De Tsjerne. Jaargang 8

Op it harspit:
Boalserter yn 'e tiis.

‘Dat it blêd (bidoeld is De Tsjerne, A.W.) him in kearmannich lilk makke hat, dat it net in bisprek-eksimplaer krige hie fan in ‘famkesboek, dat net litterair’ wêze wol (bidoeld is: Konduktrise, A.W.), en nou sa'n boek to lien freget fan in oar en it nou diskwalifisearret omdat it in famkesboek is en net litterair, is ek hwat in nuver gefal,’ seit de Boalserter Krante, it Tsjerne-nûmer fan Jannewaris bisprekkend.

Nou, ‘lilk makke’ is it wurd net, mar dêr wolle wy ôfwêze. Slimmer is dat der in leagen yn stiet, dy't makket dat it ‘nuver gefal’ net oan ús kant to sykjen is, mar earne oars. De B.K. seit, wy hawwe it boek diskwalifisearre ‘omdat it in famkesboek is en net litterair’. Net ien fan beiden is wier. Dy't Sierksma syn

[p. 128]

resinsje lêzen hat, kin witte dat hy it boek net ôfwiist omdat it in famkesboek is, mar dat hy it net bisprutsen hawwe soe, as it allinne mar in famkesboek west hie. Likemin wiist S. it boek ôf om't it ‘net litterair’ is, mar krekt om't it, yn striid mei de skriuwer(ster) har of syn eigen wurden, AL litterair wêze wol, om't it ‘mei in skilich each nei de echte litteratuer kipe hat’. Fierderop sprekt de kritikus fan ‘90% mislearre en (de) 10% slagge litteratuer’. Dat is wol dúdlik, tinkt ús. ‘De auteur moat in misbigryp hawwe mei himsels’, seit S. noch. Itselde soe men sizze kinne fan de resinsint yn 'e B.K.

As 't ús net mist, binne der noch al relaesjes tusken de B.K. en de útjower dy't ‘Konduktrise’ yn it ljocht joech, en ek tusken de Pryske redakteur fan it blêd en de man dy't de reklame-kampagne foar ‘Konduktrise’ laette. Dêrom soene wy him dizze fraech stelle wolle: Hoe forklearret hy, dat it ‘litterair tydskrift’ De Tsjerne gjin rjocht hat op in resinsje-eksimplaer fan in boek dat ‘net litterair wêze’ wol, - en dat de Regionale Omrop Noard al ien kriget foar syn programma-ûnderdiel dat al sûnt jier en dei hjit fan: ‘litterair kwartier’? Hwant neffens ús is DAT ‘hwat in nuver gefal’.

A.W.