Logo DBNL
Trou moet blijcken. Bronnenuitgave van de boeken der Haarlemse rederijkerskamer 'de Pellicanisten'. Deel 5: Boek E (1994)

Trou moet blijcken. Bronnenuitgave van de boeken der Haarlemse rederijkerskamer 'de Pellicanisten'. Deel 5: Boek E

(1994)–Anoniem Trou moet blijcken–rechtenstatus Auteursrechtelijk beschermd

Vorige Volgende

[Die Mensch wil die werlt bevechten]

+Een Spel van Sinnen hoe die Mensch Die werlt wil bevechten en compt uuijt heel gestoort weesende met een swaert half uuijtgetrockken ende seijt

 
Hij salder nu blijven dats een voor al
 
Sijn Wijff genaempt Wat achterdinckens
10
Hij en sal off godt wil
Die Mensch
 
Gans Doot hij sal
 
ick wil hem in dusent stuckken kerven
Twijff
15
Och wildij ons en al ons kinderen bederven
 
wat wildij maeken ons is naekende groot verdriet
 
och sijt toch te vreeden
Die Mensch
 
Ick seg u hout mijn niet
20
gans Longeren siet / ick sal sijn Leven minderen
 
waer is hij waer is hij
Twijff
 
Och denct om u wijff en cleijne kinderen
 
om u beesten om u rinderen / wat wildij bedrijven
Die Mensch
 
Neen dats verlooren hier en baet geen kiven
 
Laten Leven / tjan ick en sal / dat sout ick meenen
 
ick sal hem aff howen / hooft armen en beenen
 
Loopt hij dan daer heenen / tsal sijn tsijnder bate
Twijff
 
Hij mach hem wel vervaren
Die Mensch
 
Hij mocht willen dat hij sate
 
op ooltges plate / hij mach wel sijn bevreest
35
wist hij wat hem naecte / hij gaff wel sijn geest
 
ick sal den beest gelijck Den slecken / speten
 
bij gans hanepooten
Twijff
 
Machmen niet die pleckke // weeten /
40
eer ghij hem gaet die / neckke // meten // met veel geweens
 
wie wildij toch slaen man
Die Mensch
 
Dats alleens
 
niette min men moetent toch weeten voor off nae
45
tis Die werlt
Twijff
 
Die werlt segdij
Die Mensch
 
Jae die werlt Jae
50
die sal wel drae // craeken een quae noot
 
hij moeter blijven
 


illustratie

 


illustratie

+
Twijff
 
Hoe wilt ghij die werlt doot slaen / Jae ghij wilt godt
55
ick hoorden sonder spot / noijt sotter bestaen dan datte
 
eij arme knecht
Die Mensch
 
Ick salt doen siet bij ons catte
 
want ick weet / soo ick scatte // dat hij voor mijn vermaen // beeft
Twijff
 
Wat heeft hij bedreeven
Die Mensch
 
Wat hij gedaen heeft
 
noijt Iemant en wasser / soo quaet van werken
65
dat soudij wel haest weeten en merken
 
ginckt ghij als ick ter kerken / sonder Licht off Lantaerne
Twijff
 
Ghij ter kerken Jae off in die taverne
 
daer sijdij gaerne / daer soudtmen u vinden eer
70
wanneer waerdij Laest ter kerken
Die Mensch
 
Vraechdij wanneer
 
een sonnendach hoorden ick daer wonder bij gans bier
 
waer is die hoerrisen Jae hadt ick hem hier
75
ick deet hem wel schier / Die siel vervliegen
Twijff
 
Jae man men seijt veel
Die Mensch
 
Wel hietij ons prochiaen Dan Liegen
80
sow hij ons bedriegen / ick waen neen / dat ghijt verstaet
 
hij seijde die werlt / was valsch fenijnich en quaet
 
vol bedrochs en misdaet / Jae een moordenaer
 
een dieff een boeff // een onverlaet / en een verraer
 
een tiran ongenaedich van quaeden bedrijve
85
sout ick sulcken een Laeten te Live
 
bij gans vive Daer ick meester ben vanden dorpe
 
hij heeftet verdient Dat ick hem verworpe
 
en expediere hij is besmet met crijme
 
als ick hem nu heb aen mijn vlijme
90
dan sal ick met hem een camp beslechten
Twijff
 
Waij Lieve man wildij tegens die werlt vechten
 
serteijn dit waer een Dwaesselick feijt
Die Mensch
95
Tjan onse prochiaen heeftet selfs geseijt
 
dat ick bereijt die werlt sow bespringen
Wijff
 
Jae Lieve man meendij hem alleen te dwingen
 
noijt sotter dingen / ghij sijt veel te slecht
100
om sulcxs te Doen
Die Mensch
 
Segdij alleen en heb ick niet ons knecht
 
est dan niet tegens hem goet genoch met ons tween
 
waer sijdij knecht
+Een dienaer als een serjant ende hiert verblintheijt
 
Hier ben ick meester waer sal ick heen
 
als u Dienaer altoos tot uwen beveele
Die Mensch
 
Wij moeten gaen campen
Wijff
 
Jae goodts heb Deele
 
tegens Die hanen / tsal sot begonnen // sijn
Die Mensch
 
Gans Longeren gans Longeren die werrelt moet verwonnen // sijn
 
van mijn verslonnen / sijn // neempt hier op merck
Twijff
 
Die werlt Lieff man is u veel te sterck
120
al waerdij een staelen serck / ghij sulter blijven
 
arm dwaes wat coendij tegens Die werlt bedrijven
 
swerlts beclijven / heeft veel volcxs vernielt
Die Mensch
 
Hij veel volcxs
Twijff
 
Jae meer dan hier nu crielt
 
jae al warense noch thien Dusent dicke
Die Mensch
 
Waij die en waren niet soo vroom als ickke
130
die werlt mijn vernielen / neen hij bij gans bloe
 
daer weet ick al een ander cunsjen toe
 
en sal hem bespringen onversiens sonder draelen
 
hier knecht Loopt ras / wilt mijn harnas halen
 
ick sal sonder falen mijn wapenen tegens Die gast
Die knecht
 
Wel meester
Twijff
 
Man Tis verlooren geharnast
 
ghij wert vermast / al condij als een valck vliegen
140
die werlt sal u int eijnde bedriegen
 
en doen u vertreckken / sonder Trompet
knecht
 
Hier is tharnas meester
Die Mensch
145
Dats goet en wel op gelet
 
+her her off sij vernaemen die Lucht
 
een dinck moet gedaen sijn metter vlucht
 
ick sal hem doot slaen off te minsten cruepelen
 
och sweetgaten hoe sal hem sijn Longergat popelen
150
van vreese off hij conde verschoonen dees saeke
 
hoe heet Dees Jaeke
knecht
 
Sij heet gemaeke
 
en dit huijsken hovaerdije nae uwen eijsch
Die Mensch
 
En deese gordel
knecht
 
Wellust Des vleijs
 
en dit is Die stock Daer sampsons cracht in Leijt
 


illustratie

 


illustratie

+
Die Mensch
 
Hoe heet die Toch
knecht
 
Alle quae genegentheijt
165
noijt man en hoorden van meerder crijme
Die Mensch
 
Snijt hij wel
knecht
 
Jae gelijck een vlijme
170
het sow Doersteeken / hoe sterck dattet ware
Die Mensch
 
Ick ducht hij nu sterven sal van vare
 
eer ick hem nare / her her fluxs bij gans Lijff
 
segt nu dat ghij vlus seijde eij sotte wijff
175
ha ha ha ha Den catijff sal ick nu Loonen
 
hoe behaech ick u nu
Wijff
 
Ghij dunct mijn nu gestelt om inde boonen
 
die craijen te hoonen als nu ter tijt
Die Mensch
 
Die craijen hoonen ghij spreect met verwijt
 
ghij sijt niet Edel / Dus condij niet bevroen
 
die craije segdij / siet een man sow garen doen
 
een feijt van wapenen / alder cloeckheijt vol
185
wat Lijck ick nu van achteren
Wijff
 
Maer een noortsche drol
 
die scut sijn bol tegens die wint die waijt
Die Mensch
190
Een noortschen drol Dats wel gepaijt
 
gans tanden wat ghij craijt / dats quaelick geclapt
 
hij wert van mijn noch in stuckken gecapt
 
als pasteije vleijs gescrapt // tsa tsa ick gae nu beginnen
Wijff
195
Segt mijn Lieff man / hoe suldij die werlt kinnen
 
om hem te vinnen / behoefdij wel een Lange vlage
Die Mensch
 
Ja waerom dat
Twijff
200
Want die werrelt verkeert van dage tot dage
 
van habijten / van seeden / van alle bestaen
Die Mensch
 
Dats waer en voort soo seijt ons prochiaen
 
datse wert hoe Lanxs hoe arger van bedrive
205
soutmen sulck een Laten ten Lijve
 
twaer gescaepen / Liet ick hem volherden
 
tsow int ende noch veel arger werden
 
dat moet ick beletten eens voor al
Wijff
210
Eij Laet toch die werlt / Die werlt sijn
Die Mensch
 
Bij Loo ick en sal
 
+al mocht / hij doer felheijt / noch soo boos sijn
215
her tsa / tsa / tsa
Twijff
 
Die werlt Lieff man sal u veel te Loos // sijn
 
tsal een blaewe coes // sijn // op mijnder sielen
 
ghij sult niet bedrijven
Die Mensch
 
Ick sal die werlt vernielen
 
sijn darmen doen scielen / ten baet geen smeeken
 
hij blijfter gewis
Wijff
225
Maer man ick hoorden preeken
 
dat in tijen voorleeken // Die werlt verdranck
 
en dat hij ten Lesten / tot sijnen uuijtganck
 
sal vergaen tot niet / Dit was sijn motijff
 
en dat metten viere
Die Mensch
 
Dat en acht ick niet wijff
 
die dat sprack was mogelick beveijnst
 
sij en hebben denck ick om mijn niet gepeijnst
 
die werrelt blijfter / eer den avont genaect
Wijff
 
Man godt heeft Die werlt gemaect
Die Mensch
 
En ick sal hem weer ontmaeken / wie dattet Laect
 
hadt hij beter toe gesien / thadt geweest veel bat
240
hadden godt int scheppen mijn geest gehadt
 
hij hadtse gemaect op een ander faetsoen
 
maer hij wilde alleen nae sijn wille Doen
 
nu sal ick hem in dusent stuckken kerven
Wijff
245
Och dees man sal die werlt bederven /
 
maer als ghij die werlt dus hebt doen dalen
 
waer sullen wij Dan weer een ander werlt halen
 
wilt mijn Dat vertaelen eer dattet te Laet // is
Die Mensch
250
Wat hebben wij te doen mettet geen dat quaet // is
 
toncruijt is best wech eert compt ten banne
 
bol inde biesen / eijeren in die panne
 
soo sullender geen quae kuijkens uuijt spruijten
Wijff
255
U begrip dunct mijn niet veel te sluijten
 
hout toch in muijten u sotte vermaen
 
want soudij soo danigen werck bestaen
 
sonder reden tansien Der wijser vrowen
 
tmach niet wel geluckken
Die Mensch
 
Bat neen ick in Trouwen
 
dat mocht mijn berouwen // daer hadt ick niet op gedacht
 
ick wilse gaen soeken / alle mijn macht
 
en dach ende nacht / over die werlt claegen
 


illustratie

 


illustratie

 
+vrijlick ten sal haer niet wel behaegen
 
ick moet haer vraghen / trecht / bij goeder avijse
 
op dat sij hem aen mijn handen wijse
 
en smijten hem dan thooft aff / met een snappe
270
heij ick stae hier / veel te Lang en clappe
 
dus wil ick mijn straxs // doer gaen steeken
Wijff
 
Maer suldij Die werlt niet eerst Laeten spreeken
 
sijn biecht / eer ghij hem sult ontlijven
Die Mensch
 
Ick sow hier wel Lang dus clappende bliven
 
neen ick gae Loopen / op oft soo geviele
 
dat ick Die reden vonde
Wijff
280
Nu adieu godt heb die werlts siele
 
gaet heenen / ghij moecht wel wederstoot hebben
Die Mensch
 
+Nu knechte sal ick van achteren oick noot // hebben
 
sieter nae / mijn mochter Door coomen verdriet
285
want ghij weet toch wel ick en sie van achteren niet
 
en quaem hij van achteren daer ick voor grou
 
ick sow Doot sijn eer ickket weeten sou
 
dus siet wel toe / want niemandt sijn viant spaert
knecht
290
Meester ghij sijt aen alle sijen wel bewaert
 
men mocht u niet beter ter oorloch uuijtrechten
 
al woudij gaen in dach huren vechten
 
elck sal als Den slechten voor u weesen blaew
Die Mensch
295
Hoe staet mijn aensicht
knecht
 
Ick wert selfs schier flaew
 
als ickket aensie Dat moet ick verclaeren
 
die viscken inde see souden van u vervaren
300
ghij siet al soudij Die Duvel binden
Een vrowe Sittende in een stoel taelwaerdich gexalteert met eenen rechters roede in die handt genaemt redene Noch een ander vrowe oick tamelick geexalteert met eenen spiegen inde hant genaemt kennisse Noch een ander vrow met een swaert inde hant ende heet Justicia ende sitten beijde wat Lager als Reden
Redene
 
Door kennisse salmen recht ontluijken
310
mits redene Die moet gaen voor al
 
recht met redene puniert Die misbruijken
 
doer kennisse salmen
 
al mach kennisse hoeren aert eerst niet op stuijken
 
daer moet reden sijn / Daer recht sijn sal
315
door kennisse
 
mits redene
 
dees Drie maeken een perfect getal
+
knecht
320
Wat segt ghij meestere
Die Mensch
 
Ick roep als een dieff inde paerde stal
 
gans moort hier isser al meer dan een
 
maer wat Leijter an ick moeter heen
325
en bestaent onversaecht / ick ben cloeck gehavent
 
Joffrowen godt geeff u alle gader goeden avont
 
ick sow soo gaerne met u eens spreeken
Reden
 
Trouwen dat en sal u niet gebreeken
330
sijt wellecoom vrient / en dat tot uwen wensche
 
maer hoe heet ghij wie sijdij
Die Mensch
 
Ick ben die mensche
 
en ick heb nu wel goen raet van doene
335
dus coem ick bij u
Redene
 
Segt op vrijhartich met moede coene
 
ick sal u nae u verstant wel berechten
 
hoe coomdij Dus gewapent
Die Mensch
 
Ick wil tegen die werlt vechten
 
en sonder vertreck hem doot gaen slaen
Redene
 
Die werlt segdij / wat heeft hij u misdaen
345
wilt ons Daer aff tvermaen / met verstant / uuijtleggen
Die Mensch
 
Dat sal ick u seggen
 
ghij en hoorden van niemant meer ongerijeff
Reden
350
Segt op Laet hooren
Die Mensch
 
Joffrow hij is een Dieff
 
een straetrover / Jae men vint geen quaedere
Reden
355
Een dieff segdij
Die Mensch
 
Jae een verradere /
 
een groot misdadere / ende een bedriegere
 
een onverlaet ende een valsch Liegere
360
hij is een Idele sack / gestoffeert met giericheijt
kennisse
 
Die mensch hoort wel te sien wat hij seijt
 
want met sulcke woorden wert den mensch gevangen
 
hem selven brengende in groot verstrangen
365
dit behoort hij selver wel over te peijsen
Die Mensch
 
Joffvrow ick hebt gehoort wel seven reijsen
 
onse prochiaen seggen op die stoel
Reden
370
U prochiaen en ghij hebt mischien een divers gevoel
 
hout u wat coel / ghij hebt quaelijken verstaen die gront
Die Mensch
 
Hij seijdent opentlick meendij dat ickket niet verstont
 
ick peijns goet ront dat ick oick wat grondeeren can
 


illustratie

 


illustratie

 
+off meendij dat ons prochhiaen / wel Logens stoffeeren // can
 
en die warheijt verneeren can / soo behoortmen hem scerpe
 
daer aff te straffen
Reden
380
Ghij slacht den esel die speelt op die herpe
 
ghij weeter een Luttel off / en dat niet veel
 
maer hebdij tsermoen oick uuijtgehoort geheel
 
van tbegin ten eijnde / sonder elders te spueren
Die Mensch
385
Ick mach soo Lang inde kerck niet Duren
 
ick sout besuren oick doe ickket niet gaerne
 
ick Liep uuijtet sermoen / in die taverne
 
bij mijn Lagenoots / en ginck heur Dit vercleeren
Reden
390
Wij verdragen u Den eet ghij behoeft niet te sweeren
 
wij gelooven daer aff wel / al u vermeeten
 
maer hoort noch een dinck dit moet ghij weeten
 
die werlt is goet Dat is een ander sermoen
Die Mensch      Reden
395
Goet segdij -      Jae goet
Die Mensch
 
Dat sow Die Duvel Doen
 
hoe heeft onse prochiaen dan geloogen
Reden
400
Waert noot ick sout u met redenen betogen
 
en verheffen dat ghij Dus Lelijck misprijst
 
wat salmen die werlt Doen
Die Mensch
 
Maer dat ghij hem verwijst
405
in mijn handen om te doen sterven hier
 
als meijer en sheeren officier
 
van mijn Dorpe / want Doer sijn gebien
 
soo moet ick al die hoven doerwien
 
en waer ick eenich quaet weet / onder ander cruijt
410
+dat wil ick te niet Doen en roijen uuijt
 
Jae in wiens hoff dattet mach sijn geplant
Reden
 
Or cha heer meijer ick heb nu tverstant
 
nu dat ghij sijt soo ghij hebt geseijt
415
officier van dees plecke / soo geeff ick u autorijteijt
 
als redene in mijn susters presencie
 
dat ghij hier in de stoel der consiencie
 
sult sitten en van dees werlts sneeven
 
selven oordele / en vonnisse sult geven
420
die ghij Dus quaet hout ende verkeert
Die Mensch
 
Ick bens te vreeden / I goo nu adieu werlt
 
wist hij Dit hem mocht wel wee sijn te moede
Reden
425
Nu heer meijere hout daer die Roede
 
geeft nu vonnisse soo sijdij te rustere
 
nae u gevoelen / en Justicij mijn sustere
 
sal Dexecutij Doen / oprecht en net
 
soo ghij vonnist
+
Die Mensch
 
O nu ben ick een cadet
 
wel wel / nu weet ick wat ick bedrijven // sal
 
ick meen dat die werlt / nu daer bliven // sal
435
al waer sinte pieter / sijn vrunt // mach hem niet baten
 
or cha werlt om u quaetheijt boven / maten
 
diemen opentlick aen u Dagelicxs siet blijken
 
want ghij vol bedrochs sijt / en vol valsche practijken
 
wel overtuijcht / Die boven regel gaen
440
van Luijden van naem en faem en van ons prochiaen
 
soo verwijs ick u werlt / om te bederven
 
sonder vertreck
Justicia
 
Jae waer toe
Die Mensch
 
Maer dat hij sal sterven
 
dalder quaetste Doot / Diemen versiere
 
gehangen geraebraect / off metten viere
 
verbrant te sijn van u Justicij geingient
Justicija
 
Die punicij es groot
Die Mensch
 
Die werelt heeftet wel verdient
 
Jae hondert Dooden fel en afgrijs
Redene
 
Nu heer meijere es Dit u avijs
 
u goedt duncken nae u woorden bekent
 
en u uterste mening met volle consent
 
dat Die werlt dus wreedelick sal werden vergouwen
460
nae uuijtwijsen sijn misdaet
Die Mensch
 
Jaet in Trouwen
 
en begeer dat Justicij wijs int bevroen
 
hier present sijnde / Die execusij sal Doen
465
nae mijn woorden voorsprooken sonder anders tontwinden
Kennisse
 
Maer waer salmen Die werlt vinden
 
op dat ten inden Die Justicij mach geschien
 
daer Leijt Die cloot
Die Mensch
 
Vinden / tjan dat staet te besien
 
twaer goet datmen een bode sonder stricke
 
nae hem stuerden
Justicia
475
Ghij most hem Leveren
Die Mensch
 
Hoe Leveren wie ickke
 
Leveren / bij Loo / tvonnis daer niet aff vermelt
 
waer sow ick hem vinden
Reden
 
Ghij hebter u Immers tegens int harnas gestelt
 
om met gewelt te bevechten / es hij noch te soeken dan
Die Mensch
 
Ick weet niet waer hij is
 


illustratie

 


illustratie

+
Justicija
 
Hoe wildij hem vervloeken // dan
 
off wildij vechten en doen verdriet
 
tegens eenen Die ghij niet en siet
490
waer issij Daer ghij om drijft geschil
Die Mensch
 
Tjan ick en weet
Redene
 
Dit dunct mijn sijn een vreemde gril
495
wie wildij Dus Doot slaen wie is Dus verkerlt
 
segt mijn toch datte
Die Mensch
 
Maer tis die werlt
Redene
500
Waer is die werlt
 
wie is Die werlt / Dus vol confusen
 
sijnt bergen / velden / casteelen / off huijsen
 
water Lucht / vier / vucht / cout off heet
 
doet daer aff bescheet
Die Mensch
 
Tjan ick en weet
 
die werlt / ontbeijt // Dat moet ick over Leggen
kennisse
 
Noempt Die man
Die Mensch
 
Ick en weet wat seggen
 
die werlt ick bender uuijt / ick weet bu noch ba
 
die Lucht / Die velden / Die huijsen / wa / Jae
 
ick en cans niet naeder noch bet verstaen
Redene
 
Maer wat quaet hebben u die velden gedaen
 
sij brengen haer vruchten jaerlicxs inden bou
 
die Lucht geeft soete ende nootelijcke Dou
 
huisen / cluijsen / en casteelen / obedieren
520
u mensch en Laeten u Daer in Logieren
 
tegen wolven en gieren tempeestich smijten
Die Mensch
 
Dat is waer
Redene
525
Wat hebdij dan die werlt te wijten
 
dat ghij hem wilt slijten / Door u boosheijt
 
waer blijct hier in valscheijt moort ofte Loosheijt
 
quae practijken off sulcke gebreeken
 
Liegen / bedriegen / Die niet coonen spreeken
530
off Iemant hinderen / het blijct Int claere
Die Mensch
 
Ick wou dat ons prochiaen hier ware
 
ick sow hem doen ethen al Dat Liegen
 
tjan heere ghij souter soo veel bedriegen
535
hij seij hij was infect gefenijn als die nevele
 
ke godt geeff die paep het vallendt evele
 
dat hij vercrevele / hoe dee hij mijn bestaen dit feijt
+
Justicija
540
U prochiaen heeft wel en eerlick geseijt
 
maer ghij verstont die woorden metten slechten
Die Mensch
 
+Wae hij seijden mijn men sow tegens die werlt vechten
 
en verwinnen hem / als viant openbaer
kennisse
 
U prochiaen certeijn Die seijden waer
 
ghij sout wel Doen dedij nae sijn gebien
Die Mensch
 
Jae waer is Die werlt
Redene
 
Kennisse Laet hem sien
 
die werlt het hooft van alle quae werken
kennisse
 
Gaerne suster / comt wilt herwaerts merken
555
in dese spiegel / Die ick kennisse tooch
 
ghij sulter die quaede werlt in sien die niet en dooch
 
neemt wel inden spiegel / bidt ick uuijt minne
 
het rechte gemerck
Redene
560
Wel wat siedij
Die Mensch
 
Ick en sieder niet inne
 
dan mijn selver en geen ander op stel
Redene
565
Certeijn ghij siet oprecht en wel
 
mensche u gesicht heeft die claerheijt
 
want ghij sijt Die werlt
Die Mensch
 
Segt mijn dan van dien Die waerheijt
570
wie is Die werlt dat ickker op mickke
 
om te bevechten
Justicija
 
Ghij sijt Die werlt
Die Mensch
575
Wie ickke
 
ick Die werlt / waij dats een vreemde grol
kennisse
 
Jae ghij sijt die werlt alle archeijt vol
 
daer u prochiaen off seijden al acht ghijt niet een Lensche
Die Mensch
 
Weet ghij wel wie ick ben
Redene
 
Ghij sijt die mensche
 
die De werlt sijt soo die philisoph seijt
585
ghij sijt minocismus gequaliteijt
 
fijn nae die groote werlt vroech ende spae
 
soo ovidius scrijft in Libro de vetuta
 
gelijck mennich groot clerck in sijn Lesse Las
 


illustratie

 


illustratie

+
Die Mensch
 
Wie goet Jaer / seij mijn dat hier kennisse was
 
ick Die werlt / waij dat dunct mijn niet reijn
 
ick cans niet bevroen
kennisse
595
Mensch ghij sijt die werlt certeijn
 
oft u quaelick off anders genoecht
Die Mensch
 
Siet mijn hier sitten ick wert gewroecht
 
int herte Doerploecht / wat gae ick nu maeken
600
sow ick Die werlt sijn / soo sow mijn pijn genaeken
 
en most bescaemt in mijn pack gaen Luijpen
 
ick sie hier soudet int eijnde op mijn selven druijpen
 
wie hoorden oijt sulcke stuijpen maer segt mijn noch bat
 
hoe sou ick Die werlt sijn
Reden
 
Soo Luijstert dan wat /
 
ghij sijt die werlt nae u pastoors gewagen
 
vervult tot boven toe met alle quae plaegen
 
want doer die materiael werlt / mach geen arch geschien
Die Mensch
 
Hoe sow ick Die werlt sijn
Redene
 
Ick salt u bedien
 
gelijck Die materiaele werlt is gesticht
615
hebbende eenen hemel verciert met Licht
 
seven planeeten genoomineert aldus
 
sonne / Mane / venus / Mercurius
 
Mars / Juppiter nae des zedrax Loop
 
saturnus / en die sterren over hoop
620
en den hemel Daer boven crijstalijnen
 
noch den Imperium Dese alle scijnen
 
in u mensche die De cleijne werlt sijt
Die Mensch
 
Schijnen die in mijn
Redene
 
Jae hoort onvermijt
 
wat ghij int ront siet // Dat is die werlt groot
 
daer bij is geleeken o mensch u hoot
 
waer in soo ick heb voor sprooken
630
seven planeeten expresselick sijn belooken
 
hoort ick sal u natuerlick betoogen
 
eerst son ende maen sijn beij u oogen
 
twee ooren venus en mars sijn gebleeken
 
sijn Juppiter en saturnus maer bij den mont
635
mercurius en des hemels sterren goet ront
 
bij thare Des hoofts seer quaet om tellen
 
des sterren gesicht / Die des morali vermellen
 
maer den hemel crijstalijn es int voorhooft geplant
 
daer schijnt in verburgen memori en verstant
 
+bij den hemel Imperium thoochste van thooft
 
is oick onsienlick Daer in gelooft
 
soo rust memori goet en gepreesen
 
grondeert besiet / wat dunct u van deesen
645
mensch off ghij oick die werlt gelijct
Die Mensch
 
Wat sou mijn duncken mijn hert beswijct
 
ick Die werlt dit Dunct mijn vreemde curen
Redene
650
Inder werlts hemel is tweederleij berueren
 
deen des firmaments Dander der planeeten
 
desgelijcxs machmen in u Die cleijne werlt weeten
 
tweederleij berueren / discoort en onneens int feijt
 
dat is ratio ende sinnelickheijt /
655
altijt vallen dees / Den anderen rebel
 
strijdende tegens / Den anderen over Legt dit wel
 
off ghijt niet en bevint nae mijn belije
kennisse
 
Mensche certeijn die werlt sijt ghije
660
bij experiencie soo blijctet wel bloot
 
dat ghij die werlt sijt en van die werlt thoot
 
redelick gescaepen / Ten eersten vreedelick
 
al dander werlt is onneedelick
 
en om u redelijcke werlt dit toch wel smaect
665
es doneedelijcke werlt / om uwent wille gemaect
 
dat ghij moet kennen / Denct ende besiet
 
est niet alsoe
Die Mensch
 
Voirwaer ick en weet / ten behaecht mijn niet
670
+ick die werlt / dit dunct mijn een vreemt uuijtleggen
Justicia
 
Nu mensch wat wildij nu Daer op seggen
 
van die werlt / Die ghij op dese reijse
 
dus hebt vercleijnt
Die mensch
 
Daer sidt ick vast op en peijse
 
onse prochiaen crijcht noch het verwijt
kennisse
 
Hoe compt dat ghij Dus geharnast sijt
680
wildij die werlt nu ter tijt noch gaen beswaeren
Die Mensch
 
Jae en die purgeeren sonder eenich sparen
 
en alle weer spannige oick in sijn quartier
 
ick ben een Meijer / en een officier
685
die doen moet dat mijn heer mijn heeft geboon
Reden
 
Wat moet ghij dan doen
Die Mensch
 
Maer alle quaet cruijt uuuijtroon
690
uuijt alle hoven / hoe ruijt hoe groff
 


illustratie

 


illustratie

+
Reden
 
Maer hebdij selver geen hoff
 
daer spruijten en cruijen / in staen ons dat bediet
Die Mensch
 
Wat Trowen Jae ick
Reden
 
Hebdij die oick gewiet
 
es die al reijn / net ende verdruct
700
eer ghij Toncruijt / uuijt een anders hoofjen pluct
 
soo behoordij eerst merct dit wel vrij
 
u eijgen hoofjen Doersien / oft oick suver sij
 
en eerst gewiet hebben van alle onboon groot en cleen
Die Mensch
705
Mijn hoofjen dat is suver en reen
 
sout ick anderen vertreen / en corrigeeren
 
en selven noch alle quaet useeren
 
dat waer te deeren / noijt arger quaen
Justicija
710
Laet ons eens in u hoff spanceeren gaen
 
en sien eens aen tot eenijger stonden
 
off Die werlt Daer mocht gevonden
 
die ghij geharnast soect / met grooter onleeden
Die Mensch
715
Sou Die hoeresen Daer sijn ick ben te vreden
 
gaen wij Derwaerts / hij wert van mijn verplet
 
vindt ick hem in mijn hoofjen / mijn sal sijn te bet
 
Pausa
Die Mensch
720
Wij sijn hier geraect Den heer heb Loff
 
in mijn cruijt huis en Lustich hoff
 
hier siedij mennich bloemken divers van crachten
Redene
 
Wat bloemken is Ditte
Die Mensch
 
Tis een pensebloem men noemtet oick die gedachten
 
sonderling van crachten / Dier wel op past
Reden
 
Es dit Die schoonste Die in u hoff wast
730
hoe isse beclast soomen / can betoogen
 
dats een teijken dat dander niet veel en doghen
 
wat ou Dees sijn Lelick beplect
 
met quaeder coleuren heel overdect
 
Laet ghij Dit dus wassen in u palleijs
735
sijn dit u gedachten pense off gepeijs
 
hoe wast Die nae u sin mijn dat ondect
Die Mensch
 
Met allen wel
Reden
740
Ist soo soo ist goet
 
maect mijn toch vroet / dat bidt ick u uuijt minne
 
+u pense off gedachten sijn die in u sinne
 
even staech soot behoort / met goet besceijt
745
tot godt altoos en tot u salicheijt
 
oick tot uwen naesten sonder quaet van hem te spreeken
Die Mensch
 
Jae sout niet ..
kennisse
750
Nochtans dees vleckken sijn anderluij gebreeken
 
daer ghij op siet / als gramschap en thoren
 
oick gulsicheijt / en giericheijt / die ghij hoort te smooren
 
en bedeckken als u eijgen / sonder eenich verwijt
 
maer nu brengdijse int Licht Doer haet ende nijt
755
practiseerende alle quaet avont en morgen
 
ick weet sulcxs voor mijn es niet verborgen
 
est anders soo doet mijn die waerheijt vrij oopen
Die Mensch
 
Ick gelooff die gedachten meest derwaerts Loopen
760
maer wilt mijn ontknoopen / hoe coondij Dit weeten
kennisse
 
Ontlorsen / ontleenen / ontweegen / ontmeeten
 
bij nachte bij Daghe / Dit oncruijt is groff
 
waerom Laet ghij Dit wassen in u hoff
765
ghij diet in een anders thuijn begeert te verdruckken
Die Mensch
 
Beij beij ick sal wat anders pluckken
 
dat bet sal Luckken / wedt ick voor die hant
 
siet daer dat is overvloedich in mijn hoff geplant
770
wel bekent int Landt suijen en noorden
Reden
 
Wat cruijt is Dit
Die Mensch
 
Tsijn schoone woorden
Reden
 
Schoone woorden
 
aen allen oorden / dit noch quaer virtuijt // heeft
kennis
 
Sulcxs tvat in heeft sulcxs tvat uuijt // geeft
780
twaer veel beter verdorven vanden mol
 
dan sulcxs op te coomen
Die Mensch
 
Bat Jaet toch
Redene
785
Dats waer u hoff is vol
 
van schoone woorden schelden kijven en Liegen
 
vloecken sweeren / en u naesten bedriegen
 
blasphemeeren / saijende Discoort saet
 
met twee Tongen spreeken feninich en quaet
790
dagelicxs vijleijnich onnut en ruijt
 
en dat met schoone woorden te meeten uuijt
 
dits Dat niet en sluijt / es bij u bedreven
 
wat segdij hier toe wilt mijn antwoort geven
 
op dese saeke / sijnde onverkerlt // nu
795
est soe niet
 


illustratie

 


illustratie

+
Die Mensch
 
Ick gelooff wel Jaet
Justicia
800
Wie es die quaede werlt // nu
 
die werlt materiael / condijt bevroen
 
die niet en mach sondigen off eenich quaet // doen
 
off ghij Die vol alle valsche treeken
 
+seer overlaeden sijt / soot oijt is gebleeken
805
waer door ghij met u pastoor waert int gescille
 
antwoort hier op
Die Mensch
 
Ken weet niet wat ick seggen wille
 
ghij reden en kennis maect mijn beij stom
810
maer ick gelooff al ben ick in dees saeck wat dom
 
ick en ben die quae werlt niet soo ick verstont
 
hij seijde twas / een dieff een moorder goet ront
 
en oick een verraeder Dat treck ick mijn niet an
 
want ick en bens niet
Reden
 
Wilt mijn daer op hooren dan
 
die waerheijt sal geen hulp behoeven
 
ick wil u met smeekende woorden proeven
 
die mennichfuldich in u hoff staen ontlooken
820
segt hebdij noijt van u even naesten gesprooken
 
achter rugge / met Logentael / tsijnder onvromen
 
daer ghij hem sijn eer en faem me hebt benomen
 
en die in eeren was gebrocht / in hinderlick grieff
Die Mensch
825
Ick gelooff wel Jae
Reden
 
Sijdij dan geen dieff
 
Jae meer dan een dieff / want een dieff openbaer en onverholen
 
mach weer geven / dat hij heeft gestoolen
830
maer u dieverij is quaeder onversaecht
 
want ghij stelt man vrowe off maecht
 
haer naem met Logenen / brengende int gequelle
 
en dat en coendij inden hemel noch inden helle
 
niet wedergeven in geenderleij manieren
835
dus brengdij Doer u valsch bestieren
 
die herten die vol sijn van Tribulacij
 
in druck in Lijen tot Desperacij
 
haer eer verliesende mits u bedrijff
 
en verradelick vermoordij soo haer siel en Lijff
840
welck werck roept wraeck / ter eewijger tijt
 
nu bedenct off ghij die quaede werlt sijt
 
en off dit niet en sijn u pleegen
 
wiet nu u hoofgen
Die Mensch
845
Och ick en cander een woort niet seggen tegen
 
want soo ghij redene / mijn compt verwinnen
 
+soo moet ick mijn in al dit schuldich kinnen
 
en ben dan die werlt / nae u vermonden
Justicia
 
Jae certeijn die quae werlt werdij bevonden
 
en sijt die selve vol boose Invencie
 
nu cha heer meijer verhaelt Die sentencie
 
over Die werlt gegeven hebt / tuwen wensche
Die Mensch
 
Och wat gaet mijn aen ick arm mensche
 
wee mijn dat ick oijt was gebooren
Justicia
 
Tquaet moet sijn gepuniert dats verlooren
860
en dat met branden soo ghij voor recht
 
opentlick bekende / aldus ghij Dienaer off knecht
 
slaet aen die hant rasch / sonder tontbarme
 
en neemt hem gevangen
Die knecht
865
Wel Joffrow gaerne
 
waij meester hoe salt nu dus verkeeren
 
sult ghij gaen wippen en sterven Leeren
 
ghij hebt mijn te pas recht mee gebrocht
 
her her geeft u gevangen
Die Mensch
 
Och op deese werlt hadt ick noijt gedacht
 
mijn pastoor brengt mijn in dees cattijvicheijt
Redene
 
U Pastoor heeft wel en waer geseijt
875
maer int grondeeren / sijdij slap en stille
 
die quae werrelt is u quaede wille
 
die van u die Meijer is vol alder blame
 
van u Dorp dats u Lichaeme
 
die van u moet bevochten sijn en verwonnen
880
hoe soudij die verwinnen connen /
 
met verblintheijt / u knecht off bestaen sulck feijt
 
met hovaerdij off quae genegentheijt
 
uwen stock off staeff / nae uwen eijsch
 
u harnasch off met wellust des vleijs
885
u gordel tes soo niet te maeken
Die Mensch
 
Eijlaes waer mee Dan
Justicia
 
Maer met vasten bidden en waeken
890
en in als hebdij contrarij gefaelt
 
orcha ghij hebt die sentencij verhaelt
 
die quae werlt moet sterven en niet Langer Leven
Die Mensch
 
Och isser geen genaede
Justicia
 
Ghij hebt selver tvonnis gegeven
 
en begeert int cort voor solucij
 
dat ick recht sou Doen en executij
 
dus salt oick gebueren nu aen desen
900
op een cort
 


illustratie

 


illustratie

+
Die Mensch
 
O wee mijn dat ick oijt ontfing weesen
 
sijt mijns genaedich eijlaes och armen
Justicia
 
Ghij sijt niet waerdich datmen u sal ontfarmen
 
ghij die Dus gestelt sijt / en wilt noch wien
 
anderluij hoofkens sonder eerst te besien
 
u eijgen hoff vol alder oncruijt getrant
910
tes om niet Toncruijt moet sijn verbrant
 
metten hoff en alle quaet wortel en stam
Die Mensch
 
O wee mijn mensch dat ick oijt ter werlt quam
 
in dit droevige Dal / in dit swaer turbeeren
915
want Lacij ick en mach niet appelleeren
 
tes mijn selfs vonnisse dus vrowe verheven
 
wilt mijn toch helpen en goeden raet geven
 
dat ick mach voor Justici gracij verwerven
 
en voor kennisse mede
Justicia
 
Neen nae alle rechten moet hij sterven
 
in een spiegel tot andere van sulcke gebreeken
Reden
 
Met oorloff suster / Dat ick oick een woort spreeke
925
+voor Die werlt weemoedich ick wilt wel Lijen
 
datmen met recht die quaede sal castijen
 
maer dats te verstaene sijt dit wel wijs
 
daer penitencij berow noch Leetweesen en is
 
nu vraech ick u werlt ende mensch hier nu
930
off al dat quaet wel beproeft in u
 
u oick Leet is / en off ghij hebt rowe
 
van u misdaet
Die Mensch
 
Och waerde vrowe
935
tis mijn Leet / Jae meer dan Leet
 
ick geeff mijn over tot alle pijne hoe breet
 
om beteren mijn Leven tot allen tije
 
en mijn is niet niet wat armoet ick Lije
 
voor mijn misdaet / och hadt ick Dit bevroet
940
ick hadde mijn hoofken wel anders behoet
 
van deese quaede cruijen talder spacie
 
och tis mijn soo Leet Dus bidt ick om gracie
 
met weenenden oogen en gevowen handen
Redene
945
Sijt getroost wert ontslagen van die banden
 
nae die bescreven rechten blijctet alsoo
 
in quacunque Die esechielis quinto Decimo
 
op condicij dat ghij Die heer sult bidden om genae
Justicia
950
Suster ghij Doet mijn officij daer al scae
 
soo ick verstae want tcorrigeeren hoort mijn toe
 
van alle quae feijten
+
Redene
955
Suster ick en doe
 
want paulus Titum primo scrijft op die stee
 
venit crijstus in mundum peccatoris salvos facere
 
ende Esechiel die propheet scrijft oick plat
 
nolo mortem peccatores / sed uut vivat
960
dus suster onvermindert u bestier
 
soo seg ick dat die werlt die mensche alhier
 
sal tijt hebben seekere Jaeren en Dagen
 
om wel te wien nae sijn behaegen
 
sijn hoff van alle cruijden vuijl en onreijn
965
off neen hij sal vallen in die peijn
 
eewich te sterven / nae uws rechts bedrijven
Justicia
 
Maer suster wie sal hier borch voor bliven
 
want sulcken beloften wert Dick geloogen
kennisse
 
Siet suster ick sal u Die borge toogen
 
siet hem daer hij sal u niet beswijken
Justicija
 
Sal die borge sijn
kennisse
 
Jae suster hij heeftet wel Laeten blijken
 
voor die werlt borch te sijn vol alder ootmoet
 
daer hij voor gegeven heeft sijn vleijs ende bloet
 
gelijck Johannes int seste daer stelt voor een Leere
Die mensch knijelende
 
Och sijdij mijn borch alder waerdichste heere
 
die tegens u misdaen hebbe soo mennichfuldich
 
ick ben gedwaelt van uwen wech soo veere
 
van smoeders Lichaem u niet sijnde gehuldich
985
ick Die u aldermeest ben sculdich
 
siet mijn toonende sulcken confoort
 
ontfanct mijn als Die verlooren soon verduldich
 
die vanden vader hoorden een troostelick woort
 
ick arme sondaer vercruepelt versmoort
990
bidt om genaede / o heer gepreesen
 
al heb ick mijn Leven sonder kennis bespoort
 
ick begeer heer wilt mijns genaedich weesen
Redene
 
Nu mensch sijt getroost wilt niet meer vreesen
995
hout u aen kennisse ghij en sult niet dwaelen
 
Laet haer onderwijs / in u harte Dalen
 
sij sal u Doerstraelen mettet Licht der waerheijt
kennisse
 
Ghij hebt nu ondervonden watte swaerheijt
1000
daer is eer die claerheijt selfs kennisse wil coomen
 
want soo Lang die mensch hem selfs niet can verdomen
 
en Leeren godt nomen / hem geevende eer
 
mach hij niet salich werden nu noch nimmermeer
 
onthout Dese Leer / tot een Lesse tes u notelick
 


illustratie

 


illustratie

+
Reden
 
En acht u selven verworpen verstotelick
 
gans niet dan doottelick soo suldij godt behaegen
 
en u knecht verblintheijt suldij van u Jagen
1010
en niet vertraegen / te brengen in een ander gevecht
 
u harnas u wapen / hoe waerdij soo slecht
 
dat ghij arme arme knecht / waende te verwinnen
 
die werlt met quae genegentheijt der sinnen
 
met hovaerdije nae uwen eijsch
1015
en met wellust tsijn al wapenen nae den vleijs
 
hoe soud en dees Die werrelt verpletten
 
die selve Die werlt stoele setten
 
dus werpt van u Dit gespuijs op dit pas
 
en Leert anders strijen
Die Mensch
 
Ick salt mijn quijtmaeken vaerdich en ras
 
siet daer Leijt den bras maer wilt mijn onderrichten
 
hoe ick tegen Die werlt sal vichten
 
en vilt in mijn stichten / een chrijsten Leven hier
Reden
 
Tegen die werlt moet ghij vechten op een ander manier
 
al u bestier / moet tegens hem sijn behendich
 
sijn prickkelen Die u maeken elendich
 
steeken inwendich / en maeken u bedeest
1030
daerom moeten u wapenen sijn nae den geest
 
en Laeten onbevreest u swaert sijn goodts woort
 
voor u harnas Die gerechticheijt orboort
 
en boven al voort / den schilt des geloofs stelt
 
een beschermenis om scuijlen voor alle gewelt
1035
waer op ghij sult sijn vierijge pijlen verdampen
 
en met die helm des heijls sal al sijn gescut aff scampen
 
hoe hij mach stampen / hij blijft dan tondere
 
Laet u dees wapenen niet sijn tot wondere
 
ghij wert bij sondere daer doer behoet
1040
want u voorstellen // es niet tegens vleijs off bloet
 
+maer tegen regenten verwoet / deser werlt verdwaest
 
die inden mensch soo Listelijcken raest
 
soo dat hij bijnaest Dat selve niet en kent
 
dat sijn viant hem altijt is ontrent
1045
soo verblent / hout hem selfs goetduncken en waen
kennisse
 
Nu verblintheijt ghij moecht oick wel gaen
 
op een ander baen es die mensch nu getreeden
 
ghij muecht uwen dienst nu elders besteeden
1050
en bereeden u terstont om te verhaeren
Verblintheijt
 
A Dieu dan meestere
Die Mensch
 
In dafgront moet ghij varen
1055
Die mijn sonder kennisse hebt gehowen
 
+ick danck u alleen waerde Jonckvrouwen
 
die mijn van verblintheijt hebt verlost
 
en van onprofijtelijcke wapenen ondost
1060
mits Leerende De wapenen der salicheijt kennen
 
daer ick bij goodts gracie bet in sal wennen
 
nu ick van verblintheijt ben ontbonden
 
en reden met kennisse hebbe gevonden
 
sal ick nu verlaeten alle oude pleegen
1065
en wanderen voorts in beeter weegen
 
om te crijgen goodts segen doer sijn gracij genaedich
Reden
 
Wilt den bermhertigen heer bidden gestaedich
 
dat hij beraedich u sterck in dit propoost
kennisse
 
En kent u selven voor hem misdadich
Reden
 
Hij sal u van alle sonden sijn ontlaedich
 
hoe scaedich hem die mensch over ruijkeloost
kennisse
 
Wilt den bermhertigen heer bidden gestaedich
 
dat hij beraedich u sterck in dit propoost
 
want hij is alle menschen hulp en troost
 
Pausa
1080
Wat achterdinckens Sijn Wijff
 
Terlangen doet mijn hart ontwaeken
 
hoe die mensche mijn man mach sijn gevaren
 
ick sach hem verhit op die werlt blaeken
 
die hij wou bevechten doden en kaeken
1085
tenemael bederven sonder sparen
 
ick en const hem niet ontcallen dit beswaeren
 
sin ende moet was heel vol van dit op set
 
hoe tende vergaen is / dat wist ick garen
 
off reden sijn voornemen heeft belet
1090
ick twijfel niet is hij gecoomen in haer perket
 
die saeck heeft hij wel anders verstaen
 
hoe soutmen van sinnen soe sijn verplet
 
datmen die werlt sow moghen slaen
 
met verblintheijt een knecht noijt sulck vermaen
1095
mijn verstant en gepeijs is veel te ruijt
 
dan dattet alsoo te werck sou gaen
 
al can ick van dien niet neemen tbesluijt
 
ick wil gaen kijken tallen straeten uuijt
 
off ick hem ijewaerts conden verneemen
1100
+tbesceijt peijs ick sal mijn heel vervreemen
Die Mensch
 
O hemelsche vader hoe was ick met blintheijt vermast
 
dat ick Die werlt wow Doerhowen Doerspeeten
 
die onsienlick in mijn is ende als een onwaert gast
1105
al hadt ick hem te bevechten gepast
 


illustratie

 


illustratie

 
+ick was verrast van hem buijten mijn weeten
 
en hadt kennisse met reden niet geopent die secreeten
 
met een click waer ick van hem verslonden
1110
maer godt danck die int hoochste is geseeten
 
heeft mijn bescermt / van die Last ontbonden
 
ick wil strijen soo Die mijn Leert tallen stonden
 
soo en blijff ick niet eewich in sulcken noot
 
hoor troostelijke woorden ende Lijeffelijk // vermonden
1115
holpen mijn dat ick niet worde geslagen // Doot
 
in mijn hofjen hadt hij gestelt Laegen groot
 
+ick en hadde nimmermeer mogen ontcoomen
 
ick sie mijn wijff ick wet sij compt mijn vragen tsloot
 
off hij gevelt is / als Die onvroomen
1120
maer als hijt besceijt hoort haer hart sal scromen
 
vant Dansgier daer ick bijcans in was bestrict
 
maer den heer godt danck heeftet ten besten bescict
Twijff      Die Mensch
 
Vel mensch hoe nu te moede      Wel en onverscrict
1125
Ist werck volbrocht      Niet al int brede
 
Est dan onspoede      Thert is verquict
 
Mensch hoe nu te moede      Wel en onversaecht
 
Es hij in u hoede      Hij blijft noch onverstict
 
Hebdij hem niet gesocht      En gevonnen mede
1130
Mensch hoe nu te moede      Wel en onversaecht
 
Est werck volbrocht      Niet al int brede
Twijff
 
Ick en hoorden noijt alsulcken bescede
 
alle dinck blijft in vreede nae toude Liet
1135
ick en weet niet te seggen van sulcken seede
 
wat ghij ter stede doen spraect en weet ick niet
 
waer is uwen knecht
Die mensch
 
Die sidt Iewerts int riet
1140
en soect spieren / anders mocht hij versmachten
Wijff
 
Sal hij op uwen dienst dan niet meer wachten
 
u ongemack ver sachten / gaedij hem soo versmaeden
Die Mensch
1145
Wijff doer hem was ick bij naest verraeden
 
maer bij goodts genaeden ben ick verlost van tsneven
Wijff
 
U harnas en geweer waer is dat gebleven
 
off heeftet u ondreven die werlt onversaecht
1150
en u ontweldicht
Die Mensch
 
Dats wel gevraecht
 
ick was te Deegen verlaecht eer ickket wiste
1155
+die werlt is gebruijkende sulcken Liste
 
als ickker niet op en giste / vocht hij victorie
 
tsow vallen een Lange historie
 
eer ickt in memorie sow brengen perfect
Wijff
1160
Waer vondij hem
Die Mensch
 
+Voor mij was hij bedect
 
met vinnen gestrect / ick hadt hem in seven Jaren
 
niet gevonden
Wijff
 
Wilt mijn toch verclaeren
 
wat is u wedervaeren / dat ghij moet ontbeeren
 
knecht en wapen
Die Mensch
1170
Ick sal nae u begeeren
 
u Informeeren van als Dese geschichte
 
als ick redene gecreegen hadt int gesichte
 
soo was haer nichte kennisse daer ontrent
 
en oick Justicij waerdich en excelent
1175
voor wien ick pertinent Dede mijn clachte
 
over Die viandt / van tsmenschen geslachte
 
die ick met machte / begeerde te bestrijen
 
soo pastoor hadde bevoolen
Wijff
1180
Maer hoe gingt toch voort
Die Mansch
 
Dese copijen
 
van swerlts pertijen // gehoort hebbende tende
 
hebben sij gevraecht / off ick die werlt wel kende
1185
daer ick als die blende / tegens wou vechten
Wijff
 
Wel wat ghingt ghij haer Daer op berechten
 
om u saeck te beslechten / met cort bedien
Die Mensch
1190
Als ick niet en wist heb ick in een spiegel gesien
 
daer ick nimmermeer const bespien noch oick bewelven
 
dan die volmaecte figuer van mijn selven
 
en als ick niet aff en Liet van mijn temen
 
geboot mijn Justici die roet in die handt te nemen
1195
en soo vonnis over die werlt te geven
 
twelck ick op tswaerste heb aengeheven
 
en heb Die werlt verdoemt te water te viere
 
te raebraecken / te verworgen met vreemt bestiere
Twijff
1200
Eij segt voort
Die Mensch
 
Als ick Dus gvonnist hadt nae mijn wensche
 
seijden reden met kennis Die werlt is die mensche
 
en hebbent beweesen met starke argumenten
 


illustratie

 


illustratie

 
+die sij als wel spreekende eloquenten
 
bij brochten met onstraffelick bewijs
 
soo dat siel ende Lichaem doer sulcken gecrijs
 
in mijn werden grijs / soo was ick verlegen
1210
want ick wister niet een woort te seggen tegen
 
en Justicij ginck op mijn sentencij dinghen
 
datmen mijn ter execucij soude bringen
 
ten baeten geen dringen / ick werde gegreepen
 
van mijn eijgen knecht / dus was ick beneepen
1215
datse mijn woude sleepen tot sware punicie
 
twelck straffelick begeerde vrow Justicie
 
maer redens congnicie / en der kennisse raet
 
verworven voor mijn een borge / ende een advocaet
 
dat was chrijstus den heer / met ontlooken armen
1220
doer wiens verdiensten ende groot ontfarmen
 
ick uuijt dit carmen / sijn verlost en gescaect
Twijff
 
Bijloo man soo hebdij een harde noot gecraect
 
eer ghij sijt geraect / uuijt Justicijs handen
1225
ick hoor wondere
Die Mensch
 
Wij sijn al goodts vianden
 
en coomen tot scanden / Doer tswerlts verleijen
 
die met ons gaet en staet / In alle contreijen
1230
Jae sonder affscheijen in ons blijft steeken
 
soo Lange wij verblintheijt met sijn duijstere treeken
 
niet en gaen verwerpen bliven wij in getruer
 
hoe sow doch moghen onse brosse natuer
 
doer eenijge cuer met begeerte en pompoosheijt
1235
ons mogen veranderen dat sulcke boosheijt
 
en swerlts Loosheijt / in ons versturve
 
ten waer Dat wij goe kennisse verwurven
 
want doen mijn ontmoeten die eerbare vrowe
 
ick meen kennisse Die schoone carsowe
1240
was sij mijn getrowe en heeft mijn verlicht
 
van die blintheijt Die in mijn was gesticht
 
sij heeft aengericht een ander wapen emendich
 
daer ick tegen die werlt mee sal strijen inwendich
 
die seer behendich is streckkende sijn vinnen
Wijff
 
Wat wapen is Dat
Die Mensch
 
Wildij dit wapen te recht bekinnen
 
soo strect u sinnen / op die viant en sijn cracht
1250
want van binnen in therte toont hij sijn macht
 
daermen tegens scacht gelooff en gerechticheijt
 
doodinge Des vleijs tot sonde en quaet bereijt
 
als goodts woort verbreijt soo wort victori gevochten
Wijff
1255
Dat sluijt nae mijn verstant en nae mijn gedochten
 
+want ander wapenen aenbrengen geen gewelt
 
voor sulcken viant
Die Mensch
1260
Doer mijn ander wapenen was Die werlt bet gestelt
 
soo Johannes vermelt tot een oorconden
 
want al dat in die werlt wert bevonden
 
es begeerlickheijt des vleijs ende der oogen
 
en hovaerdij Des Levens ongeloogen
1265
dus Die onbedrogen wil sijn moet sulxs Laten
Wijff
 
Dits dat onse prochiaen preecte van haten
 
voor sijn ondersaten niet op uuijtwendige manier
 
want sulcxs Lust het vleijs / maer dinwendich bestier
1270
can dat beschickken fier / Liet hij Daer hooren
Die Mensche
 
Noch seijt sint Jan al wat uuijt godt is gebooren
 
verwint Die werlt / en stelt hem tot een rooff
 
die verwinnende victori / es ons gelooff
1275
die dit hoorende sijn dooff / blijven in swerlts bewint
Wijff
 
Lieve man dit en heb ick noijt dus versint
 
maer halff blint / Die passage misgetreeden
Die Mensch
1280
Daerom Laet ons godt bidden dat hij wil verbreeden
 
kennis ons selfs om ons verhoogen
 
+want uuijt ons selfs wij niet goets vermoghen
 
dus willen wij ons vogen / onder goodts genaeden
 
dat hij ons wil helpen en coomen in staden
1285
want hij versmaede noijt hart voor hem vercleent
Twijff
 
Sulcken genaede is den puplicaen verleent
 
en soo David meent sal godt niet verworpen
 
een ootmoedich hert / in steden noch in dorpen
1290
sonder sinnen te scerpen wijntmen hier de gront
Die Mensch
 
Dan comptmen in meerder kennisse terstont
 
soo die apostel oircont van goodts Justificacij
 
van sijn mogentheijt ende Liberaele gracij
1295
soomen telcker spacij uuijt die scrijftuer mach Leeren
 
dus wiltse useeren
Wijff
 
Laet ons kennisse van dien oick niet ontbeeren
 
om te reformeeren / ons Leven nae huer regule
1300
dit is Die pegule / en twet om op te merken
 
in alle perken
Die Mensch
 
Soo sal tgelooff niet Leedich sijn / maer altijt werken
 
tsal versterken Doprechte Liefde gepreesen
 


illustratie

 


illustratie

 
+tot godt en sijn naesten altoos gereesen
 
op dat mits Deesen een crijsten Leven wert bekent
 
tegenwoordich present
Wijff
1310
Op dat hij hem tone een voorvechter excelent
 
tegen die werlt verblent met een uuijtwendige schijn
 
maer Inwendich nae geestelijke Dissiplijn
 
soo ghij op dit termijn hebt hooren vertaelen
 
in corte moralen
Die Mensch
 
Neempt in danck // al valt cranck // ons verhalen
 
weechtet in geen scaelen / tis uuijt Jonste plaen
Twijff
 
Laetet motijff / ter herten stijff / Innewaerts dalen
1320
neempt in danck // al valt cranck // ons verhaelen
Die Mensch
 
Wandelt met List // Dat ghij niet en mist // der deuchden palen
 
soo sal in u versmaelen / der werlt bedriechelick // waen
Wijff
1325
Neempt in danck // al valt cranck / ons verhaelen
 
weechtet niet in scaelen // Tis uuijt Jonste plaen
 
weet ghij bet dan ons opset / wij Laeten ons raen
 
Finis
Die Conclusij
1330
Vrienden hier hebdij van ons materij tslot
 
tverstant als Die vroede int herte prent
 
Laet u sinnen Doer onverstant niet blijven vermot
 
den Invlammenden geest / sijt altijt obedient
Dander
1335
Van die quaede werlt u gedachten went
 
want sij Liecht en bedriecht en doet niemant gelijck
 
schout haer wech en haer quaet rigement
 
haer bedroch haer gewelt en haer quae practijck
Deen
1340
Soo doende brengdij die werlt int versijck
 
en sult Triumpheeren nae u selfs behaegen
 
wie uuijt godt is gebooren tsij arm off rijck
 
die sal van Die werlt victorij Draghen
Dander
1345
Ons gelooff soo Johannes ons gaet gewaghen
 
est principael dat Die werlt verwint
 
twelck Die heer wil verleenen sonder vertragen
 
soo Lange wij Leven // in des werlts gespint
Deen
1350
Hier mede bevoolen den heer bemint
 
bekint sijn Inspiracij / uuijtgegooten wijt
+
Dander
 
En weest toch als sijn uuijtvercooren // gesint
1355
hier mede bevoolen Den heere // bemint
Deen
 
Soect in tijts op dat ghij sijn oprechte paden // vint
 
begint / ter spacie / swerlts speelgenooten / mijt
Dander
1360
Hier mede bevoolen Den heere // bemint
 
bekint / sij Inspiracie / uuijtgegooten wijt
 
+goodts goetheijt maeck u al swerlts aenstooten quijt

Personages

Die Mensch een man .. 484
Wat achterdenkens sijn wijff .. 144
Verblintheijt Een Diensknecht .. 36
Reden een vrow .. 239
Kennis een vrow .. 65
Justicia een vrow .. 57
Chrijstus in een vertonng aen tcruis off anders  
Deerst in Die conclusij .. 12
Tweede .. 13
  __
Lanck tsamen 1060
  ____

Lauris Janzoon Fecit

Lieft boven Al



illustratie


Vorige Volgende

Over het gehele werk

organisaties


Over dit hoofdstuk/artikel

titels


organisaties