Trotwaer. Jaargang 2

[p. 46]

Joop Boomsma / Kruse mei kruskes

Jo hawwe de kar út dizze persoanen:

LIEUWE:	berne 7 jannewaris 1945; oplieding: legere skoalle, legere lânbouskoalle; type: in ein keardel mei greate hannen; takomst: meikoarten de buorkerij fan heit oernimme.
GEORGE:	berne 8 novimber 1934; oplieding: legere skoalle, h.b.s. (7 jier), universiteit (2 jier ekonomy), nei folsleine mislearring by heit yn 't fabryk (sûkersekjes); type: glêde kop/swart snorke; takomst: joast mei 't witte.
KLAES:	berne 13 augustus 1940; oplieding: legere skoalle, u.l.o., kweekskoalle; type: nonkonformist, skriuwt (nea publisearre) fersen, swier yn 't burd; takomst: grize mist mei yn 'e fierte de dizenige kontoeren fan in akte m.o.-pedegogyk.
WYTSKE:	berne 18 febrewaris 1948; oplieding: legere skoalle, h.b.s. (1 jier), u.l.o. (½ jier), húshâldskoalle (1½ jier), forkeapster yn skuonnesaek; type: forkeapster yn skuonnesaek; takomst: trouwe en bern krije, sa 't liket.
ANKE:	berne 2 april 1935; oplieding: legere skoalle, gymnasium, universiteit

[p. 47]

	(psychology), dwaende mei dissertaesje; type: tige froulik, nettsjinsteande har swarte bril en har saeklike wize fan praten (en dat foar in psychologe!); takomst: ivoaren toer fan it yntellekt.
YVONNE:	berne jawis; oplieding: legere skoalle, h.b.s., witst wol; type: bytsje bot dom, to hip yn 'e klean, stjonkt in ûre boppe de wyn nei (frânske fansels) kosmetika; takomst: siz it mar.

Hwa moat by hwa?

Jo moatte it sels mar oankrúskje.

LIEUWE:	by WYTSKE	sjoch 3
	by ANKE	sjoch 5
	by YVONNE	sjoch 7
GEORGE:	by WYTSKE	sjoch 1
	by ANKE	sjoch 9
	by YVONNE	sjoch 4
KLAES:	by WYTSKE	sjoch 2
	by ANKE	sjoch 6
	by YVONNE	sjoch 8

1.	George lûkt de skoech oan dy 't Wytske oanrikt. Se knibbelt om to helpen. It boarstwurk fan it forkeapsterke is sa op it earste gesicht ymponearjend, tinkt George. Wol earne oars wol ris in twadde gesicht. Docht har in útstel. Né, seit Wytske. Se tinkt oan de buorkerij fan Lieuwe (sjoch 3). Minne kar, lêzer.
2.	‘Us Wytske sil trouwe, master’. De mem wie optein. Klaes hat doe mar in kaertsje stjûrt (sjoch 3). To let, lêzer.

[p. 48]

3.	Se rinne mekoarren op in hast klassike manier tsjin it liif. Lieuwe moat in pear nije skuon ha en bilannet by Wytske yn 'e winkel. Om 't Lieuwe ûnbidich greate fuotten hat poneart Wytske de ôfsage grapkes fan har fak. Lieuwe lykwols laket him slop en fan 'e weromstuit reitsje se oan de praet. In wike letter komt Lieuwe om in pear learzens. Wer in wike letter: klompen. Wytske leit Lieuwe nei seizen yn in cafétaria út, dat in skuonnesaek hjoeddedei gjin klompen mear forkeapet. Wist Lieuwe ek wol fansels. De kaerten binne lein en it spul bigjint. Risseltaet: Wytske wurdt boerinne! Geweldich, lêzer.
4.	Dizze twa binne al goed tsien jier meiinoar troud. Net folle fan to sizzen dus. Of dochs wol? (sjoch 1-8). Goede kar, lêzer, Jo hawwe der forstân fan.
5.	Liket nearne nei, lêzer! Anke libbet yn in wrâld, dêr 't Lieuwe neat to sykjen hat. En omkeard: Lieuwe is foar Anke allinne ynteressant as forskynsel ‘boer’. Anke docht oan psychology en dat hat mei kij neat to krijen, neffens Lieuwe. Né, né, lêzer, better neitinke.
6.	Anke is lektrise psychology. Klaes studeart pedagogyk. It soe in goede basis wêze foar in forhâlding. Mar Klaes is in strieminne learling. En dat is krekt hwat men net by Anke wêze moat: minne learlingen hawwe gjin rjocht fan bistean, dy bistean dus ek net. Klaes by Anke is folslein ûnmooglik, hwant lucht en mateary foarmje gjin ienheit. It spyt my lêzer, mar dit alles koenen Jo net witte.
7.	Yvonne hat it net op boeren stean. Tja... der binne nou ienris sokke minsken, lêzer.
8.	Klaes op âldenbisyk. Moetet Yvonne as mem fan Jacqueline. Hat it mei in healûre wol sjoen en wol opkrasse. Yvonne hat moaije knibbels. As se eefkes letter dy knibbels faninoar docht sjocht Klaes dat de ljedder oan it krússtikje fan hat penty tarint. Hy

[p. 49]

knapt ôf en klimt skriemend yn de steande skimerlampe. Wurdt neat, lêzer.

9.

In party by freonen. George heart fan de heerdeshuizes dat it wyfke dêr yn de hoeke dra. Anke Bijsterveld is. Psychologe mei tige fiergeande ideeën oer de forhâlding man-frou. George wurdt prikele troch dy wittenskip en sil dat minske wol ris eefkes moares leare. Spitich foar George is, dat er krekt in buorrel tofolle op hat en dat Anke breanofteren is. Yn elk gefal: Anke faget de flier mei George oan. It is dúdlik lêzer, dat dit noait hwat wurde kin.