De Tsjerne. Jaargang 12

Frysk en frjemd:

Happe Pegasus fan stal?

Yn oansluting op in lêzing dy't de dichter Klaes Dykstra okkerdeis foar it litterair-histoarysk wurkforbân fan de Fryske Akademy hâlden hat, sil fan Akademywegen it bistjûr fan De Fryske Biblioteek oansocht wurde, dêrmei in blomlêzing to jaen fan Fryske oersettingen fan poëzij út oare talen; in útjefte yn de trant fan Pegasus op wereldreis, in jiermennich lyn yn Hollân forskynd (ek mei in pear oersettingen fan Fryske fersen deryn). - Dr. Anne Wadman hat yn it neipetear op de lêzing fan drs. Dykstra foarslein, ris in priisfraech út to skriuwen foar fortaling út in wrâldtael yn it Frysk; hy seach hjir in taek foar it Rely Jorritsmafouns.

Museum en oare mooglikheden

Nou't de litteraire seksje fan it Boun fan Fryske Kunstners op 'e rêch leit (neffens forklearringen fan insiders: net mear bistiet) is it namsto mear to priizgjen dat biskate wurkforbânnen fan de Fryske Akademy har aktiviteit ek op it mêd fan de litteratuer of alteast yn it litteraire grinsgebiet bidriuwe. Der mei yn dit forbân wiisd wurde op in lytse kommisje dy't, oansocht troch prof. Brouwer as wittenskiplik direkteur fan de Fryske Akademy, de opset tariede sil fan in Frysk letterkundich museum, alteast in Frysk letterkundige doku-

[p. 64]

mintaesje. Foar de takomst wurdt tocht oan in min ofte mear selsstannige ôfdieling fan de Provinsiale Biblioteek. Der bistiet op dit stik fan saken in wolkom kontakt mei de direkteur fan it Nederlands Letterkundig Museum yn Den Haech, de hear Gerrit Borgers, in bikend Hollânsk litterator dy't al gâns jierren kontakten mei de Fryske litteraire wrâld underhâldt.

It litterair-histoarysk wurkforbân fan de Akademy hat, ek yn de foarm fan in ynlieding troch de hear A. Vandamme fan it Bureau foar Kulturéle Saken, de mooglikheden fan oersettingen fan Fryske litteratuer yn oare talen (en de útjeftemooglikheden dêrfan!) ûnder eagen sjoen. Mooglikheden dy't oer it generael net heech oanslein waerden. Yn dit forbân mei in min ofte mear pikante meidieling folgje: koartlyn is meidield dat fan de auteur Theun de Vries - Fries fan komôf, hat ek yn it Frysk publisearre - meikoarten wer oersettingen forskine sille fan: Sla de wolven, herder (Dútsk, sawol yn West-Dútsklân, Eastenryk as Switserlân); Rembrandt (Frânsk), Anna Casparii, Bruiloftslied voor Swaantje en Pan onder de mensen (Dútsk), Pan onder de mensen, Hoogverraad (Tsjechysk). - De nijste (kommunistyske tendins-)roman fan De Vries, Het meisje met het rode haar, is yn koarte tiid by Pegasus, Amsterdam, al in twadde printinge fan forskynd.

‘Like going home...’

Frisian News Items dielt mei, dat The Wheel on the School, it forneamde berneboek fan de Amerikaenske Fries Meindert DeJong, útsocht is as ien fan de hûndert bêste berneboeken ‘of all time’. Yn itselde - troch prof. Bernard Fridsma fris en up to date redigearre nijsbulletin - jowt DeJong in wiidweidige, nijsgjirrige skôging oer de forfrysking fan syn boek troch Auck de Boer. ‘Its being translated into my own Frisian seemed like going home’, bikent er.

Koart nijs rounom wei

De K.F.B.B. - né, noch gjin opheldering oer Frijdom wie de heechste wet of It geheim fan Friso Stellingwerf, mar dat mocht men faeks ek net forwachtsje - hat bikend makke dat A.A. van der Werf út Ens mei Yn de berm lâns en mefr. Meijer-Weening fan de Harkema resp. earste en twadde priiswinner wurden binne yn de roman-priisfraech 1956. Gerryt Mulder hat mei in biografy fan de kristen-sosialist Metten Koornstra (ûnder de titel Agur en de twa portretten) in earfolle formelding krige, lykas Watse Cuperus mei in autobiografysk boek ûnder de titel: Striid en segen. Ut in meidieling yn Lyts Frisia fan W.L.Z.(ylstra) docht bliken, dr. D. Kalma hat in hânskrift neilitten ûnder de titel: Folk en Sprake, libben en wurk fan Harmen Sytses Sytstra. Juffer Zylstra pleitet foar it forskinen fan dit wurk yn 1962, it hûndertste stjerjier fan Harmen Sytstra; foar him soe dan ek in stânbyld oprjochte wurde moatte. Yn it Krystnûmer fan It Heitelân hat dr. Obe Postma in mennich fersen ‘oerbleaun fan earder tiden’ publisearre, û.o. it Ynliedend dicht fan Das Stunden Buch fan R.M. Rilke. Foar de Rely Jorritsmapriisfraech 1957 binne 30 ynstjûrings ynkomd: sawntjin koarte forhalen en trettjin fersen.

FREARK DAM