Soela 1962-1964

[p. 14]

joh. schouten-elsenhout

San de braka brenki so
Na ini a mamanten son
Nanga en gowtoe fesi
Foeroe nanga en switi waran
Foe trowe gi s'kin
Wenke nanga joe moi lontoe doengroe fesi
Leki wan switi braka stèrapra
Di anga so é pe anoe no man kisi
Loes joe srefi fadon na ini mi anoe
Mek mi pré nanga joe grati braka boeba
Di djamanti no man foe bai
Mi ai de kot' faja gi loktoe
Mi s'kin bigin fir lekti
Ati prisiri foe si
Fa nengrewenke fesi krin
A no de kibri gi son noso alen
Loktoe tranga nofo
Foe mek moenkenki drai joe fesi
Tron dowatra nati mi ede
Foe krin mi froestan

Nickerie mi bromki loweman sjoro
Nanga joe é borsoe baka se
Pe winti de wai fring'mi na sribi
Ondro den watrasé manjabon
Foe wiki si den moi wenke nanga kenken
Jonkoeman fesi no de kibri
Foe s'kin piki fa libi 'don
Mi fajalobi mi switi anjoemara
Foe noiti mi sa frigiti na pranasi
Pe granm'ma mek mi papa fesi si son
Loekoe fa joe de prodo nanga s'kin
Di groen so moi na ini son nanga alen
Foe wakti te moenkenki sa opo
Spiti gowtoe faja na joe tapoe
Mi alenten bromki
Son bron joe te joe kon geri lek gowtoe
Foe sorfroe boto srepi gwe
Leki neti no man wakti foe broko dé
Joe switi kanaalwatra
No sweri pikin foe joe doti bere
Kon taki wan pikin foto fréfré
O mi alési foto
Nanga joe moi jongoe pransoen
Foeroe nanga ramtahal smeri
Pe maskita de singi nanga é sten
Sjen no mek joe lasi
Joe gowtoe s'kin

[p. 15]

braka doifi

 

Wan pikin braka doifi

 

Djompo komopo na en nesi

 

Foe go leri fré

 

A opo ai loekoe loktoe

 

Sortoe sé winti de séri go

 

Ede opo fré bradi

 

Gi liba te doro abrasé

 

Drape jong' doifi

 

Miti wan p'kin kondre

 

Di didon lagi moro se

 

A saka foe mek en nesi

 

Kowroe jagi en te a no man s'don

 

A seki en fré go moro fara

 

Presi de moro leki ai man si

 

Ma foetoe no de kis pasi

 

Foe beti gron

 

A prakseri fosi pesi bron a pan

 

Difoe toe a moro mofo

 

Pe dri s'don moesoe komopo lala

 

A fré kon baka na en owroe nesi

 

Pe son de waran libi foe troe

 

Drape braka doifi ati ben feni

 

Na bigi gwenti foe égi s'kin

Pangi mi kibri joe lek gowtoe
Foe den no trowe joe
Pangi mi kibri joe na ini mi ati
Foe joe gowtoe sakafasi
Foe kon brenki
Lek wan bigi stari
Foe krin kondre fesi

Pangi mi kibri joe langa jari
Foe poer' joe a doro baka
Lek wan njoen krosi di fiti ai
Pangi di kibri wi totro brakaboeba
Foe sonbron nanga alen
Pangi di tjari foeroe ebi
Nanga tranga fonfon
Pangi di jep set foto
Tide pikinengre de waka fri
Opoliba nanga bakaboesi
Drape joe kisi a bigi nen

Pangi nanga joe difrenti krin strepi
Redi braka nanga groen
Weti djeri nanga alanja
Peni den srefi a mindri toe
Pangi pangi opo loekoe
Den boen wroko di joe doe
Ten doro kaba foe wi ala
Opo prodo nanga joe