De Tsjerne. Jaargang 8

Frysk en frjemd.

Yn Nederlânske oersetting.

Yn de kostlike samling ‘Balladen en Refereinen’ dy't C. Buddingh' foar de Prisma-rige gearstald hat, binne fan twa Fryske fersen oersettingen opnommen: D.A. Tamminga syn Ballade fan Mata Hari en fan Anne Wadman de Ballade fan de poètes-maudits. As motto hat de bundel in rigelmannich út Wadmans fers: ‘Wij zwerven rond door woest terrein - en voelen ons getrapt en klein, - maar kunnen wij 't niet langer harden - dan zingen wij ons warm refrein - tot troost voor wie verbitterd zijn, - al zijn we zelf de meest gesarden’. - Ien spitich forsin hat de gearstaller foarsafier't ik neigean kin makke: hy hat de ballade fan Frans Vergonet, de verrader, taskreaun oan Henk Fedder, mar it fers is makke troch Fedde Schurer.

Tinkstien foar Gysbert?

Yn ‘Frysk en Frij’ hat D.A. Tamminga nou alfêst (mar dêrom net to ier, tinkt my) it pleit fierd foar it oprjochtsjen fan in stânbyld foar Gysbert Japiks yn 1966: it jier dat de Bolserter dichter trije ieuwen lyn forstoarn is. Tamminga wol in monumint yn brûns, weardich en artistyk forantwurde. It Bruorreplein yn de Gysbertstêd liket him in gaedlik plak. - Sûnt ha de kranten fornijd, it Bolserter Weeshûsbistjûr hat ta gelegenheit fan it 300-jierrich bistean fan dy ynstelling f 1500 skonken as bydrage oan it gemeentebistjûr foar dit doel.

Oer Abe oer Abe.

Nei't al in skoft lyn Het Vrije Volk it ien en oar fornijd hie oer de roman oer Abe Lenstra, dêr't Abe Brouwer mei dwaende is, hat nou Het Parool syn lêzers ynsafier hwat nijs forteld, troch mei to dielen Brouwer hat in roman fan tusken de trije à fjouwerhûndert siden ûnder hannen dêr't net allinne de minske en it sportfenomeen Lenstra yn tekene wurde sille, mar dy't ek eardere opmerklike figueren út it Lenstra-skaei bihannelje sil.

[p. 388]

Reiddompnijs.

De samling kabaretlietsjes, gearstald troch S.J. van der Molen en B. Tuinstra, ûnder de titel: ‘De bûnte akster’, sil teksten bifetsje fan û.o. de gearstallers, Tetman de Vries, Geart Jonkman, Iwan Fladdéraque en D.A. Tamminga. It dieltsje bislút de rige 1953, dêr't fierders ek Geart Jonkman syn forhale- en Jan Wybenga syn fersebundel (ûnder de titel ‘Amoeben’) noch fan komme moatte.

Prizenrein, sûnder ein...

De litteratuerprizen fan de (Haechske) Jan Campert-Stifting binne takend oan: Martinus Nijhoff (posthúm), Albert Helman, Simon Vestdijk, Albert Besnard, Simon Carmiggelt en J.B. Charles. - It jild fan de priis foar Nijhoff is troch de famylje oan de Stifting weromjown; hja hat dêrfoar oan de dichter Guillaume van der Graft (ds W. Barnard) opdracht jown, in stúdzje oer Nijhoff to skriuwen. - De Amsterdamske poëzijpriis wie foar Lucebert; dy foar novellen foar A. Alberts. Adriaan Morriën syn novellen waerden earfol neamd, mar de skriuwer stelde dêr gjin priis op en hat foar de eare bitanke. - De Reina Prinsen Geerligspriis moast dield wurde troch Remco Campert (soan fan Jan Campert) en de debutante Ellen Warmond, dy't okkerdeis har earste fersen yn Maatstaf publisearre. - De nije Stifting It Frysk Amateur Toaniel hat in priisfraech útskreaun foar toanielstikken foar lytse selskippen; prizen f 200, - en f 100,-.

Koart Nijs.

Willem Diemer hat foar de R.O.N. in tige slagge oersetting yn Grinzer dialekt makke fan Shakespeare's Keapman fan Venetië dy't as harkspul útstjûrd is. Koos Kerstholt spile Shylock. - Dr Fokke Sierksma is yn Leiden bineamd as wittenskiplik haedamtner, mar sil noch in skoft de ‘litteraire kertierkes’ fan de R.O.N. forsoargje. - By G.A. van Oorschot yn Amsterdam binne de tige nijsgjirrige ‘mémoires’ forskynd fan de ‘Dútske Nederlannner’ Albert Vigoleis Thelen: Die Insel des zweiten Gesichts. Thelen, dy't sûnt 1931 net wer yn Dútsklân wenne hat, wie in great freon fan Marsman, hat mei him yn it Suden wenne en togearre ha se byg. de boeken fan de Portugeeske mysticus Teixera de Pascoaes oerset. - De Ingelskman E. Howard Harris (út Wales) hat in boek òer de Fryske litteratuer ré, mar koe der yn Ingelân gjin útjower foar fine. Hy hat it hânskrift nou oanbean oan de útjower Eerdmans yn Grand Rapids, in Bolserter fan komôf.

FREARK DAM.