Trotwaer. Jaargang 2

[p. 50]

Trioel
Redaksje ‘Trotwaer’ / Skriuwen oan P. van der Mark, deputearre foar kultuer, y.f.m. provinsiale subsydzje
Nota subsydzjes Fryske tydskriften, in casu ‘Trotwaer’

I. Ynlieding

It tydskrift ‘Trotwaer’ bistiet nou aensent twa jier ûnder dizze namme. It wol binammen literair tydskrift wêze, mar ek oare saken (maetskiplike, sosiale en kulturele kwestjes) kinne oan 'e oarder komme. Wy neame as foarbylden út 'e lêste nûmers: kultuerbilied yn Fryslân, febr. '70; kulturele ried, suppl. I, sept. '70; Tryater. suppl. I, sept. '70; seksje letteren yn 'e nij op to setten kultuerried, suppl. II, okt./nov. '70; in interview, maert/april '70; polemyske stikken en bgl. eltse moanne de bydragen fan ‘Operaesje Fers’.

‘Trotwaer’ wol nét wêze in blomlêzend tydskrift dêr't elkenien him mei konformearje kin, mar it útgongspunt fan it tydskrift is in podium foar dy skriuwers en dichters to wêzen, dy't neffens it oardiel fan 'e mearderheit fan 'e redaksje hwat skreaun ha, dat de muoite fan it publisearjen wurdich is. Hjirby is kwaliteit noarm. Fierders jowt de rubryk ‘Trioel’ oan yn prinsipe alle skriuwers de mooglikheit, har miening to sizzen oer alle mooglike saken. De redaksje is dêrby mar foar in part forantwurdlik foar de ynhâld en de kwaliteit fan de stikken, ntl. foarsafier't hja de oan 'e oarder stelde saken, opfettings ensfh. wichtich genôch achtet om de lêzers foar to lizzen. Eask dêrby is dat de nammen of initialen fan de skriuwers ûnder de stikken set wurde.

II. Subsydzje ‘Trotwaer’

Hoewol't de fordieling dy't yndertiid troch de hear J. Noordmans opsteld is ús wol noasket (a. in literair tydskrift; b. in ‘magazine’ en c. alle biwegingspublikaesjes by elkoar), wolle wy dit faset net fierder analysearje. It giet ús binammen om it literaire tydskrift yn Fryslân.

Wy binne fan bitinken dat ‘Trotwaer’, ôfsjoen fan alle oare, as paddestuollen út 'e groun fleanende nije tydskriften (L.C. fan 11 oktober 1970), sjoen wurde moat as it offisiële, ek troch it ryk subsidiearre, Frysk literaire tydskrift, dat dochs de fuortsetting fan ‘De Tsjerne’ (‘Asyl’ en ‘Quatrebras’) is en as sadanich al sûnt 1945 bistiet. Binammen dizze twa punten: rykssubsydzje en 25 jier bistean. jowe neffens ús ‘Trotwaer’ it rjocht, ek troch de provinsje Fryslân subsidiearre to wurden.

Fierders hat it blêd 400/500 fêste abonnees en in fêst minimum tal siden fan likernôch 450 jiers.

Ek forwize wy nei de opjeften fan printer en útjower oer de saeklike en konkreetfinansiële aspekten. It liket ús gaedlik dat de útjower de iene helte fan it subsydzje fan to foaren, en de oare helfte efternei kriget.

[p. 51]

III. Subsydzjes oare literaire (ien- of mearmans) tydskriften

Hwat de subsydzjes fan oare tydskriften oanbilanget, dêr ha wy feitliken net folle mei to krijen. Wol moatte wy bisykje mei oare blêdden ta oerienstemming to kommen: forsnippering fan subsydzjes is de ûndergong fan alle Fryske tydskriften.

Fierders wolle wy forwize nei de bitinksten fan it ‘Ministerie van Cultuur, Recreatie en Maatschappelijk Werk’: û.m. moat it tydskrift in pear jier bistean; moatte de meiwurkers to'n minsten f 7, - de side krije: moat it tydskrift to'n minsten 4 kear jiers forskine; moat ik mooglik wêze om in abonnemint to nimmen en moatte de bydragen yn haedsaken yn de Nederlânske of Fryske tael skreaun wêze. In kopy fan dizze bitinksten foar ‘Trotwaer’ is al oan de Hear Ypma tastjûrd.

IV. Bitinksten en garansjes y.f.m. provinsiale subsydzje ‘Trotwaer’

1.	Jierliks moatte 400/450 siden minimael forskine, fordield oer 10 nûmers, hwerby't de redaksje it frij hat to'n heechsten 2 dûbelnûmers út to jaen;
2.	It tydskrift sil elke moanne forskine moatte, útsûndere dy moannen hwannear't der in dûbelnûmer ûtkomt. Uterlik 3 wiken foar it forskinen sil de redaksje alle kopij oan de redaksjeskriuwer oerlangje moatte. Allinne koarte, polemyske bydragen (foar de rubryk ‘Trioel’) kinne noch letter ynkomme;
3.	Sil de printer letter dan 4 wiken nei it ynkommen fan de kopij it tydskrift klear krije, dan folget ienkear in warskôging; bart soks wer dan wurdt 1/10 fan it subsydzje ynholden;
4.	De administraesje moat bûten de útjower/printer om't guon saken nou fiersentolang duorje;
5.	Yn prinsipe wurdt to'n minsten 10 kear jiers in redaksjegearkomst holden, sa mooglik dalik nei it forskinen fan in nûmer;
6.	It ôfkarde wurk krijt de redaksjeskriuwer werom en wurdt dalik weromstjûrd, méi in kommentaerke dat de leden fan de redaksje op it bioardelingsformulier skreaun hawwe;
7.	De redaksje docht alle war om sa gau mooglik in fyfde redakteur to bineamen.

V. Plannen fan ‘Trotwaer’ yn 1971

1.	Nije struktuer-opset (wurkwize) binnen de redaksje sels;
2.	Krityske bigelieding fan forskinende Fryske literatuer;
3.	In tydskrift mei wurk fan sa goed mooglike kwaliteit;
4.	In tydskrift dat in iepen podium foar alle Fryske skriuwers wêze kín: fan Gerben Abma oant en mei Geart v.d. Zwaag;
5.	In tydskrift dat aktuele kulturele saken net út 'e wei gean sil.

Foar de redaksje fan ‘Trotwaer’,

Josse de Haan

Remco H. Heite

Steven H.P. de Jong

Reinder R. van der Leest