Soela 1962-1964

[p. 12]

eugene w. rellum
se nanga lobi n'e kenki

naar een novelle
van M. Rellum-van Hoogland vrij bewerkt in het Surinaams

‘Wanten mi ben sabi a fesi baka’.

‘A srefi wan, di ben de koti faja; ma pisroetoe den ai mi memre, den ai, so moi, so foeroe nanga sari-ati-foe libisma. Den di ben de brenki lek' pis-pis gowtoe’.

‘Wan bigi ati-prisiri seki mi, di a bigin foe taki safri-safri:.......

Ma mek' mi friter a tori foe a bigin; a wondroe tori disi, pasa aladé-sani so, dat mi no kan feni wan solisi foe en te tide.

A ben bigin wan moi mofo-neti, a baka di a son ben saka g'we, in wan gowtoe prodo.

Mi ben prisiri foe si den moi kroroe na hemel, di ben mek' joe prakseri a kondre foe Jana-se.

Ibri ten mi si so moi mofo-neti, m'e firi wan gran respeki foe En, di meki grontapoe so moi.

Doengroe ben de kon esi-esi èn a no ben tek' langa moro ef neti ben tapoe alasani nanga blaka fluweel sribikrosi.

Na é, stari ben monjo na hemel èn wan foeroe moen ben mek' a presi gersi wan er-tin-tin tori.

Mi saka a trapoe foe mi balkon go na mi djari.

Den blad foe den bon ben de seki safri-safri en moenkenki ben de mek' den gersi sofroe w'wiri.

Drape mi tan tanapoe, mi ede foeroe nanga prakseri.

En na drape mi si a fesi foe a fos' lesi.

So wan switi èn boen-ati a ben de sori, dat mi fasi pe mi ben de tanapoe en nanga opo mofo mi tan e loekoe.

So krin mi ben kan si a moi koti foe a fesi èn den moi ai, di ben de brenki lek' stari.

A w'wiri ben de lontoe a fesi lek' wan sorfoe lijst.

Mi ati ben de naki boen tranga èn mi ben bigin foe firi lek' mi ben wan fraw.

Ma pikinsomoro a eri sani g'we èn ini a djari, alasani ben de baka so lek' fa a ben de bifo.

Mi ati wawan no ben de a srefi moro. Wan bigi switi prisiri-firi ben kon foeroe en.

[p. 13]

Dati mi memre te tide.

Safri-safri mi waka g'we na mi oso baka; ma a eri neti mi ben de feti nanga mi srefi foe froestan, dat noti bisondroe ben pasa èn dat' na a moenkenki nanga ala tra sani moro ben pot' a wondroe-prakseri na in mi ede.

Ma in mi ati mi ben sabi, dat dati no ben de troe.

Den tradé, wroko èn sorgoe-foe-libi no gi mi ten foe prakseri a tori disi moro.

Wan toe, dri moen na baka, mi g'we go njan fakansi nanga wan boen mati foe mi di ben de libi na wan presi na se-kanti.

Den ben skrif' mi wan brifi.

‘Felicia’, den ben skrifi, ‘kon tan nanga wi pikinso. A se sa doe joe boen èn a sa mek' joe frigiti joe broko-ede. Kande a sa ler' joe foe ori pasensi toe’.

Mi ben bréti, dat den ben kar' mi kon tan, bika a presi drape ben moi sref-srefi.

Wanwan presi na a sekanti moi bigiston-ipi ben de èn trapresi ben abi moi wet' santi.

Ibri dé mi ben e go swen in a krin se-watra èn prisiri in a son.

Foeroe tron, mi ben go nanga trawan makandra, ma sontrom mi ben feni wan pasi foe go mi wawan go soekoe a tiri èn tan nanga mi lobi-prakseri wawan, bika a gersi, dat a se abi a makti foe mek' sorgoe lib' joe, lek' dede w'wiri e fadon na bon.

En so mi fakansi ben de grati p'sa nanga rostoe èn switi prisiri.

Wan foe den laste dé, mi g'we go koiri wan bakadina na sekanti. Mi no ben wan go toemsi fara èn mi soekoe wan boen presi na wan ipi bigiston. Mi go s'don drape foe loekoe na a blaw se. A krin sowtoe loktoe ben de switi foe smeri.

A son ben de saka moro èn moro.

Wanten mi si, dat wan fini dow-krosi ben de saka kon na tap' a watra.

‘O sortoe sani na dati’, mi ben denki, ‘a gersie dat dampoe e opo kon. Dan a betre mi drai baka’.

En dan a sani pasa.

[p. 14]

Lek' a rèis komoto na a watra mi si a moi-moi sani. Fini dampoe ben lontoe en, ma a ben de en; sondro mankeri!

Moro-moro a kon krosbé, so krosbé, dat mi ben kan si krin a gowtoe faja in en ai èn a sorfoe brinki foe en ede-w'wiri.

Mi ori mi bro èn tan wakti.

Ala sani ben de so tiri. A safri woegoe-woegoe foe a se-watra nanga a naki foe mi ati wawan ben de foe jere.

Dan a opo en ai loekoe mi èn mi jere fa a taki:

‘Felicia, lobi gersi a bigi, bradi se. Sonten en fesi kan kenki ma na insé a'e tan a srefi. Troe-troe lobi èn a bigi se e tan den srefi in den dipi, te tégo’.

‘Loekoe dja’, a taki, en a opo en anoe sori mi wan moi peri di ben e brenki lek' wan sofroe dropoe’, te joe kon froestan san mi taigi joe, dan joe prakseri sa tron lek' a peri disi’.

A langa en anoe èn poti a peri in di foe mi.

Mi no ben kan poer' mi ai na a moi goedoe in mi anoe, a peri di ben e sori redi-redi now in a leti foe a son, di ben e saka g'we.

Mi tap' mi anoe stéfi, bika mi ben frede foe loes' a peri.

Di mi poer' mi ai opo loekoe, a sani ben g'we, a sref' so wondroe- fasi lek' a ben kon.

Mi ben firi lek' wan sma, di djompo na sribi; foe tak' troe a ben de lek mi ben de in wan dren ete, èn mi no ben dorfoe foe opo mi anoe.

Nono, moro stéfi mi ben de sroto en.

En so mi lon esi-esi go na oso.

A eri pasi mi ben de taki safri: ‘mi dren wan wondroe dren, di opo mi kra, ma a no ben de not moro lek' wan dren’.

Di mi kon na oso, mi waka langa-langa go na mi kamra.

En lek' wan marki foe krin insé-krakti a peri ben didon ini mi anoe.

A ben de wan troe-troe peri; troe lek' lobi; troe, so lek' a se bradi èn dipi èn bigi.