Trotwaer. Jaargang 23

[p. 180]

Jacobus Quiryn Smink

Wa binne de dreamers

Wa binne de dreamers? Wiene dat ienris
Joazef en Jona, Orfeus, Oidipus en Lennon, no
Binne sineasten en programmeurs populêr
Mar sûnder flink budzjet dreame se net.

Nee, nim dan my bygelyks, ik doch it
Foar in bankje op blanko: Hy rammelt wat
Mei syn plasse, sit yn far look en klear.
Stel dy foar, wy binne de dreamers:

De sliep is in nije dei, de bline sel
Hat it finster op 'e wrâld en immen
Noeget ús op it terras fan lange nachten.
Wa binne de dreamers, ja, binne wy.

Sa bou ik myn loftkastiel en fervje myn hûs
Skaak noch in dame, en deidream, by de rûs.

[p. 181]

Telle de tiden

Telle de tiden noch dat sûnder erch
Wy libben yn in dream fan in mearke?
Wy ieten alle apels dy't ús smakken
En net weijûn troch hekse of serpent.

Neaken wiene we noch, mar we skammen
Us doe nearne en nea en by de berch
Wie de ein fan ús biotoop, it begjin
Lei by de oseaan, safier en bekend.

Telle de tiden noch dat sûnder erch
Wy libben yn in dream fan in mearke?
Net dat it net foarby is en lang lyn:
Wy ieten alle apels dy't ús smakken.

Bleat en bang klimme wy troch de see
Ite troch de berch en dreame fan nee.