Trotwaer. Jaargang 8

[p. 300]

Eppie Dam
Fersen

Boartersguod

de earste tosken
bieten har forwoast
yn dizze bytring fêst
mei 't sulveren rinkelding
- myn namme stiet deryn! -
dat him earst nou
ûntjowt ta knyn
mar ik bin ek 23 nou op 't lêst

it pluzich teddy-bearke
hat syn beide glêzen
eachjes noch
al sjocht er nou foar 't earst
omdoch

de houten frachtwein
wie doe grif tsjin 't seuren
syn fracht wie ommers oars
yn gjin gefal
in blokkedoas

de jojo sit yn
eigen tried fortiisd

mar alles is noch hiel
al hinget nou
de draek oan tou
hwat trystich yn forblikke kleuren

mar alles hiel
gjin ding skanseard en
op 'en heechsten fiel 'k
mysels forrinneweard

[p. 301]

Mominten/Tiid net

in frjemd forline
rûgelet hjir
yn hurde krûmkes sjek
bihyplik út papieren dreamen wei
as droege sniefal
ratteljend út hege wite wolken

de finger feit noch wol
hwat lytse skilferkes to plak
mar hwat tabak west hat
is grús en grom
yn 't skreppen fan myn tinzen
om in âld en fier gerak

it is wol earder sein
men fisket hjir ek oars neat op
as út en troch in tel
in pear mominten
dy't noch net folslein
't forline bjuster binne

hwant tiid
binestele him noch nea yn juster -
inkeld even yn de brosse tûken
fan it hjoed misk yn
dat moarn wer tsjuster is
en sigaretten lyn

[p. 302]

Spoarsykje.

heakke oan hwat stikeltriedden
skieppewollen
flachjes yn harsels biwuolle

krekt dêr 't ienris hynders stiene
steane hoegen
yn de hurde klaei bidroege

gers bitreuret syn formisten
bisten leine
djippe wjekken yn de weide

glêdde stielen fûgels lûke
god wit hwerfoar
dûbeldspoar de himel bylâns

bern en houn wol him noch rymje
mei dit ûnlân -
sânauto's forbruije har kâns

wekker wurdt in nij forline
de kraenbek dy't
hjir nije hiëroglyfen byt