Strijt van Roncevale

[p. 72]

[XXI]

Hoe Rolant sijn eynde dede.

ROlant lacen die crancte seere
Ende hi riep aen Gode onsen heere.
Deen hant hi ten hemel waert droech
Met die ander voer sijn borste hi sloech.
Doen leyde hi onder hem verstaet mi wael
Den horen ende sijn sweert Duerendael
Dattet herte hem bina doen brack
Ende hi noyt daer na veel meer en sprack.

Te Spaengien waert keerde hi hem weder

Ende viel ruggelinghe ter neder.
Datmen niet segghen en mochte
Rolant en hadde den strijt volvochten.

Rolant lacen deerliken alsoe lach

Dat hi en hoorde noch en sach
Nochtans hadde hi in sijn ghedachte
Den heere die hem ghewrachte
Die heere is van hemelrijcke
Badt hi met herten ootmoedelijcke
Met seer grooter volstandichede
Met knyen ghebogen met ghevouwen handen mede.
Aldus bleef die vrome ridder doot
Dwelck was scade ende iammer groot
Ende als Rolant dus dede sijn eynde
God sinen engel om die siele seynde.