Soela 1962-1964

[p. 28]

ané doorson
na dede foe andris porjon

Andris Porjon, di b'e libi na Bantaksi, let na sé foe na wenkri na tap na oekoe foe Langa-Dan nanga Vierde-Strati, pe den dri amandrabon tenapoe en pe ala joeroe foe dé sma ben kan si doksi nanga kwakwa e swen na in na kanari, di e lon na stratsé, Andris Porjon disi ben kon dede. Dis ben tjari bigi sek-seki na in Bantaksi, no wawan, ma na in her Kosoe. En moro fara srefi na in foer-foer presi na in Sranankondre, bika njoensoe ben panja dat Ba Andrisi - na so ala sma b'e kar en - ben goedoe èn dat a ben abi didonmoni.

Na ala sé foe kondre sma ben komopo kon na Bantaksi. Nanga oto, opolani, sipi. Den moro jongoewan nanga bromfiets. Ala b'e kar den srefi famiri foe Ba Andrisi. Na oso na Bantaksi ben kon foeroe. Pres no ben de foe ala den sma tan. Sa Anna, di b'e tan nanga Ba Andrisi - ala sma b'e taki dat a ben de Ba Andrisi wefi, ma Andrisi srefi no ben tak so - ben froewondroe foe si someni famiri, ala di Ba Andrisi ben ferter en, dat a n'a no wan famiri. ‘En ef joe sorgoe mi boen na mi owroe dé, Anna, dan ala san mi abi na foe joe.’

Dis na den wortoe, di Ba Andrisi b'e taig en ala dé.

Krisjan, die ben doro lek nomroe wan, en di b'e doe

[p. 30]

ala san di en wefi e taig en, no ben drai-drai foe aksi Sa Anna pe na transport foe en bigi omoe Andrisi de. Sa Anna, die no b'e prakser not moro lek na dede, di ben didon na pranga ete, piki taki dat Ba Andrisi toesjoer b'e taki dat te a dede a wan dat en skin moes transporter na tap dragi, so a denki dat na transport de na kerkiprasi, bika na drape ala den sort sani dat e tan.

Krisjan nanga en wefi foe den sé, no arki boen sa Anna taki, lek den pik pasi, den go na hedeman foe den kerkidinari foe aksi foe na transport. San den kis foe jere drape, mi no sabi, bika den no drai kon baka foe ferteri. Na bakadé mi kisi foe jere dat Ba Andrisi ben gi kerki na gron foe mek wan kerki-oso na baka en dede. Dat wan taki ef Sa Anna ben sa pot na en ede foe gwe lib na presi.

En so na dé foe na beri ben kon doro. En ala di den sma sidon na foroisi e wakti den dragiman, Anton di ben lib en oso na Domborgoe sondro foe prakseri foe tjar krosi foe waka na baka na beri, ben de na ini bigi ferlegi. Pe foe fen krosi now? Wan foe den trawan - mi kon las sort wan foe den - ben gi Anton na rai foe wer wan foe den pak foe na dedewan. En foe di Anton ben langa, fin-fini lek Ba Andrisi disi ben kon tap wan skreki gi Sa Anna, di a si a sma e saka komopo na sodro na in na blaka pak. Sa Anna, di b'e trobi nanga doengroe ai, ben prakseri dat na a dedewan opo baka. Wantron a bigin bari: ‘Mi ben sab ala dat na fesi. Sargi ben wan beri na in en blaka paki. Mi ben taig oen dati. Now oen sref e si dat a go kenki en krosi. A ben kostoe den sma foer moeiti foe pot Sa Anna na en ferstan, dat a no a dedewan, ma dat na Anton wer

[p. 31]

wan paki foe Ba Andrisi. A no de fanowdoe foe mi ferteri fa Anton srefi b'e firi na pis joer dati. Na in ala na woenjoe-woenjoe disi den dragiman ben kon doro. En ala di den b'e spikri na kisi tapoe, trobi ben fadon na prasi.

Fredrik foe Hanover ben gi en mofo wroko. A ben taki dati na en firi a no ben de fanowdoe foe ben meki wan monteri kisi, bika djonsro ala sani e go pori na ondro gron èn dan foe soso ala na moni dat lasi. Na tap disi na hedeman foe na fonsoe ‘Vrede Na Arbeid’, na fonsoe di Ba Andrisi ben de na ini, piki dati na Andris Porjon égi moni pai foe na kisi en dat na en firi no wan sma mag boemoei so fara.

Tjadorsi, di ben tenap na sé na kanari e ter den doksi nanga den kwa, pot en mofo na in na tori. ‘Wan san mi wan aksi’, a taki, ‘omen na fonsoe-moni ben de?’ Di a kis foe jere, dat na 125 goloe na moni ben de, a taki dat na kisi nanga ala den pran-pran no kan kostoe somen moni. En Tjadorsi ben kan sabi, bika a b'e doe skrenwerki-wroko. En moro fara Tjadorsi ben wan sabi san psa nanga na moni di libi. Na hedeman foe na fonsoe - na en ben hab na winkri na sé - piki taki dat Ba Andrisi ben moes pai en wan pkin sani ete foe sopi. We dan a tori ben pori. Ala den famiri fadon wantron na a hedeman skin. Den bigin foe tak broeja-broeja, so dat foeroe san den taki mi no ferstan. Ma wan sani ben de krin foe jere èn dat na: dat den ben wan sabi ef na hedeman hab papira foe sor na paiman. Trawan kar en foerman.

En ala di na kroetoe e psa na prasi, den dragiman b'e kon nanga a kisi na doro e bar singi taki: ‘Nanga palm mi d'e go! Nanga palm mi d'e go! Te mi doro janda na Jerusalem, nanga palm mi d'e go.’

Foe set na beri ben de wan tra reproesoe agen. Hedeman foe den dragiman - na krepsi soboen - ben wan tek na en tapoe foe set den sma na baka na beri, so lek fa na gwenti de. Wantron Sisi foe Adorfoe djompo taki dat na en firi na en nanga en pikin moes waka lek foswan na baka na kisi, bika lek fa sargi Adorfoe ferter en dan Ba Andrisi ben de Adorfoe granpa égi brada foe wan m'ma nanga wan p'pa. Tjali piki dat, dat no wan tak noti, bika Sisi nanga Adorfoe no ben trow. Na tap disi Sisi piki taki Adorfoe èrkèn den pkin.

Adrian, di no ben tak noti ete sens a doro, bika a ben dofoe, ben kon firi dat na ten ben kon hé foe en srefi toe tak wan mofo foe en sé. A taki: ‘Mi fen dat a froekoe pkinso foe bigin tak foe na moni, di mi big omoe Andrisi libi. Mi agri, dat den bigi wan - den speri foe mi so - moes kis moro foeroe, bika na den na den krosbé famiri foe na dedewan.’ Dja a swar wan bigi watra-mofo. Bifo a opo en mofo foe go moro fara, Joesoe foe Novar bar aks en soema e tak prat moni tori nanga en, ef a no sabi dat en, Adrian, na séboto famiri. Na kroetoe ben sa go moro fara, ef wan foe den dinari foe kerki no ben opo en sten aksi ef dat na wan fasi foe den doe. Ef den n'e sjen foe reger foe grontapoe goedoe, ala di na dede de na tap doti ete.

Dis ben tjar den kon na den stan. En nanga pkinso joengoe-joengoe moro a ben kon so fara dat na beri ben kan loesoe komopo na oso.

Tjadorsi, na skrenwerki, b'e waka lek di 'f fo nanga Frederik foe Hanover, ma en prakseri no ben de na a dede tapoe. Nanga potlotoe nanga papira a b'e waka e teri omeni na kisi kan kostoe. En foe di a no ben si Ba Andrisi noiti na in en libiten a ben boekoe Fredrik nanga en bakanoe aks en: ‘O langa joe denki dat Ba Andrisi ben de?’ Fredrik pik en taki dat en no kan kar marki gi en, ma dat Ba Andrisi ben langa lek Anton. Soema taig en foe tak so wan sani! Anton, di b'e waka na den fesi, jere san a taki. Wantron a drai har Fredrik wan skoepoe na en bonfoetoe, bar taki: ‘No tek dedesma marki mi.’ En foe di na foetoe foe Fredrik ben de wan owroe siki foetoe keba, oen kan ferstan sort skinati a ben moes njan.

Elena, na wefi foe Fredrik, si san psa. A bar taig Fredrik taki: ‘Fredrik, skop en baka; a n'e law. J'a no dagoe f'a kon skon joe. Dan loek en gi mi dan’. Wans Frederik ben sa wan doe san Elena taig en, a no ben sa man. So wan hebi pen di a ben hab foe tjari. Na tinga-tinga a ben hab foe tinga-tinga go mit berpe.

Na berpe, hedeman foe na fonsoe, di ben de Voorlezer foe na kerki na Bantaksi toe en di ala lési te domri no ben de na en ben moes hor kerki èn beri sma, - èn dat b'e psa nofo tron, foe di na kerki na Bantaksi ben de wan waka kerki - ben tek na dede.

Jacopoe - bika na so na voorlezer ben nen - ben sreka

[p. 32]

en srefi foe na okasi disi. A no ben de moro lek wan toe dé na fesi foe na dede foe Ba Andrisi, dat a ben taig en wefi Abeni, fa na wan her pis ten dat a no fen wan beri. Nanga en libisma prakseri a ben ferwakti dat na sa Afi foe tap kokro b'o go. En trawan b'e ferwakti na sref sani toe.

So di na beri doro na berpe, Jacopoe ben set en srefi foe sen na dedeskin go na bonjokondre na wan fasi di fiti wan man lek Ba Andrisi. Di na singi ben kon keba èn na baka di a ben lési ala san skrifi na in na singiboekoe foe na okasi disi, Jacopoe krin en neki èn taki: ‘Tide, lobi brada nanga sisa, tide wi tenapoe na da opo grebi foe wi lobi brada Andris Porjon foe Bantaksi. Mi no kan ferter oen nofo fa mi ati e fir prisiri foe di na mi kis na okasi foe ber na boen mati foe mi disi. Andris Porjon, Ba Andrisi lek fa wi ala b'e kar en, ben de wan troe-troe dinari foe kerki. A b'e doe en prekti lek fa a fiti. Now a didon dipi na in olo, foe djonsro woron njan en skin. Ma disi wi kan sabi: na jeje foe Andris Porjon sa go na da presi di ben sreka e wakti en, èn dat na da reti hanoe sé foe Masra. Ba Andrisi, joe ben lob joe bita, ma no wan sma no kan taki dat joe no b'e pai joe paiman. Mi kan ketoigi dat te na baka joe dede srefi joe pai na laatste sopi paiman di joe ben habi. En mi wan foe ala......’

Di na voorlezer doro na a pis disi, Tjadorsi, na skrenwerki, no man hor moro. A bar taki: ‘Na foeroeroe de na joe ede. Mi bigi omoe noit' no kan dringi 57,25 sopi en 'wan. Mi wan si na wenkri-boekoe!’

Den tra famirman bigin knoroe èn dis gi Tjadorsi moro dekati. A tak go moro fara: ‘Mi ter' ala sani fin-fini. Mi bigi omoe kis 125 goloe fonsoe-moni. Na kisi nanga ala den monter no kan kostoe moro lek 65 goloe. Ma mi pot' 2.75 na tapoe foe di mi no sabi fa katoen, terpentijn nanga den tra pkin-pkin sani lek dati e ser dja,....’

En so a ben wan go moro fara, ma den tra famiri begi en taki mek a lib na san dis foe baka beri, dat den toe ben pot na den ede foe opo na tori disi, nanga wan sper tra san moro. Ja, èn dat voorlezer no haf foe denki dat ai go hor na moni.

Na her prisiri di voorlezer ben de na ini kon pori. En so na baka di na laatste famirman tak foe na moni, Jacopoe bar amen, a tap en singi-boekoe, tek en blaka prasoro, a bigin waka gwe. Ma ef a ben prakseri dat ala sani ben psa, dan a ben kor e krabjasi. Ala den famiri tek lek marbonsoe na en baka, bika den wan sabi fa dat doe kon dat den omoe ben hab so wan hé sopi paiman......

Na sé na opo grebi Sa Ana 'wan ben tan nanga den skopoeman. En lek fa na brokodoti b'e fadon na tap na kisi, so toe watra b'e lon na Sa Anna ai. Pe mi ben tenapoe mi ben kan si fa a beni en grani skin foe prani wan bromki na tap na njoen grebi. En mi jesi ben fanga den laatste wortoe di a ben taki: ‘Andrisi, Andrisi, joe no ben libi switi, ma na sjen disi joe no ferdini. Sribi switi, mi lobi. Wan dé wi sa miti baka’.