Trotwaer. Jaargang 1

[p. 41]

[Nummer 2]

Redaksioneel kommentaer

L.C. 15-2-'69

Wy hawwe in wykmannich forgees wachte op it earste nûmer fan it Frysk literair tydskrift ‘Trotwaer’, dat ‘De Tsjerne’ opfolgje sil, om dat oan de lêzers foarstelle to kinnen yn dizze rubryk. It is nou mids febrewaris en noch is it jannewarisnûmer der net. It is net 't ‘rotwaer’, dat ‘trotwaer’ sa min to gean makket. De redaksje moat administratyf en redaksjoneel noch hwat op 'e gleed komme en der hawwe hwat typografyske tûkelteammen west, sa die fan 'e wike bliken, dy't der de oarsaek fan wurden binne, dat it earste nûmer oerprinte is. De uterlike foarmjowing fan it earste nûmer wie, noch de redaksje noch de útjowerij N. Miedema en Co to Ljouwert nei 't sin. De útjowerij hat doe rojael oanbean om it nûmer alhiel oer to setten. It jowt hwat opûnthâld, mar hja wol mei dit earste nûmer sa goed mogelik foar 't ljocht komme en soks stiet har to priizgien. Mei namsto mear niget sjogge wy út nei it earste nûmer.

L.C. 13-2-'69
Earste nûmer ‘Trotwaer’ moat oerprinte wurde

De hiele oplage (ûngefear 550 eksimplaren) fan ‘Trotwaer’, de fuortsetting fan it literaire tydskrift ‘De Tsjerne’, sil op 'e nij printe wurde moatte. Doe 't redakteur Leo Popma dizze wike in eksimplaer ynseach, bliek dat men by de printer, N. Miedema en Co to Ljouwert, alle kopij efter elkoar oan set hie, sûnder foldwaende romte to litten tusken de opienfolgjende proazastikken, biskôgings en poëzij.

De hear Popma koe him net mei dizze wize fan opmaek forienigje. Mei de printer is nou oerienkommen dat de hiele oplage dizze wike op 'e nij printe wurde sil. Oan de ein fan de wike, is it doel, sil it jannewarisnûmer útkomme. De útjower sil de lêzers op in ynlizfel ûntskuldigingen oanbiede, wylst oankundige wurdt dat it febrewarisnûmer dizze moanne ek noch forskine sil.

De redaksje fan ‘trotwaer’ hat yn syn gehiel krityk levere op de opmaek fan it earste nûmer, sa't dat to kommen stie.

N. Miedema & Co., sels der ek net tofreden oer, hawwe op eigen inisiatyf bisletten ta oerprintsjen.

Soks liicht der net om! Dus lige wy der net om.