade prizen

Earste prizen koe net lije, sa die bliken by de útslach fan de jierlikse romanpriisfraech fan de KFFB. Mei in twade priis binne bikroand hânskriften fan Dj. Weening-Meijer en A.A. van der Werf. Yn beide gefallen giet it om forfolgen fan romans fan beide auteurs dy't al earder yn KFFB-forbân publisearre binne. De jury hat fierders advisearre, in ynkommen hânskrift It bigoun op Bolletongersdei fan E.S. de Jong, better net to witten earder alris publisearre as feuilleton yn it Bolswards Nieuwsblad, as pocketboek út to jaen. - De jury fan de Rely Jorritsmapriisfraech: prof. dr. K. Fokkema, ds. H.J. Brouwer en G(erben) G. Brouwer, hat foar dit jier 22 forhalen en 17 fersen to bioardieljen krige.

Koart nijs

Utjowerij Brandenburgh en Co to Snits is ophâlden mei de útjefte fan it moanneblêd It Heitelân, dat 35 jier bistien hat. Yn de lêste jiergong publisearre ds. B. Smilde nijsgjirrige opstellen oer de Noardfryske litteratuer. Faeks wurdt dy rige - nou ûnderbrutsen - aenst dochs noch fuortset hwant der wurde prikken yn it wurk steld foar it fuortbistean fan dit moanneblêd; oer eventuele nije opset en foarm is noch neat bikend. * Mefrou G.G. Faber-Hornstra to Ljouwert (direktrise fan it Bureau foar Kulturele Saken) hat yn de Raad voor de Kunst de troch it forhúzjen nei Beverwyk fan boargemaster J.G.S. Bruinsma iepenkommen ‘Fryske’ stoel ynnommen. * De Grinzer útjower J. Niemeijer hat oankundige dat by him forskine sil Dagwerk 1947-1957. Proeve van een Noordoost-Nederlandse litteraire kritiek fan de Grinzer kritikus Willem Diemer. * De Hollânske dichter Herman van den Bergh, dy't fan de minister fan U., K. en W. opdracht krige hie ta it skriuwen fan in essay oer it wurk fan J.J. Slauerhoff, is dêr nou mei klear kommen, sa is meidield. * De kritikus-romancier C.J. Kelk (destiids ien fan de Vrije-Bladen-groep) hat in regearingsopdracht krige ta it skriuwen fan in biografy fan Slauerhoff; yn guon Hollânske blêdden is de needsaek dêrfan bitwivele omt jierren lyn al in goede biografy forskynde, skreaun troch Constant van Wessem. En fierders kaem dizze aktiviteit fan it departemint yn in hwat frjemd ljocht to stean omt fan dy kant gjin meiwurking oan it folslein-meitsjen fan de Slauerhoff-útjefte fan Lekkerkerker jown is. * Yn de Opgangserie fan Bosch en Keuning n.v. is de troch P. Terpstra sels forsoarge Hollânske fortaling fan Fjouwer minsken yn in stêd forskynd. Dizze skriuwer sil takomme hjerst in nije oarspronklike Fryske roman publisearje is 't doel. * By útjowerij A.J. Osinga to Boalsert sil in bundel essayistysk proaza forskine fan J. Piebenga: Omgong en Trochtocht. De titel is ûntliend oan it Boek Job.

FREARK DAM