Strijt van Roncevale
(1902)–Anoniem Strijt van Roncevale–
Auteursrecht onbekend
[pagina 12]
| |
Hoe die mogende Sarasijn die wreede tyran Marcelijs met .ijc. duyst volcx beleyde die edel vangaerde opten Roncevale, ende hoe hem alle sijn meeste princen seere hoochlijc vermaten Rolant ende Olivier te doden. Ende hoe si aen Marcelijs begeerden dat hi haer den eersten oploop soude laten doen op Rolant ende sijn ghesellen.
KAerle die coninck van Vrancrijcke
Die liet bliven seer sorchelijcke
Alle sijn avantgaerde met Rolanden
In Spaengien onder Gods vianden
Mer die valsche Guwelloen hadt al bedreven
Also wi in die gesten vinden bescreven
Hi waende selve keyser ende coninck te sine.
Mer quade wercken comen tot quaden fine.
Nu hoort van Marcelijs den wreeden Sarragoen
Die nu hier groot wonder wilt doen.
Hi ontboot soudanen coninghen ende ammiralen
Hertoghen ende graven, die alle sonder falen
Cierliken ghereet tot sinen dienste quamen
Als si sijn boetschap vernamen.
Ick wil u seggen die waerheyt al sonder saghe
Datter binnen min dan twee daghe
Heydenen vergadert waren wel twee hondert duyst
Die alle nae den Roncevale quamen met groter druyst.
Marcelijs die coninck dede doen saen
Alle sijn sarragoensche tamborinen slaen.
Die heydenen hieven op haren Mameth
Om dat sijs waenden varen te bet
Ende si aenbaden hem alle gader
Ghelijck wij doen Gode onsen vader.
Ten eersten doen si vernamen
| |
[pagina 13]
| |
Dat si totten Fransoysen quamen
Reden si met bliden ghedochten
Alsoe gheringhe als si rijden mochten.
Des conincx neve quam voort te hant
Ende brachte in sijnder hant
Eenen stock seer rijckelijck vol hooveerden
Als een die vechtens begheerde.
Al lachende sprack hi coninck edel heere
Hoort na mi doer u eere.
Ick hebbe u ghedient menighen dach
Met alle tghene dat ick gheleesten mach
Ende menighen strijt met u begonnen
Ende menighen camp met u ghewonnen.
Een ghifte bidde ic u te hande
Dat is om den dootslach van Rolande
Ick sal hem verslaen met minen sweerde
Dat belove ick u coninck van hoogher weerde.
Hoort na mi heer Marcelijs al sonder waen
Die felle kerstenen sullen wij wederstaen
Ick make u vrij gheweldich heere van Spaengien
Ende Kaerlen verdriven met groter callaengien
Ende maken u heere van alle kerstenrijcke
Ghelooft mi dies waerachtelijcke.
Ick make u quyt van alle desen stride
Dat ghi binnen uwen tijde
Nemmermeer dach en leeft
Dat ghi Kaerlen eenighen tzijs gheeft.
Die coninck Marcelijs dat is waer
Gaf hem die ghifte daer
Met sinen hantschoe te dien tijde
Des was sijn neve vroe ende blijde.
Gheminde oom sprac hi lieve heere
| |
[pagina 14]
| |
Mi hebdij ghedaen groote eere
Dat ghi mi dit hebt ghegeven
Ick sals u dancken alle mijn leven.
Nu bidde ick u noch heer coninck vaylliant
Om twalef uwer mannen te hant
Dat icx u ymmermeer moet bedancken
Om te vechten teghen twalef Vrancken.
Doen stappans so antwoerde
Franseroen als hi dat hoerde
Die oeck des conincx neve was.
Oom seyde hi ick volghe hem das
Ick ende hi wij sullen in die kerstenen varen
Dies en willen wij niet ontbaren
Menich man sal wel aensien
Daer desen strijt sal gheschien.
Doen sprac daer noch Cursael die Sarasijn
Als dat hi daer oeck een af woude sijn.
Doen sprack daer een barbarijsche paijen
Hi woude oeck met een vanden .xij. strijen
Op die fransche kerstenen partijen
Ende reedt den coninck neven der zijen.
Onsen wille seyde hi sal nu voort gaen
Heer coninck en twifelt daer niet aen sonder waen
Mameth is beter sijt dies ghewis
Dan der kerstenen ghecruysten God is.
Siet hier mijn langhe grote sweert
Dat ick liefhebbe ende weert
Ick salt noch tegen Duerendale doen clincken
Oft Rolant sal mi in die aerde ontsincken.
Die Fransoysen sijn alle verloren
Jae comen si ons int velt te voren.
Doen sprac Astromarijs met dyen
| |
[pagina 15]
| |
Hi was oeck een fel vroem payen
Daer ick u hier af vertelle
Ende Astromoch sijn gheselle.
Verraders waren si quaet ende fel
Dies waren si gheproeft herde wel.
Tot den coninck dat si spraken
Ende vermaten haer hooghe saken.
Dat si Olivier ende Rolanden
Souden dootslaen met haren branden
Ende alle die ander ghenooten mede
Dwelc van hem was een domme reden.
Ende si souden met haren sweerde
Bloedich maken die groene eerde
Al metten kerstenen bloede
Dat spraken si met hooghen moede.
Noch een ander ridder wide bekant
Quam oeck voort gheloopen te hant
Tarters hiet hi dat was waer.
Totter aerden al swert sloech hem sijn hayr.
Hi begonde hem seer te vermeten
Dies en wilde hi hem selven niet vergrieten.
Hi soude Rolant ende Olivier met sinen sweerde
Beyde doen besoecken die groene eerde.
Een ridder wel wijde bekant
Quam oeck voort gheloopen al te hant
Margarijs hiet hi die vrye
Die heere was van Sabelye.
Hi was een schoon vroem paijen
Ende een volmaect ridder int strijen.
Doer sijn groote wtnemende schoonheyt
Beminden hem die vrouwen ghereyt.
Hi sprac so luyde als hi woude
| |
[pagina 16]
| |
Ende vermat hem hoochlijc dat hi soude
Rolande ende Oliviere slaen
Dat si die doot niet en souden ontgaen.
Hi sprac het is nu so verre gebrocht
Dat die meeste Kaerls ghenooten sijn vercocht.
Ick wane haer leven onlanghe sal dueren
En doet dat niet quade avontueren.
Coninck Kaerle met sinen grauwen baerde
Verliest huden die bloeme vander franscher aerde
Dies hi qualiken mach ghenesen.
Want hi van Rolande noch van allen desen
Gheen battaelgie meer maken en sal
Oft ons oeck meer doen eenich ongheval.
Ende eer een iaer ghewarichlijcke
Soe sullen wij winnen alle kerstenrijcke
Ende sullen noch naer ons avijs
Moghen liggen in Vrancrijck tot Parijs.
Coninck Marcelijs die wreede paijen
Bedancte hem seere van dien.
Hector van Brigale sprack oeck sijn reden
Als een Sarasijn vol onedelheden.
Hi liep veel seerder te voet
Dan menich goet spaens ors doet.
Voer den coninck quam hi wel saen
Ende sprac luyde datment wel mocht verstaen.
Vinde ick Rolant in Roncevale
Soe wort mi te moede seer wale
Ick sal hem verslaen al sonder swanck
Oft het blijft tegen minen danck.
Noch een ammirael van Bouwaengien
Ten leefde gheen felder in alle Hispaengien.
Hi began hem hooghe te vermeten
| |
[pagina 17]
| |
Dat hi in Roncevale soude doen weten
Sijn teeken ende oeck sijn cracht
Ende wat hi hem te doene hadde gheacht
Hi hadde wel .xx. hondert manne
Die al onder hem waren in sijn ghespanne.
Hi vermat hem den edelen grave Rolande
Seer te slaen met sinen brande
Ende alle die ander ghenooten mede.
Dat was van hem een grote dorperhede.
Doen sprack Torgijs van Torteloose
Een grave machtich fel ende boose.
Het wert den kerstenen wel in schijn
Dat wij hier ghecomen sijn.
Hi reedt den coninck aen sijn side
Ende trooste hem te wesen blide.
Hi seyde verhuecht u heere sonder waen
Het moet hier al na onsen wille gaen.
ALs si alle dese tale hadden gheseyt
Soe waren die Sarasinen al ghereyt
Om vechten met coenen ghedachten
Ende reden voort met crachten
Soe verre tot dat si vernamen
Die Fransoysen die tot hem quamen.
Sij ontbonden haer standaerden groot
Witte grauwe gulden blauwe ende root.
Die sonne scheen schoone ende cleer
Ende blincte cierlijck int sarazijnsche heer
Herde rijckelijcke
Vanden goude ende silver costelijcke.
Si bliesen trompetten basunen ende sloegen tamborinen
Om dat si te stouter souden schinen.
| |
[pagina 18]
| |
Groot gheluyt quam daer of.
Sij dedent om prijs ende lof.
Die kerstenen hoorden dat gheschal
Ende saghen die Sarasinen comen over al.
Doen sprack die wijse ridder Olivier.
O Rolant gheselle ick meyne ons hier
Vanden Sarasinen strijt sal comen
Soe mi dunct want ick hebse vernomen.
Doen sprack die grave Rolant.
Dat gonne ons God ende sinte Amant
Want wij en sijn Gode niet sculdich andersens
Dan een goet ghedachte ende ghepens
Ende altoos te staen in sinen dienste waert
Wij en dorven sekerlijc niet sijn vervaert
Want dienen wij hier ghetrouwelijc onsen heer
Onsen loon gheduert hier boven ymmermeer.
|
|