De Tsjerne. Jaargang 9

Frysk en Frjemd:

Oersetting ‘De Breugeman komt’.

De mieningen oangeande de Nederlânske oersetting fan de roman ‘De Breugeman komt’ fan Ypk fan der Fear rounen útelkoar: de oersetter, dy't der al oer gear wie (ds S.S. Smeding to Noordhorn, Minniste dûmny) en de skriuwster hiene, sa't bliken die, elk in eigen opfetting oangeande de styl en de ‘kleur’ fan it Nederlânsk, dat foar de oersetting fan dizze histoaryske roman it gaedlikst wie. Op syn forsyk is de oersetter nou troch de útjower fan syn fortaelopdracht ûntslein. De skriuwster sels sil nou mei de Nederlânske oersetting rêdde.

Hjerre Gerrits en syn ‘kaertlizzer’.

De dissertaesje fan Anne Wadman oer Hjerre Gerrits van der Veen sil sûnder mis wer opnij it omtinken freegje foar it litteraire wurk fan dizze njoggentjinde-ieuske skoalmaster. Syn forhael ‘De kaertlizzer’ binammen is de muoite fan it werprintsjen wurdich, oerbrocht yn nije stavering ensfh. en foarsjoen fan in koarte ynlieding sil it hwat komposysje en psychologyske tekening oanbilanget op de hjoeddeiske lêzer grif yndruk meitsje. Wadman sels neamt it forhael net om 'e nocht ‘de earste Fryske roman’. Der binne dan ek plannen, it forhael, mei ynlieding fan Wadman, op nij út to jaen, faeks mei yllustraesjes, al sil it noch wol efkes oanhâlde. (Dr Poortinga hat okkerdeis yn ‘Frysk en Frij’ in nijsgjirrich opstel oer ‘De kaertlizzer’ publisearre.)

To min biografyën?

De op kommen steande stúdzje fan Wadman oer Hjerre Gerrits bringt jin ek in oar forlet yn 't sin, n.l. fan op peil steande biogra-

[p. 288]

fyën fan Fryske skriuwers ensfh. yn it forline. De rige dêr't Van Gorcum en Comp. nei de oarloch mei úteinsette soe, hat it net fierder brocht as it dieltsje fan ds Kalma oer Gerben Colmjon. Der is nou kâns, dat in soartgelikens boekje, fan Sj. van der Schaaf oer Geart Laurens van der Zwaag, destiids ek opnommen yn dy rige, nei forrin fan tiid lykwols, by in oare útjowerij, forskine sil.

Yn ‘Frysk en Frij’ is okkerdeis wiisd op it feit, dat skreaune boarnen dy't mei de stoffe leverje koene foar in biografy fan Pier Pander (nou wer ûnder de oandacht troch it nije museum) óf ûntbrekke, óf net tagonklik binne. De gemeente-architekt fan Ljouwert, ir Ch. C. van der Vlis, liket lykwols fan doel to wêzen, takomme jier in libbensbiskriuwing fan Pander to publisearjen.

Koart nijs.

Oerset wurk út de East- of Noardfryske skriften forskynt yn Westerlauwersk Fryslân amperoan. Fan Ypk fan der Fear sil nou lykwols mei koarten by útjowerij Laverman in oersetting forskine fan de roman fan Wilhelmine Siefkes, in Eastfryske skriuwster út Leer. It boek - de oarspronklike titel is ‘Keerlke’ - waerd nei it forskinen bikroand mei de Johann Hinrich Fehrs-priis.

E. Howard Harris hat yn it ‘International P.E.N. bulletin of Selected Books’ dat twatalich, Engels-Frânsk, forskynt, in artikeltsje skreaun oer ‘Contemporary Frisian Literature’. It stiet yn Vol. IV, nû. 3, October 1953. Nei oanlieding dêrfan hat de redaksje fan it forneamde ynternasionale litteraire tydskrift ‘Books abroad’, dat fjouwer kear jiers fan de University of Oklahoma Press komt, him frege oft hy foar dit tydskrift in artikel oer de Fryske litteratuer fan 1930 oant hjoeddedei skriuwe wol. Harris hat it oannommen.

F.D.