Trotwaer. Jaargang 1

[p. 278]

R.R. van der Leest / Sunder salt

Joop Boomsma: ‘Frysk Om Utens’ Gouderak (Z.H.), 1969.

Joop Boomsma is by myn witten de tredde Fries om utens dy't syn dichterlik heil yn in pamflet siket. Tsjerk Veenstra en ûnderskreane gyngen him foar.

Boomsma, in ‘jonge fan krekt nei de oarloch’, is (hoe kin it oars) ûnderwizer. To Gouderak (ZH) en ‘hy formakket him dêr bêst’. Hy warskôget de lêzer fan syn pamflet FRYSK OM UTENS syn ferskes net to swier to nimmen. (‘né, né, it binne gjin gedichten, né, né’). Dêrmei slút er him by syn foargongers oan.

Yn it smelle hege pamflet binne 13 ferskes en ien siklus opnommen. De siklus binhannelt de sawn dagen fan de wike. Boomsma brûkt de praettoan en it understatement. Mar praettoan en understatement allinnich binne net genôch om in gedicht, sels net om in goed ferske to skriuwen. De nochtere konstatearring moat trochkringe ta in djippere laech. Boomsma wit foar my net dy djippere laech to suggerearjen.

‘woansdei
fjouwer wike lyn
stoar myn pake
beppe skilet in
soad minder ierpels
hjoed’

De 13 ferskes kin men 3 soarten yn ûnderskiede. Ympresjes, oertinkings, ien ready-made. De ympresjes steane wol inkelde aerdige rigels yn: ‘de wyn kaertet mei beammen en struken’. Mar dy kinne it brek oan ûnderlaech net goed meitsje. Der stiet allinnich hwat der stiet, en dat is to min. By in skilderij soe men sizze: it is ferve bleaun.

Sa ek de oertinkings. Se forwurdzje ôfsage ûnderwerpen. Nou wit ik

[p. 279]

wol, hast alle ûnderwerpen fan oertinking binne ôfsage. Just dêrom is it sa wichtich hoe't men it seit. Boomsma syn wize fan sizzen docht my neat.

De ready-made is in opsomming fan tsien Ford-modellen. Folle kin ik der net fan sizze. Boomsma siket it yn auto's, lyk as oaren it yn kleuren of nylons sykje. 't Is mar hwer't men fan hâldt. Mar ready-mades sizze suver neat oer de dichter sels.

Dêrom spyt it my dat ik dit ferske noch it aerdichste út Frysk Om Utens fyn. Ik hie leaver ien hawn dêr't Boomsma persoanlik yn oanwêzich wie. Miskien kin er him biheine ta ûnderwerpen dêr't syn gefoel mear by bitrutsen is. Muzyk bygelyks. Syn ferskes oer The Dutch Swing College Story (De Strikel, nov. '68) en The Bird (Trotwaer, febr. '69) foun ik folle fijner.

Oan't sjen, Boomsma, hooplik mei wurk dat persoanliker is.