Trotwaer. Jaargang 8

[p. 174]

Eppie Dam
Nijbou

1

doe't hjir noch fûgels
de loften biwolken mei flechten
wie it reid minder djûr

patrizen follen har nêsten
mei waermte rook fan
grounfocht en gers

de pôlle fol fan geheimen
as in reiddomp forburgen
yn de kleur fan syn fear

nou blauwe parkiten
reade en wite muzykjend
tsjin in gitaer fan traljes

en in kunstgebyt huzen
haffelt alle dagen
op in nije stiltme om

[p. 175]

2

strjitten hâlde de bou oan
fan in âld fers

doar op doar
tún op tún
dei út dei yn
stiet alles op rym

myn fuotstappen
passe yn it metrum
fan nacht en fan dei en
nimmen lûkt my
út de rigels wei

[p. 176]

3

hef ik it glês
stiet dyn gesicht
yn in trystige spegel

sjoch ik de wei út
aeije fammen de tegels
op ien foet

in baeske bisiket de wrâld
troch in rút
fan suertsjepapier

mosken
stil yn harsels
forknûkele

gers
grien as
gers

hef ik it glês
is dizze snein
mei himsels forlegen