De Tsjerne. Jaargang 9

Frysk en Frjemd:

Khayyam-oersetting komt út.

De oersettingen fan de kwatrinen fan Omar Khayyam troch Inne de Jong, dêr't ‘De Tsjerne’ yn de ôfroune jiergongen gauris guon fan publisearre hat, sille nou bundele wurde en fan 't jier forskine. De oersetter - dy't koart nei de oarloch it wurk op priemmen set hat en mei it wurk fan de Perzyske filosoof yn 'e kunde kaem troch hwat dêrfan yn Viruly's ‘Vluchtige ontmoetingen’ oer skreaun wurdt (!) - hat yn syn bundel 99 kwatrinen opnomd. De oersettingen lit er foarôfgean troch koarte ynliedende opstellen oer Omar Khayyam en syn tiid, oer de kwatrinen sels en de Fryske oersetting as sadanich. Martha Wadman hat foar de útjefte 33 pintekeningen makke. - It mei bikend stean, dat yn it Nederlânsk de kwatrinen fan Omar Khayyam oerset binne fan û.o. Boutens, Leopold, Keuls en Willem de Merode.

[p. 160]

Bûnte akster fljocht út.

‘De bûnte akster’, dy't in moai skoft ûnder de hoede fan de Reiddomprige to brieden sitten hat, is nou hast oan it útfleanen ta. Syn bûnt pakje wol de kleuren fan alle mooglike Fryske kabaretlietsjes wjerspegelje - se binne sammele fan S.J. van der Molen en B. Tuinstra. Teksten binne opnommen û.o. fan Marten Brouwer, Iwan Fladdéracque, D.A. Tamminga, Tetman de Vries, Geart Jonkman en de gearstallers sels. Van der Molen hat fierder in ynliedinkje oer de skiednis fan it kabaret bydroegen, Tuinstra oer it wêzen fan it kabaret.

Bundel balladen fan Tamminga printré.

De forneamde bundel ‘Balladen en Lieten’ fan D.A. Tamminga, yn it bigjin fan de oarloch útkommen mei houtfiken fan Mulders, is al lang útforkocht. Der wurdt op 't stuit tocht oan in nije útjefte, dy't lykwols neffens de winsk fan de dichter allinne balladen bifetsje sil; de lieten wurde weilitten wylst in tal letter skreaune balladen tafoege wurde sille: De ballade fan de Wellebrêge, oersettingen fan De Raven (Poe), Ballade fan de Grêve fan Henegouwen, Ballade fan de Eilânsfroulju (Agnes Miegel), Ballade fan St. Steffen en Kening Herodes en Ballade fan de Kersebeam.

Frysk út 'e frjemdte.

Doe't in Amerikaenske romancier fan Frysk komôf de greate roman ‘This is the year’ skreau, hiet er noch Feike Feikema. Sûnt in jiermannich hat er offisieel syn namme foroarje litten; it is nou Frederick Feikema Manfred. Under dy namme sil er ek syn nije roman publisearje dêr't er mei to set is: ‘Lord Grizzly’, in boek dat him ôfspilet yn it formidden fan jagers en trappers.

In oare Amerikaenske auteur, Meindert de Jong, broer fan de forneamde David Cornel, berne yn Wierum, ûntjowt him wakker as skriuwer fan berneboeken. Syn nijste jeugdboek, ‘Hurry Home, Candy’, is byg. troch de N.Y. Times tige gunstich ûntfongen.

Koart nijs.

Fan it toanielstik ‘Bonifacius’ fan Fedde Schurer sil yn ien bân sawol de oarspronkelike Fryske versy as in Nederlanske oersetting forskine, tagelyk mei de earste opfiering oare moanne yn Dokkum. Der wurdt rekken hâlden mei opfieringen yn it Nederlânsk bûten Fryslân. - Klaes Dijkstra (dichter fan de bundel ‘Untwyk’) hat in nije oersetting fan de Ballade fan de âld matroas fan Coleridge (destiids yn it Frysk oerbrocht fan André Scholten) printré. - Fan Jo Smit, direkteur fan de R.O.N., sil yn de Reiddomprige foar dit jier in opmerkelike novelle ‘Sûnder sûker’ opnomd wurde.

FREARK DAM.