Trotwaer. Jaargang 7

[p. 224]

R.R. van der Leest
Fersen

Butenbus

ûnderweis nei dokkum
stappe de firile boeren yn
farsk út de klaei skuord

de readwosken koppen
glimme en strontklompen
lûke graffiti oer de flier

dit is it folk
- dat myn klankboaijem wêze moat

dit binne de heidens
dy't ik ta myn wurd moat bikeare

ik fiel my bonifacius

[p. 225]

Utstjerrend laech

dat wiene tiden heite
sei de âld doarpsgek
en pinke in trien wei

jonge noch ta
se stjûrden my
fan de houn nei de bok
om de tichtegatsjepanne
of de plintljedder

bern skolden my út
en bauden my nei
elk wist hwa't ik wie

ik ha it nou goed hjer
krij wiet en droech
de susterkes binne leaf
en ik mei allinnich
frijút de stêd yn

mar gjinien dy't my hjir
kent en om my laket
ik forfeel my dea

[p. 226]

Berteplak

it spoar werom folge
dit is de steech
mei de bimiigde muorren
dêr't wy ús loftkastielen bouden
pneumatyske boaren
helje de ûnderste stien boppe
dreamen falle yn slopershannen