Soela 1962-1964

[p. 24]

heo

Ston,
so lek' joe
mi no si, ba.
Ston e boekoe e kon...
na foe froewondroe joe s'don;

ston so lontoe,
d'e tjari pontoe;
fokanti lek' joe
mi noiti si toe;

liba-ston
joe moi foe si ba,
ma a'e kostoe moeiti
foe kon si joe.

Ibri wan foe joe,
ibri tan foe joe,
e sor' fa j'tranga;
j'e tjar' foer' dangra.

Joeroe foe joeroe mi de a prakseri
fa a kon, dat joe n'e froeteri
foe a ten joe ben de eri,
noso pe, ben de joe pe.

Joe na marki foe liba-lon,
pe sma e p'sa so meni tron;
joe na a ston, joe d'doen korostoe,
j'e mek' weri feni rostoe.

Ston na liba, ston na soela,
ston di e tjari somen' dangra
no wan sabiman kan taki
ofa, oten, joe kon so prati.

Ke, boskopoe wi
mek' wi sab' joe roetoe fri,
mek' wi jere joe sten
na in' wan switi dren;

dan wi no sa tan na doengroe
èn foeroe f' wi
di sa kon f' si joe
sa korostoe, sa agri.