De Tsjerne. Jaargang 9

[p. 129]

E.B. Folkertsma:
Koartom (III).

Flokken is leagenjen.

*_**

Dêrt dyn skat is, dêr sil ek dyn herte wêze. Dêrom hawwe
forskate lju de jildportefeuille yn 'e binnenbûse, op it hert.

*_**

It lok dat men fynt, mei men net hawwe, en it lok dat men
hawwe mei, fynt men net.

*_**

Hwat men hat, mei men net nimme.

*_**

Wês dyst bist (Pindaros)? Né, wês dyst wurdst.

*_**

Skrift mei Skrift forgelykje? Wis, as it mar net wurdt
Skrift tsjin Skrift útspylje.

*_**

Hwerom arbeidzje wy sa en bringe ús libben wrottend en
wramend to'n ein? Omdat wy net hwat paradysliker bistean doare.

*_**

De Bibel is it prachtichste berneboek.

*_**

Hoannekraeijen is revolúsje, hinnegekôk sêdde boargerlikheit.

*_**

Dêrt hert fol fan is, dêr wurdt de mûle stil fan.

*_**

Hwat it each net sjocht, dat docht it herte it measte sear.

*_**

Wol net kristliker wêze as Kristus.

*_**

De swierste straf op it kwea is, net straft to wurden.

*_**

Wolle jo witte hwat der yn bern sit, út se wrakselje.

*_**

De feart leit mei slûge en lome kronkels troch de greiden, net liker as wie it in slang.

*_**

It swierste op ierde is, in bulte jild of in bulte leafde to hawwen.