Sommighe nieuwe schriftuerlijcke liedekens, ghemaeckt uyt den ouden ende nieuwen testamente,


Een nieu Liedt, van Magdalena,
op de wijse: van Jonas. Ga naar margenoot+JEsus die quam gheganghen Tot binnen Bethania, Daer werdt hy wel ontfanghen, Van een Vrouwe Martha, Dat was de Suster van Maria Magdalena, Soo ick versta, Die wilde weder keeren van den qua.
[pagina 85]
Sy sat aen Jesus voeten, En hoorde de woorden aen Christi, niet om versoeten, Maer Martha was belaen, Al om den Heere wel t'ontfaen, Sy heeft ghedaen Haer werck, seer saen Ginck sy tot Jesum met een sulck vermaen. Heere neemt ghy gheen achte, Hoe dat mijn Suster vry Gheseten soet en sachte, Alleene laet dienen my, Seght haer dat sy oock doende zy, En my stae by, Nu hoort Christi, Antwoorde, Martha, Martha seyde hy. Ghy sorght voor vele saken, En hebt veel moeyte swaer, Een dinck (wilt dit wel smaken) En is van noode maer, Maria heeft vercoren claer, T'goet deel eerbaer, Het welck voorwaer Oock niet en sal ghenomen zijn van haer. Vrienden, laet ons verkiesen Dat over goede deel, Dat wy niet en verliesen Dat costelijck parceel, Dat Euangelij schoon juweel, Volghen gheheel, In s'Gheests prieel, Soo werdt des Heeren naem ons een Casteel. Een is noodich.	margenoot+ Luc. 10. 38.