De Tsjerne. Jaargang 9

[p. 32]

Frysk en Frjemd:

Boeken fan Brolsma.

Ek nei de dea fan Reinder Brolsma wurdt der fuortgong makke mei it op 'e nij printsjen fan earder forskynd wurk dat nou útforkocht is. Brandenburgh to Snits kundiget in nije, yn bigjin 1954 to forskinen printinge oan fan de forneamde roman ‘Groun en minsken’. Nêst de gewoane útjefte komt in tal nûmere eksimplaren yn lúkse útfiering. - Utjowerij Laverman N.V. yn Drachten sil fan 't hjerst in nije printinge fan de tiidsroman ‘Sate Humalda’, goed tweintich jier lyn foar it earst forskynd, bisoargje is 't doel.

Konduktrise kriget forfolch.

De Kristlik Fryske Folksbibleteek hat as útjefte foar dit jier in forfolch op ‘Konduktrise’ oankundige: ‘Folk yn 'e bus’ sil it hjitte. Yn de parsebirjochten wurdt gjin auteursnamme neamd - it sil ús ris nij dwaen oft nou aenst ek oan it pseudonym ‘Welmoed Hemrica’ in ein komt of dat it ‘geheim’ noch bistean bliuwt. - As oarde útjefte sil de K.F.B, komme mei ‘De maitiid fan it libben’ fan P. Akkerman. - Foar de bêste Kristlike roman dy't yn 1954 ynkomt hat it bistjûr fan de K.F.B. in priis fan f 1000, - biskikber steld.

‘Kerk en kunst’.

It moanneblêd ‘Wending’ (maandblad voor Evangelie en Cultuur) hat in dûbeldnûmer wijd oan ‘Kerk en Kunst’. De útjefte is fuortkommen út it kongres oer religieuze en tsjerklike kunst, forline Maitiid yn Amsterdam hâlden. It meastepart fan de artikels yn it nûmer is ûntstien út lêzingen dy't op dat kongres hâlden waerden. Fan de meiwurkers neame wy: prof. dr H. van Oyen (‘De verhouding tussen Christendom en Kunst’), prof. dr W.J. Kooiman, Guillaume van der Graft (‘Functionele Poëzie’), en Ben Albach (‘Kerk, Toneel, Versdrama’).

Subsydzje foar G.N. Visser.

De Fryske dichter drs G.N. Visser (‘Jolm’) is, yn 'e mande mei dr L. Meijer, lykas hy forboun oan it Ned. Zuidamerikaans Instituut, dwaende mei in stúdzje oer de aspekten fan de Hollânske kolonisaesje yn Brazilië. It Prins Bernhard Fonds hat foar in útjefte fan dy stúdzje in subsydzje tasein. - Oer G.N. Visser de Fryske dichter sil ek de greate W.P. it ien en oar skriuwe.

Koart nijs rounom wei.

De Italiaenske ynternasionale priis foar dichtkunst ‘Etna-Taormina’ hiene dizz' kear mear as 150 skriuwers út alle lannen fan Europa en Amearika in dichtbundel foar ynstjûrd. De priis, twa miljoen lire, is - elk foar de helte - tapart oan de Ingelskman Dylan Thomas (posthúm) en de Italiaen Salvatore Quasimodo. De Nederlânske dichter Bertus Aafjes krige lykas sawn oare in ‘earfolle formelding’. - Njoggen litteraire tydskriften yn Nederlân sille in mienskiplik nûmer útjaen by wize fan protest tsjin de diskwalifikaesje fan de bifrijingsidé - De dichter Ed. Hoornik is opnommen yn de redaksje fan De Gids. - It deiboek fan it Joadske famke Anne Frank, ‘Het Achterhuis’, nei de oarloch in bestseller yn de boekhannel, sil yn Amearika foar toaniel biwurke wurde.

FREARK DAM.