Trotwaer. Jaargang 18

[p. 187]

Tsjits Peanstra
Swarte Hoanne

foar Willem

wy wien' by swarte hoanne op 'e seedyk
en skôgen dêr de romme keale fierten
út smelle slinken yn it weake slyk
kaam ús de lucht fan seewier yn 'e mjitte

de waadsee reaunte sêft en mankelyk
mar driuwe stoarmen oer de kwelders hinne
dan sil it smoarge skom mei kwal en blyk
yn wylde baren it basalt berinne

wy stienen ek by 't winter op 'e dyk
oerwrâld fan kâlde iisbestjurre weagen
turkoise-blau en wyt safier 't wy seagen
de noardpoal of antartica gelyk

de eastewyn blies triennen yn ús eagen
wy sochten yn de herberch in ûntwyk