Trotwaer. Jaargang 1

[p. 147]

Steven de Jong / Genesis safolle

troch tichte ruten sige lûden fan 'e strjitte
tûzenen sykhelje yn in net to biskriuwen
monotony
as wjerkôgjende dieren weidzje har gedachten
yn 'e skepping om
ûntofreden frouweliven dreame fan in hegere status
profeten sûpe al protestearjend de bast fol jenever
en rinne mei glêzige eagen troch de strjitten
mar jan hat hjoed foar 't earst
forkearing mei nynke
har lok is ek net to biskriuwen
why not
idealisten wurde as schizofrenen neffens it boekje
therapeutysk bihandele
ûnderwilens wurdt in vietkongsoldaet mei gleone
priemmen biwurke
op dat stuit docht de evolúsje
IN GREATE SPRONG FOARUT
de gemiddelde nederlanner
ploft fan fetsucht út mekoar
de widdouwen geane yn bikini
op bigraffenis
se plege iepenbier
wanhopich ûntucht mei de deagravers
sjòdêr
de nije bondel fan steven de jong wurdt in bestseller
men mei wer gûle en
ûngelokkich wêze
it libben is in stadige dea
dêrom
jan en nynke rane gear yn 'e sawnde himel
mar gelokkich net foar ivich

[p. 148]

Ballade

nei it safolste mislearre libben bloes ik
kocheljend en rocheljend
de lêste sike út en
spielde oan op it strân
fan elysium
in kuoltsje aeide my oer de neakene lea

gjin nikotinefingers mear
gjin fetsucht
gjin krupsjes mei hert en lever
in soun en krêftich jongfeint
mar wanhopich allinne
en gûlend lei ik
op 'e knibbels yn it sân
de holle yn 'e hannen

doe fielde ik in hân op myn hier
sêfter as in mennehân
en ik hearde
- leafste nacht en dei haw ik foar dy bidden
en ik seach
en ik oanskôge
DE FROU
fan hwa't de namme my to leaf is om út to sprekken
mar dy't ik altyd by my wist
har skientme wie net to biskriuwen
(dat sil ik dan ek net dwaen)

lykwols
ynienen
fol walge kearde hja har ou
ik hie myn toskepoetsersguod forgetten
nea haw ik har wer sjoen

[p. 149]

 

sûnt

 

bid ik

 

hear

 

jow my toskepoetsersguod

 

forjow my myn sûnden en

 

jow my toskepoetsersguod

 

as jou keninkryk komt

 

jow my dan toskepoetsersguod

 

oars sille alle minsken lokkich wêze

 

útsein ik

 

hwant

 

ik haw gjin toskepoetsersguod

 

alle minsken sille jo loovje o hear

 

hja sjonge

 

loovje de hear

 

ikke net

 

hwant

 

ik haw gjin toskepoetsersguod

[p. 150]

Blêdfolling