Sommighe leerachtighe geestelijcke liedekens

Den xcv. Psalm Davids:

Op de wijse vanden xxiiij. Psalm.

Singt met aendacht.

Comt laet ons blijd' zijn inden Heer,
End met sanc verbreyden sijn eer,
Hy is ons troost end heyl alleyne,
2 Laet ons met dancsegginge gaen,

[p. 307]

 

Voor sijn aengesicht, end voortaen,

 

Hem singhen met vreucht psalmen reyne.

 

3 Want hy een groot God is geacht,

 

Een Coninck van veel grooter macht,

 

Dan de Goden zijn: Want teertrijcke

 

4 Heeft hy in sijn hant, welcx vrucht al

 

Hem toe behoort, die berch end' dal,

 

Steets voortbringhen beyde ghelijcke.

 

5 De zee hem alleen toebehoort,

 

Hy heeft die gemaeckt door sijn woort,

 

End schiep oock taertrijcke bequame

 

6 Comt laet ons al tsaem met demoet,

 

Vallen voor onsen God te voet,

 

Hy heeft ons gheschapen al tsame.

 

7 Hy is een God die ons behoet,

 

Wy zijn t'volck end de schapen goet,

 

Die van hem wel geweydet werden.

 

8 Hoort ghy heden sijn stemme claer,

 

Wilt doch uwe herten so gaer,

 

Niet verstocken noch oock verherden.

 

9 So tot Massa ende Merida,

 

Vwe Vaders voor ende na

 

Inde woestijne te doen plaghen

 

Sy terchden my met herten quaet,

 

Ende beproefden vroech en spaet,

 

Al mijn wercken die sy daer saghen.

 

10 Daer ick veertich jaren eenpaer

 

Met hen veel arbeyts had voorwaer,

 

Dies claechd' ick aldus onversweghen

 

Dit volck is gantsch sonder verstant,

[p. 308]

 

Van herten gaer dwalende, want

 

Sy sullen mee leeren mijn weghen.

 

11 Dies als ick van hen wert versmaet,

 

Ick was toornich door sulck een daet

 

End heb in mijn gramschap gesworen,

 

Dat dit boos end verkeert geslacht,

 

Nemmermeer soude zijn ghebracht

 

Ter ruste mijner uytvercoren.